ວິທີປູກ ແລະຮັກສາຜັກສະຫຼັດ

  ຜັກສະຫຼັດ ເປັນຜັກທີ່ບໍລິໂພກໃບມີຖິ່ນກຳເນີດໃນທະວີບອາຊີ ແລະເອີຣົບ, ເປັນຜັກໃນຕະກຸນ Compositae ມີຊື່ທາງວິທະຍາ ສາດວ່າ: Lactuca sativa Linn, ຊຶ່ງມີ 3 ກຸ່ມໃຫຍ່ຄື:  ຜັກສະ ຫຼັດທີ່ຫໍ່ຫົວຄ້າຍຄືກັບກະລໍ່າປີ (Head lectuce), ຜັກສະ ຫຼັດຊະນິດທຳມະດາບໍ່ຫໍ່(Leaf lectuce) ແລະຜັກສະຫຼັດທີ່ມີ ລຳຕົ້ນຍາວ (Stem lectuce); ຊຶ່ງປູກໄດ້ໃນດິນທຸກຊະນິດ ແຕ່ ມັກດິນຊາຍແກມຕົມ, ມີຄວາມຊຸ່ມ ໃນດິນພໍສົມຄວນ ແລະຕ້ອງການແສງແດດຕະຫຼອດມື້, ອຸນຫະພູມ ທີ່ເໝາະສົມນັ້ນ ຖ້າເປັນພັນໃບຢູ່ ໃນໄລຍະ 21-23 ອົງສາເຊ, ຖ້າ ເປັນຫົວຫໍ່ຢູ່ໃນລະຫວ່າງ 15,5-31 ອົງສາເຊ.

  ແຫຼ່ງຂໍ້ມູນຈາກສະຖາບັນຄົ້ນຄວ້າກະສິກຳ-ປ່າໄມ້ແຫ່ງຊາດໃຫ້ຮູ້ວ່າ: ຜັກສະຫຼັດສາມາດປູກໄດ້ຕະຫຼອດປີຂຶ້ນກັບແນວພັນ (ແນວພັນທີ່ນິຍົມກັນປູກໃນບ້ານເຮົາມີ 2 ຈໍາພວກຄື: ຜັກສະຫຼັດຫໍ່ເປັນຫົວ ແລະຜັກສະຫຼັດເປັນໃບ). ສ່ວນວິ ທີກ້າເບ້ຍແມ່ນ ຂຸດ ຫຼື ໄຖດິນໃຫ້ ເລິກປະມານ10-15 ຊັງຕີແມັດ, ຕາກດິນໄວ້ 5-7 ມື້, ໃສ່ຝຸ່ນຄອກ ຫຼື ຝຸ່ນບົ່ມປະສົມລົງໃນດິນ, ພວນໜ້າດິນໃຫ້ລະອຽດ. ຜັກສະຫຼັດປູກໄດ້ທັງວິທີຫວ່ານຢາຍສະເໝີທົ່ວໜານ (ພັນໃບ), ຖ້າຫາກປູກແບບແຖວດຽວ ແລະ

ແບບຄູ່ (ໃຊ້ໄດ້ທຸກໆພັນ), ໄລຍະປູກລະຫວ່າງຕົ້ນ ແລະລະຫວ່າງແຖວທີ່ເໝາະສົມຄື: 25x30 ຊັງຕີແມັດ ແລະ 40x40 ຊັງຕີແມັດສຳລັບພັນຫໍ່ຫົວ. ສ່ວນການປູກແບບຫວ່ານໃຫ້ຫວ່ານເມັດຢາຍລົງໜ້າດິນຂອງໜານປູກແລ້ວຫວ່ານປົກດ້ວຍຝຸ່ນຄອກ ຫຼື ຝຸ່ນບົ່ມທີ່ລະລາຍຕົວດີໜາປະ-ມານ 0,5-1 ຊັງຕີແມັດ, ປົກຄຸມດ້ວຍເຟືອງ ຫຼື ຫຍ້າແຫ້ງ, ຫົດນ້ຳດ້ວຍບົວຝອຍລະອຽດ, ເມື່ອຕົ້ນ ເລີ່ມງອກມີໃບແທ້ 2-3 ໃບ ໃຫ້ເລີ່ມຖອນແຍກຕົ້ນທີ່ອ່ອນແອອອກຖິ້ມແລ້ວຈັດໄລຍະຫ່າງລະຫວ່າງຕົ້ນ ແລະແຖວໃຫ້ໄດ້ໄລຍະ 25x30 ຊັງ ຕີແມັດ. ສະເພາະການ ປູກລົງໜານ  ຫຼັງຈາກຫວ່ານເມັດແລ້ວ ແລະຕົ້ນ ເບ້ຍພ້ອມທີ່ຈະປູກຄື ອາຍຸໄດ້ 25-30 ມື້ ຫຼື ມີໃບແທ້ 3-4 ໃບຄັດເລືອກເອົາຕົ້ນທີ່ສົມບູນ ແລະແຂງແຮງຍ້າຍລົງໜານປູກໃຫ້ໃຊ້ໄລຍະຫ່າງລະຫວ່າງຕົ້ນ ແລະແຖວຄືກັນກັບປູກແບບຫວ່ານ.  

ການບົວລະບັດຮັກສາພືດດັ່ງກ່າວນີ້ຕ້ອງການຝຸ່ນພໍສົມຄວນດັ່ງນັ້ນ, ຈິ່ງແນະນຳໃຫ້ໃສ່ຝຸ່ນ N,P,K ສູດ 15:15:15 ສໍາລັບພັນໃບ ແລະ13:13:21 ສໍາລັບພັນຫໍ່ຫົວ ຫຼື ສູດທີ່ໃກ້ຄຽງກັນ ນີ້ໃນຈຳນວນ 300 ກິໂລຕໍ່ເຮັກຕາ ໂດຍແບ່ງໃສ່ 2 ເທື່ອຄື: ເທື່ອທີ 1 ໃສ່ເຄິ່ງໜຶ່ງເປັນຝຸ່ນຮອງພື້ນຕອນປູກແລ້ວພວນດິນປົກ ແລະເທື່ອທີ 2 ໃຫ້ໃສ່ເມື່ອພືດມີອາຍຸ 10-30 ມື້ ຈໍານວນທີ່ເຫຼືອຄັ້ງທຳອິດ ພ້ອມ ນີ້ອາດເພີ່ມຝຸ່ນຢູເຣຍອີກ 60 ກິໂລ ຕໍ່ເຮັກຕາ ເພື່ອເລ່ງການຈະເລີນເຕີບໂຕຂອງລຳຕົ້ນ ແລະໃບ; ສ່ວນການໃຫ້ນ້ຳຄວນໃຫ້ຢ່າງ ພຽງພໍ ແຕ່ຢ່າໃຫ້ປຽກເກີນໄປ; ການພວນດິນຄວນເຮັດໃນໄລຍະ ທຳອິດເພື່ອໃຫ້ດິນລຸລ່ວງຜຸຜົງລະບາຍອາກາດ ແລະນ້ຳໄດ້ດີພ້ອມກັບການກຳຈັດຫຍ້າໄປພ້ອມໆກັນເມື່ອຕົ້ນພືດມີໃບປົກຄຸມດິນແລ້ວບໍ່ຈຳເປັນເຮັດເລີຍ.

  ດ້ານການເກັບກ່ຽວໃຊ້ມີດຕັດບໍລິເວນເຫງົ້າຕົ້ນຕັດແຕ່ງໃບຮອບນອກທີ່ບໍ່ດີອອກແລ້ວວາງເອື່ອຍໄວ້ໃນບ່ອນຮົ່ມ ຫຼື ມີອາກາດຖ່າຍເທເພື່ອປ້ອງກັນການເນົ່າເສຍຫາຍ, ອາຍຸການເກັບກ່ຽວຜັກສະຫຼັດທີ່ປູກໃນບ້ານເຮົານັ້ນຂຶ້ນກັບແນວພັນ ແລະຂະໜາດຂອງການນຳໃຊ້ (40-70 ມື້).

------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์