ການຄ້າອອກຂໍ້ຕົກລົງສະບັບໃໝ່ສຳລັບລາຍການຜະລິດຕະພັນໄມ້ເພື່ອສົ່ງອອກ

  ເພື່ອປະຕິບັດຕາມມະຕິຕົກລົງຂອງກອງປະຊຸມລັດຖະບານເປີດກວ້າງທັງເປັນການປົດລັອກທຸລະກິດ ແລະຂະໜາດໄມ້ໃຫ້ສົ່ງອອກສອດຄ່ອງກັບຄວາມຕ້ອງການຂອງຕະຫຼາດຫຼາຍຂຶ້ນ, ຫຼຸດຜ່ອນບັນຫາໄມ້ຕົກຄ້າງລວມທັງເປັນການສ້າງລາຍຮັບເຂົ້າງົບປະມານຂອງລັດ ກະຊວງອຸດສາຫະກຳ ແລະການຄ້າໄດ້ອອກຂໍ້ຕົກລົງສະບັບໃໝ່ ສຳລັບລາຍການຜະລິດຕະພັນໄມ້ເພື່ອສົ່ງອອກເພື່ອປ່ຽນແທນສະບັບເກົ່າເລກທີ 0002/ອຄ, ກອຫ ຊຶ່ງມີການຈັດຕັ້ງປະຕິບັດມາແຕ່ຕົ້ນປີ 2018 ເປັນຕົ້ນມາ.

  ຕາມທີ່ຂ່າວໄດ້ນຳສະເໜີໄປກ່ອນໜ້ານີ້ກ່ຽວກັບຜົນກອງປະຊຸມລັດຖະບານເປີດກວ້າງຄັ້ງທີ 1 ປະຈຳປີ 2019 ລະບຸວ່າ: ການຈັດຕັ້ງປະຕິບັດຄຳສັ່ງເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸມຄອງ,ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະທຸລະກິດໄມ້ໃນໄລຍະ 3 ປີຜ່ານມາຄະນະສະເພາະກິດ ແລະທຸກພາກສ່ວນໄດ້ເອົາໃຈໃສ່ຈັດຕັ້ງປະຕິບັດໜ້າທີ່ຂອງຕົນຢ່າງຈິງຈັງ ແລະເຂັ້ມງວດ, ສະພາບການລັກລອບຂຸດຄົ້ນ ແລະສົ່ງອອກໄມ້ເຖິງວ່າຫຼຸດລົງຫຼາຍແຕ່ກໍຍັງມີຢູ່ສະ ນັ້ນຈຶ່ງມອບໃຫ້ຄະນະສະເພາະກິດສຶບຕໍ່ວຽກງານດັ່ງກ່າວນີ້.

  ເພື່ອແກ້ໄຂບັນຫາໄມ້ຕົກຄ້າງຢູ່ໂຮງງານປຸງແຕ່ງໄມ້ ແລະໄມ້ປູກກອງປະຊຸມຍັງໄດ້ຕົກລົງເຫັນດີຮັບຮອງເອົາການເພີ່ມບັນຊີລາຍການຜະລິດຕະພັນໄມ້ທຳມະຊາດເພື່ອສົ່ງອອກ (ເພີ່ມຂະໜາດ 6 ລາຍການ ແລະຜະລິດຕະພັນໃໝ່ 9 ລາຍການ) ແລະລາຍການຜະລິດຕະພັນໄມ້ປູກເພື່ອສົ່ງອອກຄື: ໄມ້ວິກ, ກະຖິນນະລົງ, ໄມ້ຢາງພາລາ ແລະໄມ້ສັກແມ່ນສາມາດສົ່ງອອກໄດ້ທຸກຮູບແບບໂດຍມີການປຸງແຕ່ງ ຫຼື ບໍ່ມີການປຸງແຕ່ງກໍໄດ້, ສ່ວນໄມ້ປູກອື່ນໆໃຫ້ປະຕິບັດຕາມຮູບແບບ ແລະ ລັກສະນະທີ່ກຳນົດໃນລາຍການຜະລິດຕະພັນໄມ້ທຳມະຊາດ, ແຕ່ໃຫ້ມີການຄຸ້ມຄອງຢ່າງຮັດກຸມ, ບໍ່ໃຫ້ມີຊ່ອງຫວ່າງເອົາໄມ້ປະເພດອື່ນອອກ.

  ສະນັ້ນເພື່ອປະຕິບັດຕາມມະຕິຕົກລົງຂອງກອງຊຸມດັ່ງກ່າວໃນວັນທີ 1 ສິງ ຫາ 2019 ທາງກະຊວງອຸດສາຫະກຳ ແລະການຄ້າຈຶ່ງໄດ້ອອກຂໍ້ຕົກລົງສະບັບເລກທີ 0939/ອຄ,ກອຫ ວ່າດ້ວຍການຮັບຮອງເອົາລາຍການຜະລິດຕະພັນໄມ້ເພື່ອສົ່ງອອກ (ສະບັບປັບປຸງ) ໂດຍຮັບຮອງເອົາລາຍການຜະລິດຕະພັນໄມ້ປູກເພື່ອສົ່ງອອກ; ລາຍການຜະລິດຕະພັນໄມ້ທຳມະຊາດເພື່ອສົ່ງອອກ ແລະລາຍການຜະລິດຕະພັນຫວາຍລວມເຖິງໄມ້ປ່ອງເພື່ອສົ່ງອອກໂດຍມອບໃຫ້ກົມອຸດສາຫະກຳແລະຫັດຖະກຳອອກຄຳແນະນຳກ່ຽວກັບລາຍການຜະລິດຕະພັນໄມ້ເພື່ອສົ່ງອອກສະບັບປັບປຸງ, ໃຫ້ພະແນກອຸດສາຫະກຳແລະການຄ້າແຂວງ, ນະຄອນຫຼວງສົມທົບກັບພາກສ່ວນທີ່ກ່ຽວຂ້ອງຈັດຕັ້ງປະຕິບັດຕາມຂໍ້ຕົກລົງຢ່າງເຂັ້ມງວດ.

  ສຳລາຍການຜະລິດຕະພັນໄມ້ປູກເພື່ອສົ່ງອອກຄື: ໄມ້ວິກ, ກະຖິນນະລົງ, ກະຖິນເທພາ, ໄມ້ຢາງພາລາ ແລະ ໄມ້ສັກແມ່ນສາມາດສົ່ງອອກໄດ້ໃນທຸກຮູບແບບໂດຍມີ ການປຸງແຕ່ງ ຫຼື ບໍ່ປຸງແຕ່ງ,ສ່ວນໄມ້ເກດສະໜາອະນຸຍາດໃຫ້ສົ່ງອອກໃນຮູບແບບທີ່ບົດເປັນຝຸ່ນ ຫຼື ສັບເປັນປ່ຽງນ້ອຍໆ ແລະ ໃນຮູບແບບໄມ້ເລື່ອຍຈາກສວນປູກ, ສ່ວນ ໄມ້ປູກອື່ນໆນອກຈາກໄມ້ທີ່ກ່າວມາຂ້າງເທີງແມ່ນໃກ້ປຸງແຕ່ງຕາມຮູບແບບ ແລະ ຄຸນລັກສະນະທີ່ກຳນົດໃນລາຍການຜະລິດຕະພັນໄມ້ທຳມະຊາດ.

 ພ້ອມດຽວກັນກະຊວງອຸດສາຫະກຳ ແລະການຄ້າຍັງໄດ້ເພີ່ມບັນຊີລາຍການຜະລິດຕະພັນໄມ້ທຳມະຊາດເພື່ອສົ່ງອອກເປັນຕົ້ນແມ່ນຖ່ານຄາບອນທີ່ມີລັກສະນະກະຕຸ້ນໃຫ້ມີພາວະກຳມັນຕະພາບລັງສີ ຫຼື ຖ່ານກັ່ນຕອງການດູດຊຸມ, ຕໍໄມ້, ປູດໄມ້ແກະສະຫຼັກ, ໄມ້ແກະສະຫຼັກ, ຜະລິດຕະພັນເຟີນິເຈີຈາກຕໍໄມ້, ໂຕະໄມ້ທຳມະຊາດແປ້ນແຜ່ນດຽວ, ຜະລິດຕະພັນໄມ້ປູພື້ນພາຍນອກ, ຜະລິດຕະພັນໄມ້ປະກອບຖັງລົດ, ໄມ້ຈ້າ (ໄມ້ປ່ອງຂະໜາດຂະ ໜາດນ້ອຍ) ແລະເພີ່ມຂະໜາດຂອງຜະລິດຕະພັນໄມ້ອີກຈຳນວນໜຶ່ງ.

-------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์