ຕາດຫ້ວຍນົກ ອີກນໍ້າຕົກຕາດທີ່ງົດງາມ

   ແຂວງໄຊສົມບູນ ເປັນໜຶ່ງ ໃນບັນດາແຂວງພາກກາງລາວທີ່ເຕັມໄປດ້ວຍຊັບພະຍາກອນທໍາມະຊາດ, ຫ້ວຍນໍ້າລໍາທານ ແລະພູຜາທີ່ສູງຊັນສະລັບສັບຊ້ອນເປັນຖັນ ເປັນແຖວທີ່ປົກຄຸມຫຸ້ມໄປດ້ວຍປ່າໄມ້ອັນດົກໜາ ແລະຂຽວງາມຕະຫຼອດປີ.

ຕາດຫ້ວຍນົກກໍແມ່ນອີກສະຖານທີ່ທ່ອງທ່ຽວໜຶ່ງທີ່ມີຄວາມ ໂດດເດັ່ນ ແລະສວຍສົດງົດງາມຕັ້ງ ຢູ່ພູກອງເຂົ້າລະຫວ່າງເຂດແດນ ນໍ້າໂມ້ ແລະບ້ານທົ່ງຮັກຫ່າງຈາກ ເທສະບານເມືອງອານຸວົງ ໄປປະມານ 30 ກິໂລແມັດ ເປັນນໍ້າຕົກຕາດທີ່ມີສະເໜ່ງົດງາມແບບທໍາ ມະຊາດ,ເໝາະແກ່ການມາທ່ຽວຊົມ ແລະພັກຜ່ອນຢ່ອນໃຈໃນຍາມຫວ່າງເພື່ອມາຍ່າງເລາະປ່າທ່ຽວ ຊົມທໍາມະຊາດ, ກິນເຂົ້າປ່າສາມັກ ຄີ ແລະລົງຫຼິ້ນນໍ້າຕົກຕາດແຊ່ເຢັນໃຫ້ຊື່ນໃຈ.

ຕາດຫ້ວຍນົກເປັນຕາດທີ່ມີ ສາຍນໍ້າໄຫຼຕະຫຼອດປີຊຶ່ງໃນມື້ພັກກໍຈະມີມວນຊົນໄປທ່ຽວຊົມຢ່າງ ຫຼວງຫຼາຍ ໂດຍສະເພາະແມ່ນໃນ ໄລຍະເທສະການປີໃໝ່ລາວ, ຢູ່ບໍລິເວນອ້ອມຕາດປະຊາຊົນໃນເຂດນີ້ໄດ້ເຮັດການຜະລິດຈຶ່ງເຮັດໃຫ້ ເປັນຮົ່ມເຢັນດີ ແລະອາກາດກໍປອດໂປ່ງສົດໃສຕາດດັ່ງກ່າວມີຄວາມສູງປະມານ  200 ແມັດ.

  ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 06/08/2019