ເຜີຍແຜ່ຍຸດທະສາດການສື່ສານດ້ານໂພສະນາການ

   ວັນທີ 1 ສິງຫາ ທີ່ນະຄອນຫຼວງວຽງຈັນ ໄດ້ຈັດກອງປະຊຸມເຜີຍແຜ່ຍຸດທະສາດການສື່ສານຂອງຫຼາຍຂະແໜງການເພື່ອປ່ຽນແປງພຶດຕິກໍາ ແລະຄວາມເຄີຍຊິນຂອງສັງຄົມດ້ານໂພຊະນາການໂດຍການເປັນປະທານຂອງທ່ານ ບຸນເພັງ ພິລາວົງ ຫົວໜ້າກົມອະນາໄມ ແລະສົ່ງເສີມສຸຂະພາບກະຊວງສາທາລະນະສຸກ, ມີຫົວໜ້າສູນຂ່າວສານການແພດພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ບຸນເພັງ ພິລາວົງ ກ່າວວ່າ: ການຈັດກອງປະຊຸມໃນຄັ້ງນີ້ເພື່ອເຜີຍແຜ່ຍຸດທະສາດການສື່ສານຂອງຫຼາຍຂະແໜງການເພື່ອປ່ຽນແປງພຶດຕີກໍາ ແລະ ຄວາມເຄີຍສິນຂອງສັງຄົມດ້ານໂພຊະນາທິການໃຫ້ແກ່ບັນດາສູນ, ກົມເພື່ອນຮ່ວມງານ ແລະອົງການຈັດຕັ້ງສາກົນຕ່າງໆຮັບຮູ້ ແລະເອົາເປັນບ່ອນອີງໃນການຈັດຕັ້ງປະຕິບັດວຽກງານສື່ສານດ້ານໂພຊະນາການ ແລະນໍາເອົາຍຸດທະສາດດັ່ງກ່າວໄປເຜີຍແຜ່ໃນຂອບເຂດທົ່ວເທດ. ນອກນັ້ນໃນກອງປະຊຸມດັ່ງກ່າວຜູ້ເຂົ້າຮ່ວມຍັງໄດ້ປຶກສາຫາລືວິທີແກ້ໄຂບັນຫາໃນຕໍ່ກັບບັນຫາ ແລະສິ່ງທ້າທາຍຂອງໂຄງການເຂົ້າເຖິງການບໍລິການດ້ານສຸຂະພາບ ແລະໂພຊະນາການ, ເຂົ້າໃຈເຖິງບົດບາດ, ໜ້າທີ່, ອົງປະກອບທີ່ສໍາຄັນ ແລະກິດຈະກໍາຕ່າງໆ.

ບັນຫາການຂາດໂພຊະນາການຢູ່ລາວຍັງເປັນບັນຫາທ້າທາຍຊຶ່ງມີເດັກນ້ອຍຂາດອາຫານຊໍາເຣື້ອຂັ້ນປານກາງ ຫຼື ຂັ້ນຮ້າຍແຮງຫຼາຍກວ່າໜຶ່ງສ່ວນສາມປະມານ 35, 6% ແລະເກືອບວ່າມີເດັກນ້ອຍໜຶ່ງໃນສີບປະມານ 9,6% ທີ່ຂາດສານອາຫານກະທັນຫັນຂັ້ນປານກາງ ຫຼື ຮ້າຍແຮງ, ພ້ອມທັງບໍ່ເທົ່າທຽມກັນໃນດ້ານໂພຊະນາການຂຶ້ນກັບພູມມີປະເທດ, ກຸ່ມຊົນເຜົ່າ ແລະສະພາບດ້ານເສດຖະກິດ.

  ໃນຂະນະດຽວກັນກໍ່ມີພຽງແຕ່ 39,1%  ຂອງເດັກນ້ອຍໄດ້ດູດນົມແມ່ພາຍໃນຊົ່ວໂມງທໍາອິດຫຼັງເກີດ ແລະມີພຽງແຕ່ 40,4% ຂອງເດັກນ້ອຍຂອງເດັກນ້ອຍໄດ້ກິນນົມແມ່ພຽງຢ່າງດຽວຈົນເຖິງ 6 ເດືອນ. ນອກນັ້ນໜຶ່ງໃນສາມຂອງຜູ້ເປັນແມ່ໄດ້ເອົາອາຫານປະເພດແຫຼວ ແລະນໍ້ານົມອື່ນໆທີ່ບໍ່ແມ່ນນໍ້ານົມແມ່ໃຫ້ເດັກເກີດໃໝ່ກິນພາຍໃນ 3 ມື້ຫຼັງຈາກເກີດ 39% ຂອງເດັກນ້ອຍອາຍຸລະຫວ່າງ 6-23 ເດືອນ ຢູ່ໃນຂອບເຂດຕົວເມືອງ ແລະ 12% ຂອງເດັກນ້ອຍຢູ່ເຂດຊົນນະບົດ.

-------------

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์