ການນຳກະຊວງກະສິກຳ ຕິດຕາມການຜະລິດຢູ່ໄຊຍະ

  ໃນຕອນແລງວັນທີ 30 ກໍລະກົດ 2019 ຜ່ານມາທ່ານ ລຽນ ທີແກ້ວ ກຳມະການສູນກາງພັກລັດຖະມົນຕີກະຊວງກະສິກຳ ແລະປ່າໄມ້ພ້ອມດ້ວຍຄະນະໄດ້ລົງຊຸກ ຍູ້ຕິດຕາມຕ້ານແລ້ງ-ຕ້ານຖ້ວມ, ການແກ້ໄຂບັນຫາສັດຕູພືດບົ້ງຝູງທຳລາຍສາລີ ແລະ ການເຝົ້າລະວັງພະຍາດອະຫິວາໝູອາຟຣິກກາຢູ່ແຂວງໄຊຍະບູລີ ໄດ້ຮັບການ ຕ້ອນຮັບຢ່າງອົບອຸ່ນຈາກ ທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ ພ້ອມການນຳພະແນກການທີ່ກ່ຽວຂ້ອງເຂົ້າຮ່ວມ.

  ທ່ານ ສົມຫວັງ ແກ້ວວິໄລສັກ ຫົວໜ້າພະແນກກະສິກຳ ແລະ ປ່າໄມ້ແຂວງໄຊຍະບູລີ ໄດ້ຂຶ້ນລາຍງານສະພາບການຜະລິດລະດູຝົນໃຫ້ຮູ້ວ່າ: ແຜນການຜະລິດລະດູ ຝົນປີ 2019 ຄາດໝາຍສູ້ຊົນເນື້ອ ທີ່ການຜະລິດທັງໝົດໃຫ້ບັນລຸ  156,767 ເຮັກຕາ, ໃນນີ້: ເນື້ອທີ່ ປູກເຂົ້ານາປີ34,287 ເຮັກຕາ, ປັກ ດໍາໄດ້ 18.503,8 ເຮັກຕາ, ເທົ່າກັບ 53% ເຂົ້າໄຮ່ 10,480 ເຮັກຕາ ປະຕິບັດໄດ້ 100% ແລະເນື້ອທີ່ປູກພືດຕ່າງໆ112,000 ເຮັກຕາ, ສາມາດປະຕິບັດໄດ້ 95.848 ເຮັກຕາ, ເທົ່າກັບ 85%, ໃນນີ້: ເນື້ອທີ່ປູກສາລີ 36.542 ເຮັກຕາ, ມັນຕົ້ນ 29.295 ເຮັກຕາ, ໝາກ ເດືອຍ 19.016 ເຮັກຕາ, ຖົ່ວດິນ 3.262 ເຮັກຕາ. ແຕ່ໄລຍະນີ້ສະພາບດິນຟ້າອາກາດມີການປ່ຽນແປງເຮັດໃຫ້ຝົນຕົກບໍ່ຕາມລະດູການ,ເກີດໄພແຫ້ງແລ້ງຂຶ້ນໃນປະຈຸບັນ: ນໍ້າຕາມສາຍຫ້ວຍທຳມະຊາດແຫ້ງ,ຊົນລະປະທານຫຼາຍແຫ່ງບໍ່ສາມາດສະໜອງນໍ້າເຂົ້າໃນການເຮັດນາໄດ້ຢ່າງເຕັມສ່ວນເຮັດການຜະລິດເຂົ້ານາປີບໍ່ໄດ້ຕາມແຜນຕໍ່ກັບບັນຫາດັ່ງກ່າວທາງພະແນກໄດ້ກະກຽມແນວພັນເຂົ້າ ແລະ ພືດ, ມີແນວພັນເຂົ້າທີ່ຜະລິດໄດ້ຈໍາ ນວນ 60,8 ໂຕນ. ປະກອບມີແນວ ພັນເຂົ້າໜຽວ: ຖິ່ນແກ້ວ 17, ວຽງ ຈັນ 450, ທ່າດອກຄຳ 8, ກຂ 6 ແລະແນວພັນເຂົ້າຈ້າວ: ເຊບັ້ງໄຟ 2, ກຂ 15, ມະລິ 105 ໄວ້ແຈກຍາຍຊາວນາ.

  ສ່ວນການລະບາດຂອງບົ້ງຝູງສາລີຢູ່ໄຊຍະບູລີໃນເບື້ອງຕົ້ນເກີດຢູ່ເຂດບວມເລົາຜາແກ້ວ ເມືອງປາກລາຍ ມາຮອດປະຈຸບັນໄດ້ແຜ່ລາມອອກເປັນວົງກວ້າງໃນຂອບເຂດທົ່ວແຂວງປະຈຸບັນສັງລວມຮອດວັນທີ 26 ກໍລະກົດ 2019  ມີເນື້ອທີ່ສາລີຖືກຜົນກະທົບຈຳນວນ 15.421 ເຮັກຕາຂອງຈໍານວນເນື້ອທີ່ປູກສາລີທັງໝົດ 36.542 ເຮັກຕາ, ມີ 174 ບ້ານ, ມີ 7.112 ຄອບຄົວ, ຄາດຄະເນ ເນື້ອທີ່ເສຍຫາຍ 4.626 ເຮັກຕາ.ການລະບາດຂອງບົ້ງຝູງທໍາລາຍ ເຂົ້າໄຮ່ ຢູ່ເມືອງໄຊສະຖານ ຈໍານວນ 95 ເຮັກຕາ, ມີ 10 ບ້ານ, ມີ 241 ຄອບຄົວ. ເມືອງຊຽງຮ່ອນເກີດບົ້ງຮຳໃບທຳລາຍເຂົ້ານາ 0,75 ເຮັກຕາ, ມີ 3 ຄອບຄົວ ແລະ ເກີດພະຍາດໃບໄໝ້ໃນເຂົ້ານາມີ ເນື້ອທີ່ຖືກຜົນກະທົບ 44,42 ເຮັກ ຕາ, ມີ 3 ບ້ານ, ມີ 69 ຄອບຄົວ, ໃນ ນີ້ ມີເນື້ອທີ່ເສຍຫາຍ 5,5 ເຮັກຕາ, ເພື່ອຕອບໂຕ້ກັບການລະບາດຂອງບົ້ງສາລີທາງກົມປູກຝັງໄດ້ນຳຢາ ແລະເຄື່ອງພົ່ນຢາ, ນໍ້າຢາເຮັດໃຫ້ການລະບາດຫຼຸດລົງ, ປະຈຸບັນມີແນວພັນສາລີກະກຽມໄວ້ແລ້ວ 225 ໂຕນໄວ້ປູກຮອບທີສອງ.

 ສຳລັບການເພີ່ມທະວີຄວາມຮັບຜິດຊອບຕິດຕາມເຝົ້າລະວັງ, ການປ້ອງກັນພະຍາດອະຫິວາໝູອະຟຣິກາແມ່ນໄດ້ເຜີຍແຜ່ໃຫ້ ແຕ່ລະເມືອງພ້ອມທັງຕັ້ງດ່ານຈຸດກວດກາຊີດພົ່ນຢາຂ້າເຊື້ອຢູ່ເຂດທີ່ມີຄວາມສ່ຽງສູງ 3 ຈຸດຄື: ຂົວຂ້າມນ້ຳຂອງເມືອງປາກລາຍ, ຂົວຂ້າມນ້ຳຂອງທ່າເດື່ອ ເມືອງໄຊຍະບູລີ ແລະ ຂົວຂ້າມນ້ຳຂອງ ເມືອງເງິນ.

  ໂອກາດດັ່ງກ່າວລັດຖະມົນຕີກະຊວງກະສິກຳ ແລະປ່າໄມ້ໄດ້ໂອ້ລົມຕໍ່ພະນັກງານພະແນກກະສິກຳ ແລະປ່າໄມ້ແຂວງເປັນຕົ້ນແມ່ນເອົາໃສ່ໃຈຕໍ່ບັນຫາດັ່ງກ່າວຕິດຕາມແກ້ໄຂຊ່ວຍເຫຼືອປະຊາຊົນຜູ້ທີ່ໄດ້ຮັບຜົນເສຍໃຫ້ທ່ວງທັນ, ຈາກນັ້ນລັດຖະມົນຕີກະຊວງກະສິກຳ ແລະປ່າໄມ້ພ້ອມດ້ວຍຄະນະຍັງໄດ້ລົງຕິດຕາມສະພາບເນື້ອທີ່ທີ່ເກີດໄພແຫ້ງແລ້ງ ແລະເນື້ອທີ່ການລະບາດຂອງພະຍາດຝູງບົ້ງສາລີຕື່ມອີກ.

--------------

ຂຽນໂດຍ: ບຸນຫຼີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์