ສາທາລະນະສຸກ ເຜີຍແຜ່ກົດໝາຍວ່າດ້ວຍການປະກັນສຸຂະພາບ

 ກະຊວງສາທາລະນະສຸກໄດ້ຈັດກອງປະຊຸມເຜີຍແຜ່ກົດໝາຍວ່າດ້ວຍການປະກັນສຸຂະພາບໃຫ້ແກ່ 6 ແຂວງ, ກະຊວງ ແລະ ພາກສ່ວນຕ່າງໆ ທີ່ກ່ຽວຂ້ອງອ້ອມຂ້າງກະຊວງສາທາລະນະສຸກໃນວັນ ທີ 31 ກໍລະກົດ 2019 ທີ່ນະຄອນຫຼວງວຽງຈັນເພື່ອເປັນບ່ອນອີງທີ່ສຳຄັນພື້ນຖານໃນການຈັດຕັ້ງປະຕິບັດວຽກງານປະກັນສຸຂະພາບໃຫ້ໄດ້ຮັບການຄຸ້ມຄອງ, ຕິດຕາມ, ກວດກາ, ຖືກຕ້ອງຕາມແນວທາງນະໂຍບາຍຂອງພັກ, ສອດຄ່ອງກັບການພັດທະນາເສດຖະກິດ-ສັງຄົມແຕ່ລະໄລຍະແລະສອດຄ່ອງກັບການປະຕິບັດພັນທະສາກົນຂອງ ສປປ ລາວ.

  ທ່ານ ຄຳພອນ ພຸດທະວົງ ຮອງລັດຖະມົນຕີກະຊວງສາທາລະນະສຸກກ່າວວ່າ: ກອງທຶນປະກັນສຸຂະພາບແຫ່ງຊາດສ້າງຕັ້ງຂຶ້ນບົນຫຼັກການແບ່ງເບົາຄວາມສ່ຽງໃນການເຈັບເປັນ ແລະແບ່ງເບົາການໃຊ້ຈ່າຍເງິນຄ່າປິ່ນປົວຂອງປະຊາຊົນຍາມເຈັບເປັນເຂົ້າໂຮງໝໍໂດຍບໍ່ໄດ້ຈ່າຍເງິນຈຳນວນຫຼວງຫຼາຍໂດຍທີ່ລັດຖະບານຈ່າຍເງິນລ່ວງ ໜ້າຂອງເບ້ຍປະກັນໃຫ້ປະຊາຊົນທຸກຄົນໃນເຂດເປົ້າໝາຍໝາຍຄວາມວ່າທຸກຄົນໃນເຂດເປົ້າໝາຍໄດ້ມີການປະກັນສຸຂະພາບແລ້ວ ແລະປະຊາຊົນຜູ້ເຈັບເປັນພຽງແຕ່ຈ່າຍເງິນສົມທົບຂອງພົນລະເມືອງລາວຕາມອັດຕາທີ່ໄດ້ກຳນົດເຂົ້າກອງທຶນເວລາມາບໍລິການແລ້ວຈະເກີດສິດປິ່ນປົວ ແລະ ຈະໄດ້ຮັບການບໍລິການປິ່ນປົວທີ່ບໍ່ເສຍຄ່າ ແລະ ກອງທຶນຈະຮັບຜິດຊອບການໃຊ້ຈ່າຍຄ່າບໍລິການປິ່ນປົວດັ່ງກ່າວໃຫ້ສະຖານທີ່ບໍລິການ.

  ສໍາລັບກົດໝາຍວ່າດ້ວຍການປະກັນສຸຂະພາບປະກອບມີ 8 ພາກ, 7 ໝວດ ແລະ 79 ມາດຕາ, ເຊິ່ງວຽກງານປະກັນສຸຂະພາບແມ່ນຕິດພັນກັບການບໍລິການປິ່ນ ປົວສາມາດຈັດຕັ້ງປະຕິບັດໄດ້ຢ່າງເປັນເອກະພາບ,ມີຄວາມໂປ່ງໄສ, ມີຄຸນນະພາບ, ມີປະສິດທິພາບ ແລະ ປະສິດທິຜົນ. ທັງນີ້, ກໍເພື່ອເຮັດໃຫ້ປະຊາຊົນມີຄວາມເຊື່ອ ໝັ້ນຕໍ່ການບໍລິການ, ເປັນເຈົ້າການ ແລະມີສ່ວນຮ່ວມຢ່າງຫ້າວຫັນໃນການປະກອບສ່ວນເຂົ້າໃນວຽກງານປະກັນສຸຂະພາບ, ເຮັດໃຫ້ອັດຕາປົກຄຸມໄດ້ບັນລຸ 100% ຂອງປະຊາກອນ,ກອງທຶນເຕີບໃຫຍ່ຂະຫຍາຍຕົວ, ເຂັ້ມແຂງ ແລະຍືນຍົງ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດເຮັດໃຫ້ສັງຄົມມີຄວາມສະຫງົບ ແລະໝັ້ນຄົງ.

  ທ່ານ ຄຳພອນ ພຸດທະວົງ ກ່າວຕື່ມວ່າ: ແຜນປະຕິຮູບສາທາລະນະສຸກໄດ້ກຳນົດໄວ້ຮອດປີ 2020 ການປົກຄຸມປະກັນສຸຂະພາບຕ້ອງບັນລຸ 80% ຂຶ້ນໄປ ແລະຮອດປີ 2025 ຕ້ອງບັນລຸ 95% ຂຶ້ນໄປຂອງພົນລະເມືອລາວ. ລັດຖະບານຕ້ອງໄດ້ສ້າງຕັ້ງ ແລະປັບປຸງລະບົບປະກັນສຸຂະພາບໃຫ້ເຂັ້ມແຂງຈຶ່ງຈະຮັບປະກັນໃຫ້ພົນ ລະເມືອງ ລາວ ທີ່ຢູ່ເຂດຊົນນະບົດຫ່າງໄກ ສອກຫຼີກ ໄດ້ເຂົ້າເຖິງການບໍລິການ ສຸຂະພາບຢ່າງສະເໝີພາບ, ເປັນທຳ ແລະທົ່ວເຖິງໄດ້ ໂດຍບໍ່ມີພາລະຈົກຖົງຈ່າຍເອງສູງ ແລະຈະສາມາດບັນລຸຄາດໝາຍດັ່ງກ່າວເພື່ອຊ່ວຍຫຼຸດຜ່ອນຄວາມທຸກຍາກ ແລະ ການພັດທະນາທາງດ້ານເສດຖະກິດ-ສັງຄົມສະນັ້ນ, ຕ້ອງໄດ້ມີນິຕິກຳຮອງຮັບ ແລະສ້າງຄວາມພ້ອມໃນການຈັດຕັ້ງປະຕິບັດວຽກງານດັ່ງກ່າວໃຫ້ສຳເລັດ ແລະຈະເປັນຜົນດີຕໍ່ປະຊາຊົນລາວບັນດາເຜົ່າໃນທົ່ວປະເທດ.

----------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์