ຖວທ ສຳມະນາສະກັດກັ້ນ ແລະຕ້ານການຄ້າມະນຸດ

  ໃນລະຫວ່າງວັນທີ 1-3 ສິງຫາ 2019, ກົມໂຄສະນາການທ່ອງທ່ຽວ, ກະຊວງຖະແຫຼ່ງຂ່າວ-ວັດທະນາທຳ ແລະທ່ອງທ່ຽວຮ່ວມກັບພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວແຂວງສາລະວັນ ໄດ້ຈັດກອງປະຊຸມສຳມະນາວຽກງານສະກັດກັ້ນ ແລະ ປ້ອງກັນຕ້ານການຄ້າມະນຸດຂຶ້ນຢູ່ສະໂມສອນແຂວງໂດຍການເປັນປະທານຂອງທ່ານ ສະຫວັນຄອນ ຣາຊມົນຕີ ຮອງລັດຖະມົນຕີກະຊວງຖະແຫຼງຂ່າວ-ວັດທະນະທຳ ແລະທ່ອງທ່ຽວ,ທັງແມ່ນຄະນະກຳມະການຕ້ານການຄ້າມະນຸດລະດັບຊາດ ແລະທ່ານ ສົມໃຈ ອຸ່ນຈິດ ຫົວໜ້າພະແນກຖະແຫຼງຂ່າວ-ວັດທະນະທຳ ແລະທ່ອງທ່ຽວແຂວງສາລະວັນ, ໃຫ້ກຽດເຂົ້າຮ່ວມມີຕາງໜ້າກົມຕ່າງໆ ແລະພະແນການທີ່ກ່ຽວຂ້ອງ, ອົງການຈັດຕັ້ງ ແລະຜູ້ປະກອບການຫົວໜ່ວຍທຸກລະກິດ, ເຮືອນພັກ, ຮ້ານອາຫານ ແລະຮ້ານບັ້ນເທີງ

  ທ່ານ ສະຫວັນຄອນ ຣາຊມົນຕີ ກ່າວວ່າ: ໃນໄລຍະຜ່ານມາກໍ່ໄດ້ເອົາໃຈໃສ່ຢ່າງຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ຕ່າງໆ ເພື່ອຈັດຕັ້ງປະຕິບັດແຜນພັດທະ ນາເສດຖະກິດສັງຄົມ ແລະປີນີ້ກໍ່ແມ່ນເປັນປີທ່ອງທ່ຽວລາວຈີນ ຊຶ່ງມີຄວາມໝາຍຄວາມສຳຄັນ ແລະຈຳເປັນທີ່ສຸດທີ່ພວກເຮົາຈະໄດ້ເອົາໃຈໃສ່ໃນວຽກງານດັ່ງກ່າວຍິ່ງໄປກວ່ານັ້ນອົງການສະຫະປະ ຊາຊາດກໍ່ໄດ້ຮຽກຮ້ອງໃຫ້ມີການ ເພີ່ມທະວີກັບບັ້ນດາປະເທດຕ່າງໆ ໃນໂລກຢ່າງແຂງແຮງຕໍ່ວຽກງານດັ່ງກ່າວເພື່ອໃຫ້ຫຼຸດນ້ອຍຖອຍລົງ, ຜ່ານມາຍາມໃດພັກ, ລັດຖະບານ ແລະບັນດາຂະແໜງການອື່ນໆກໍ່ ໄດ້ເອົາໃຈໃສ່ຢ່າງຕັ້ງໜ້າໃນການ ຊຸກຍູ້ ແລະສະໜັບສະໜູນວຽກງານ ດັ່ງກ່າວໃນການສະກັດກັ້ນ ແລະ ຕ້ານການຄ້າມະນຸດ, ຊຶ່ງບັນຫານີ້ ແມ່ນເກີດຂຶ້ນຢູ່ໃນບັນດາແຂວງ ຕ່າງໆເວົ້າລວມ, ເວົ້າສະເພາະກໍ່ ແມ່ນແຂວງທີ່ມີຊາຍແດນຕໍ່ຈອດ ກັນກັບປະເທດໄກ້ຄຽງແມ່ນມີຄວາມສ່ຽງສູງ,ສາຍເຫດຕົ້ນຕໍກໍ່ແມ່ນການດຳລົງຊີວິດຂອງປະຊາຊົນຈໍານວນໜຶ່ງມີຄວາມຫຍຸ້ງຍາກ, ຂາດເຂີນ,ຄວາມແຕ່ກຕ່າງລະຫວ່າງຊົນນະບົດ ແລະຕົວເມືອງ, ບັນຫານເສດຖະກິດ, ການສຶກສາ, ດ້ານສີມືແຮງງານບໍ່ຕອບສະເໜາະໄດ້ຕາມຄວາມຕ້ອງການຂອງຕະຫຼາດແຮງງານ ແລະ ບັນຫາໃນຄອບຄົວສິ່ງດັ່ງກ່າວນີ້ເປັນປັດຫຈໜຶ່ງທີ່ສົ່ງຜົນກະທົບ ແລະ ເປັນອຸປະສັກຕໍ່ໄວໜຸ່ມ, ຊາວໜຸ່ມ ແລະແມ່ຍິງຈຳນວນໜຶ່ງທີ່ມີຄວາມຕ້ອງການຢາກມີຊີວິດຄວາມເປັນຢູ່ທີ່ດີ, ຢາກຊ່ວຍເຫຼືອຄອບຄົວເຂົາເຈົ້າ ແລະເດັກນ້ອຍທີ່ຍັງບໍ່ທັນຮູ້ຖືກຕົວ, ຖືກຫຼອກດ້ວຍຫຼາຍຮູບແບບ ແລະ ໄປຊອກຫາວຽກເຮັດງານທຳຢູ່ໃນບ່ອນຕ່າງເພື່ອຫາລາຍໄດ້ມາຈຸນເຈືອຄອບຄົວ ຫຼືບາງຈຳນວນກໍ່ສະໜັກໃຈໄປເອງເພື່ອຊອກຫາປະສົບການຊີວິດດ້ວຍຕົນເອງ, ເພື່ອປັບປຸງຊີວິດຂອງຕົນເອງໃຫ້ດີຂຶ້ນ ແລະອື່ນໆ

  ສະນັ້ນກ່ອນຈະໄປໃສ່ມາໃສ່ບໍ່ວ່າຈະໄປທ່ອງທ່ຽວ ຫຼືໄປຊອກຫາວຽກເຮັດງານທຳຕ່າງຕ້ອງສຶກສາຂໍ້ມູນ, ເນື້ອໃນຢ່າງເລິກເຊີ່ງເພື່ອສາມາດຊ່ວຍ ແລະ ປ້ອງກັນຕົວເອງໄດ້, ການໂຄສະນາເຜີຍແຜ່ຂໍ້ມູນແມ່ນປັດໄຈສຳຄັນໃນການສ້າງຄວາມເຂົ້າໃຈໃຫ້ຄອບຄົວ, ຊຸມຊົນໃນທ້ອງຖິ່ນ, ສັງຄົມ, ປະຊາຊົນລາວບັນດາເຜົ່າເຂດຫ່າງໄກຊອກຫຼີກຕ້ອງໄດ້ເອົາໃຈໃສ່ຢ່າງເປັນພິເສດເພື່ອໃຫ້ເຂົາເຈົ້າເຂົ້າໃຈ.

-----------------

ຂຽນໂດຍ: ສິດຕາ ເພັດວົງສາ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ  

แชร์