ຫຼວງນໍ້າທາປະຕິບັດການລົງທຶນໄດ້ 61 ໂຄງການ

  ເມື່ອບໍ່ດົນມານີ້ທີ່ສະໂມສອນແຂວງຫຼວງນໍ້າທາ ໄດ້ເປີດກອງປະຊຸມສະຫຼຸບການຈັດຕັ້ງປະຕິບັດວຽກງານຮອບດ້ານປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019, ພາຍໃຕ້ການເປັນປະທານຂອງທ່ານ ເພັດຖາວອນ ພິລະວັນ ເຈົ້າແຂວງໆ ຫຼວງນໍ້າທາ, ມີກໍາມະການປະຈໍາພັກແຂວງ, ກໍາມະການພັກແຂວງ, ສອງກອງບັນຊາການ, ເຈົ້າເມືອງ 5 ເມືອງ, ຫົວໜ້າພະແນກຮອງຫົວໜ້າພະແນກ, ຕະຫຼອດຮອດພາກສ່ວນທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມ.

 ທ່ານ ພົມມະສຸກ ວິໄລກຸນ ຫົວໜ້າຫ້ອງວ່າການແຂວງໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານຮອບດ້ານປະຈຳ 6 ເດືອນ ຕົ້ນປີແລະທິດທາງແຜນການ 6 ເດືອນທ້າຍປີ 2019 ຊຶ່ງໄດ້ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 10 ຂອງພັກ,ມະຕິກອງປະຊຸມໃຫຍ່ຄັ້ງທີ 7 ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ ປະຈໍາປີ 2019 ເຮັດໃຫ້ແຂວງ ຫຼວງນໍ້າທາມີຄວາມສະຫງົບເປັນລະບຽບຮຽບຮ້ອຍການພັດທະນາເສດຖະກິດມີການຂະຫຍາຍຕົວຢ່າງຕໍ່ເນື່ອງໃນປີ 2019 ນີ້ໃນ 6 ເດືອນຜ່ານມາ, ແຂວງຫຼວງນໍ້າທາໄດ້ຮັບການລົງທຶນທັງໝົດ 61 ໂຄງການ, ມູນຄ່າ 27,32 ຕື້ກີບ, ສາມາດເກັບລາຍຮັບເຂົ້າງົບປະມານມອບໃຫ້ສູນກາງໄດ້ 159,80 ຕື້ກີບ, ເທົ່າກັບ 51,69% ຂອງແຜນການປີ, ລາຍ ຮັບນໍາໃຊ້ໃນທ້ອງຖິ່ນໄດ້ 63,66 ຕື້ກີບ ເທົ່າກັບ 61,18% ຂອງ ແຜນການປີປະຕິບັດລາຍຈ່າຍໄດ້168,47 ຕື້ກີບ ເທົ່າກັບ 45,83% ຂອງແຜນການປີ, ໄດ້ນໍາໃຊ້ລະບົບ ຜ່ານທະນາຄານໂດຍການຈັດເກັບຄ່າທໍານຽມຈາກທີ່ດິນ ແລະທົດລອງຈຸດເກັບຄ່າທໍານຽມວີຊາຢູ່ດ່ານ ແລະຄ່າບໍລິການຢູ່ດ່ານສາກົນບໍ່ເຕ່ນ, ເອົາໃຈໃສ່ຊຸກຍູ້ສົ່ງເສີມການຜະລິດພືດລະດູແລ້ງຜະລິດເຂົ້ານາແຊງ 255 ເຮັກຕາ,ເກັບກູ້ຜົນຜະລິດໄດ້ 887 ໂຕນ,ການຜະລິດເຂົ້ານາປີປະຈຸບັນສໍາເລັດ 25%, ປູກເຂົ້າເນີນສູງ 5.714 ເຮັກຕາ ຊຸກຍູ້ການຜະລິດກະສິກໍາສະອາດ, ການຜະລິດພືດສະບຽງອາຫານໄດ້ 130 ກວ່າໂຕນ, ຜະລິດພືດເປັນສິນຄ້າເຊັ່ນ: ສາລີ, ອ້ອຍ, ມັນຕົ້ນ, ກ້ວຍ, ໝາກແຕງໂມ, ໝາກອຶ, ໝາກນໍ້າມັນ, ໄມ້ໃຫ້ໝາກ ແລະອື່ນໆ... ສາ ມາດເກັບກູ້ຜົນຜະລິດໄດ້ 450 ກວ່າໂຕນ, ເຄື່ອງປ່າຂອງດົງໄດ້ 2678 ໂຕນ, ສົ່ງເສີມການລ້ຽງສັດປະເພດຕ່າງໆເຊັ່ນ: ງົວ, ຄວາຍ, ໝູ, ແບ້ ແລະສັດປີກໄດ້ເພີ່ມຂຶ້ນ.

   ສຳລັບທິດທາງແຜນການ 6 ເດືອນທ້າຍປີຮັບປະກັນເຮັດໃຫ້ແຂວງຫຼວງນໍ້າທາຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບສູ້ຊົນເຮັດໃຫ້ ເສດຖະກິດຂະຫຍາຍຕົວຢູ່ໃນລະດັບບໍ່ໃຫ້ຫຼຸດ 7,85%, ລວມຍອດຜະລິດຕະພັນພາຍໃນໃຫ້ບັນລຸ 2.992 ຕື້ກີບໃນນີ້ຂະແໜງກະສິກໍາ ແລະປ່າໄມ້ໃຫ້ໄດ້ 1.43 2 ຕື້ກີບ, ອຸດສາຫະກໍາໃຫ້ໄດ້ 683,64 ຕື້ກີບ, ການບໍລິການໃຫ້ໄດ້ 830,08 ຕື້ກີບ, ພາສີອາກອນໃຫ້ໄດ້ 46,06 ຕື້ກີບ, ສະເລ່ຍລາຍຮັບຕໍ່ຫົວຄົນໃຫ້ໄດ້ບັນລຸ 1.880 ໂດລາຕໍ່ຄົນຕໍ່ປີ, ຈັດສັນອາຊີບຄົງທີ່ ແລະແກ້ໄຂຄອບຄົວທຸກຍາກປະຊາຊົນໃຫ້ຍັງເຫຼືອບໍ່ເກີນ 5% ຂອງຈໍານວນຄອບຄົວໃນທົ່ວແຂວງ.

 ກອງປະຊຸມຍັງໄດ້ຮັບຟັງການຜ່ານຮ່າງແຜນພັດທະນາເສດຖະກິດ-ສັງຄົມ 6 ເດືອນທ້າຍປີ 2019, ຜ່ານແຜນງົບປະມານແຫ່ງລັດ6 ເດືອນຕົ້ນປີ ແລະວາງທິດ ທາງແຜນ 6 ເດືອນທ້າຍປີ 2019 ຜ່ານບົດສະຫຼຸບວຽກງານຊົນນະບົດ ແລະລຶບລ້າງຄວາມທຸກຍາກຕິດພັນກັບຂະບວນການແຂ່ງຂັນຮັກຊາດ ແລະພັດທະນາ, ຜ່າ ນບົດສຳຫຼວດການນຳພາລວມຂອງຄະນະບໍລິຫານງານພັກແຂວງ ແລະ ເຊື່ອມຊຶມມະຕິ 8 ສະໄໝທີ X ຂອງພັກ. ຈາກນັ້ນຜູ້ແທນເຂົ້າຮ່ວມກອງປະຊຸມຍັງໄດ້ປະ ກອບຄຳຄິດຄຳເຫັນແລກປ່ຽນບົດຮຽນເພື່ອແກ້ໄຂວຽກງານໃນຕໍ່ໜ້າຕື່ມອີກ.

---------------

ຂຽນໂດຍ: ມຸນຕີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์