ສ ເກົາຫຼີ ເພີ່ມວົງເງິນພັດທະນາລຸ່ມແມ່ນໍ້າຂອງ 3 ລ້ານໂດລາ

ລັດຖະມົນຕີຕ່າງປະເທດ ຂອງ ສ ເກົາຫຼີ ປະກາດໃນກອງ ປະຊຸມລຸ່ມແມ່ນໍ້າຂອງກັບ ສ ເກົາຫຼີ ຄັ້ງທີ 9 ວ່າ ຈະເພີ່ມເງິນກອງທຶນຄວາມຮ່ວມມືເປັນ 3 ລ້ານໂດລາສະຫະລັດ ໃນປີ 2020 ຫວັງ ສ້າງເສດຖະກິດລຸ່ມແມ່ນໍ້າຂອງ.

ຕາມຂ່າວຕ່າງປະເທດລາຍ ງານວ່າ ທ່ານ ນາງ ຄັງ ຄະຢອງ-ຮວາ ລັດຖະມົນຕີຕ່າງປະເທດ ຂອງ ສ ເກົາຫຼີ ເປັນປະທານກອງປະຊຸມລັດຖະມົນຕີ ຕ່າງປະເທດລຸ່ມແມ່ນໍ້າຄັ້ງທີ 9 ທີ່ປະເທດໄທ ເພື່ອທົບທວນການດຳເນີນການພັດທະນາພື້ນທີ່ແມ່ນໍ້າຂອງ, ຍົກລະດັບຄວາມສຳພັນ ແລະສານຕໍ່ຄວາມຮ່ວມມືທີ່ນໍາໄປສູ່ກອງປະຊຸມລະດັບຜູ້ນໍາໃນທ້າຍ ປີ 2019 ນີ້, ໂດຍຈະເລີນເຕີບໂຕດ້ານເສດຖະກິດ, ຄວາມຮຸ່ງເຮືອງຮ່ວມກັນ ແລະພັດທະນາການດ້ານສັງຄົມ ໂດຍຮັບຮູ້ວ່າພາຍໃຕ້ນະໂຍບາຍຂອງ ສ ເກົາຫຼີ ໄດ້ເພີ່ມຈຳນວນເງິນໃນກອງທຶນຮ່ວມມືແມ່ນໍ້າຂອງ-ສ ເກົາຫຼີ ຈາກ 1 ລ້ານໂດລາ ເປັນ 2 ລ້ານໂດລາ ໃນປີນີ້ ແລະມີແຜນຈະເພີ່ມເປັນ 3 ລ້ານໂດລາ ໃນປີ 2020.

ນອກຈາກນີ້ ສ ເກົາຫຼີ ຍັງໄດ້ປະກາດເປັນ ACMECS Develop ment Partner ແລະໃຫ້ຄວາມສຳຄັນກັບການສົ່ງເສີມຄວາມຮ່ວມມືຕໍ່ໄປ.

ພາບ ແລະຂາ່ວຈາກ:ໜັງສືພິມເສດຖະກິດ-ສັງຄົມ

แชร์