ປະທຸມພອນ ຫາລືລົງກວດທຸລະກິດຮ້ານອາຫານທີ່ບໍ່ຖືກລະບຽບ

 ເມື່ອບໍ່ດົນມານີ້ເມືອງປະທຸມພອນ ໄດ້ຈັດກອງປະຊຸມການກໍານົດວາງແຜນຮ້ານອາຫານ-ຮ້ານກິນດື່ມເປີດເພັງ-ຮ້ອງເພັງ ທີ່ຫ້ອງປະຊຸມຫ້ອງວ່າການປົກຄອງເມືອງໂດຍການເຂົ້າຮ່ວມເປັນປະທານຂອງທ່ານ ສົມເບັງ ໄຊຍະວົງ ຮອງເຈົ້າເມືອງປະທຸມພອນແຂວງຈຳປາສັກ, ມີບັນດາກໍາມະການພັກເມືອງ, ຫົວໜ້າຫ້ອງການພ້ອມ ດ້ວຍໜ່ວຍງານ-ວິຊາການທີ່ກ່ຽວຂ້ອງແລະຫົວໜ່ວຍທຸລະກິດເຂົ້າຮ່ວມ.

 ໃນກອງປະຊຸມດັ່ງກ່າວໄດ້ມີການປຶກສາຫາລືຮ່ວມກັນເພື່ອວາງແຜນນໍາພາຄະນະກໍາມະການທີ່ຖືກແຕ່ງຕັ້ງລົງກວດກາແຕ່ລະຈຸດທີ່ມີຫົວໜ່ວຍທຸລະກິດເປີດໃຫ້ການບໍລິການຮ້ານອາຫານ-ຮ້ານກິນດື່ມເປີດເພັງ-ຟັງເພັງ ໂດຍບໍ່ຖືກຕ້ອງກັບລະບຽບກົດໝາຍທີ່ໄດ້ກໍານົດໄວ້ຕາມ 53 ມາດຕາ ທີ່ນອນຢູ່ໃນ 10 ໝວດຂອງດໍາລັດສະ ບັບເລກທີ 315/ລບ ລົງວັນທີ 2 ຕຸລາ2017 ວ່າດ້ວຍຮ້ານບັນເທີງ, ຊຶ່ງກອງປະຊຸມໄດ້ກໍານົດເອົາ 4 ຈຸດສຸ່ມໃຫຍ່ທີ່ຢູ່ລຽບຕາມເສັ້ນທາງຫຼວງ ແລະເສັ້ນທາງຫຼັກໃນການລົງກວດກາເປັນຕົ້ນກຸ່ມຫຼັກ 19 ມີ 14 ຫົວໜ່ວຍ, ກຸ່ມ 2 ບ້ານມ່ວງ 9 ຫົວໜ່ວຍ, ກຸ່ມ 4 ປະທຸມພອນມີ 14 ຫົວໜ່ວຍ, ກຸ່ມ 5 ບ້ານບຸ່ນ ແລະກຸ່ມ 6 ສະໂນດລວມກັນມີ 4 ຫົວໜ່ວຍ

 ທັງນີ້ກໍ່ເພື່ອເຮັດໃຫ້ນັກທຸລະກິດຜູ້ປະກອບການເອົາໃຈໃສ່ຮ່ວມກັນຮັກສາຄວາມເປັນລະບຽບຮຽບຮ້ອຍເພື່ອໃຫ້ສັງຄົມມີຄວາມສະຫງົບປອດໄພ ແລະໃຫ້ມີຄວາມສອດ ຄ່ອງໄປຕາມຫຼັກການມາດຕະການກ່ຽວກັບການຄຸ້ມຄອງຂອງລັດພ້ອມທັງເປັນການຕິດຕາມກວດກາເພື່ອຈັດສັນໃຫ້ມີຄວາມກ່ຽວພັນເຖິງການອະນຸລັກຮັກສາສີລະປະ, ວັດທະນະທໍາ, ຮີດຄອງປະເພນີອັນດີງາມຂອງຊາດໃຫ້ຍືນຍົງຕະຫຼອດໄປອີກດ້ວຍ.

---------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์