ພິທີເປີດໂຄງການກໍ່ສ້າງຕ້ານເຈື່ອນແຄມແມ່ນໍ້າຂອງ

  ພິທີເປີດໂຄງການກໍ່ສ້າງຕ້ານເຈື່ອນແຄມແມ່ນໍ້າຂອງໄດ້ຈັດຂຶ້ນຢ່າງເປັນທາງການໃນວັນທີ 1 ສິງຫາ 2019 ທີ່ສາລາແຄມຂອງ, ນະຄອນໄກສອນ ພົມວິຫານ ແຂວງສະຫວັນນະເຂດ, ເຂົ້າຮ່ວມໃນພິທີມີ ທ່ານ ທ່ອນແກ້ວ ພຸດທະ ໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ຄຳທະວີ ໄທພະຈັນ ຫົວໜ້າກົມເຄຫາ-ຜັງເມືອງກະຊວງ ຍທຂ, ມີເຈົ້ານະຄອນໄກສອນພົມວິຫານ, ຫົວໜ້າພະແນກ ຍທຂ, ຫົວໜ້າໂຄງການ GMS, ປະທານບໍລິສັດລາວມີໄຊກໍ່ສ້າງຈຳກັດ, ພະແນກການກົມກອງອ້ອມຂ້າແຂວງ, ແຂກຖືກເຊີນ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ພົມມາ ວົງພະຈິດ ຫົວໜ້າໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນໍ້າຂອງ (SMS) ໄດ້ຂຶ້ນກ່າວລາຍງານໂດຍຫຍໍ້ກ່ຽວກັບຄວາມເປັນມາຂອງໂຄງການໂດຍໂຄງການ SMS ເປັນ ໂຄງການເງິນກູ້ຍືມ ແລະ ຊ່ວຍເຫຼືອລ້າຈາກທະນາຄານພັດທະນາອາຊີ ແລະ ມີ ທຶນສົມທົບຈາກລັດຖະບານລາວຊຶ່ງລວມມີມູນຄ່າການລົງທຶນທັງໝົດ 47,74 ລ້ານກວ່າໂດລາ, ປະກອບມີ 7 ໜ້າວຽກ (7 ໂຄງການ) ທີ່ຈະຈັດຕັ້ງປະຕິບັດໃນ 3 ເມືອງຄື: ນະຄອນໄກ ສອນພົມວິຫານ, ເມືອງພີນ ແລະ ບ້ານແດນສະຫວັນ ເມືອງເຊໂປນ.

  ສຳລັບໂຄງການຕ້ານເຈື່ອນແຄມຂອງກໍ່ແມ່ນ 1 ໃນ 7 ໂຄງການທີ່ໄດ້ຮັບການຈັດຕັ້ງປະຕິບັດນຳຫຼັງ; ເຫດຜົນຍ້ອນການຈັດສັນງົບປະມານເບື້ອງຕົ້ນບໍ່ພຽງພໍຊຶ່ງພາຍຫຼັງທີ່ຈັດການປະມູນໃນ 6 ໂຄງການສຳເລັດເຫັນວ່າສາມາດຮັກສາງົບປະມານໄດ້ເຖິງ 7 ລ້ານກວ່າໂດລາ ຈຶ່ງໄດ້ມີການອອກແບບກັນເຈື່ອນຄືນໃໝ່ ແລະ ຈັດ ການປະມູນຂຶ້ນ ຊຶ່ງມີບໍລິສັດສົນໃຈເຂົ້າຮ່ວມຈຳນວນ 9 ບໍລິສັດ ທັງພາຍໃນ ແລະ ຕ່າງປະເທດໃນນີ້ແມ່ນບໍລິສັດລາວມີໄຊກໍ່ສ້າງຈຳກັດເປັນຜູ້ຊະນະການປະມູນໃນເງື່ອນໄຂຂອງການແຂ່ງຂັນໃນມູນຄ່າ 4,5 ລ້ານກວ່າໂດລາ, ໂດຍມູນຄ່າດັ່ງກ່າວລວມມີການກໍ່ສ້າງກັນເຈື່ອນແຄມຂອງລວງຍາວ 980 ແມັດ, ຈັດສັນສວນສາທາ ລະນະ, ປູກຕົ້ນໄມ້, ສະໜອງສິ່ງອຳນວຍຄວາມສະດວກອື່ນໆ ທີ່ລະບຸໄວ້ໃນການອອກແບບ ແລະການກໍ່ສ້າງເສັ້ນທາງເບຕົງເສີມເຫຼັກຄວາມຍາວ 980 ແມັດຕາມ ຄວາມຍາວຂອງກັນເຈື່ອນໂຄງການນີ້ໄດ້ຈັດພິທີເຊັນສັນຍາຢ່າງເປັນທາງການໃນວັນທີ 5 ມິຖຸນາ2019 ຜ່ານມານີ້ຊຶ່ງຈະໃຊ້ເວລາໃນການກໍ່ສ້າງທັງໝົດ 2 ປີ ກໍ່ຄືຮອດວັນທີ 5 ມິຖຸນາ 2021.

---------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์