ເຄີ່ງປີນະຄອນຫຼວງສົ່ງອອກຜະລິດຕະພັນກະສິກຳມູນຄ່າເກືອບ 100 ຕື້ກີບ

 ແຜນງານຄໍ້າປະກັນສະບຽງອາຫານ ແລະຜະລິດເປັນສິນຄ້ານະຄອນຫຼວງໄດ້ຖືເອົາເປັນແຜນງານບຸລິມະສິດ, ພ້ອມທັງວາງນະໂຍບາຍສົ່ງເສີມການຜະລິດເປັນສິນ ຄ້າໃນທຸກລະດັບນັບແຕ່ຂັ້ນສູນກາງລົງຮອດທ້ອງຖິ່ນໂດຍສະເພາະທີ່ນອນໃນ 8 ໂຄງການ ສົ່ງເສີມທີ່ວາງອອກຈິ່ງເຮັດໃຫ້ນະຄອນຫຼວງວຽງຈັນ (ນວ) ສາມາດສົ່ງ ອອກຜະລິດຕະພັນກະ ສິກໍາທັງໝົດ 11,31 ລ້ານໂດລາ ຫຼື ປະມານ 96,14 ຕື້ກີບ ໃນ 6 ເດືອນຕົ້ນປີນີ້.

  ທ່ານ ສີສະຫວັດ ສິນທະວີ ຮອງຫົວໜ້າພະແນກກະສິກຳ ແລະປ່າໄມ້ ນວ ລາຍງານຕໍ່ກອງປະຊຸມເປີດກວ້າງຄົບຄະນະພັກຮາກຖານພະແນກກະສິກຳ ແລະ ປ້າໄມ້ປະຈຳນະຄອນຫຼວງວຽງຈັນ ຄັ້ງທີ 7 ສະໄໝທີ VI ວັນທີ 2 ສິງ ຫາ 2019 ທີ່ຫ້ອງການພະແນກກະສິກຳ ແລະ ປ່າໄມ້ນະຄອນຫຼວງວຽງຈັນວ່າ: ຜ່ານການຈັດ ຕັ້ງແຜນງານຄໍ້າປະກັນຄວາມໝັ້ນຄົງທາງດ້ານສະບຽງອາຫານ ແລະ ແຜນຜະລິດເປັນສິນຄ້າໃນໄລຍະ 6 ເດືອນ ຕົ້ນປີເຫັນວ່ານະຄອນຫຼວງສາມາດສະໜອງເຂົ້າໃຫ້ສັງຄົມໄດ້ 66,70 ພັນໂຕນ ເທົ່າກັບ 20,8% ຂອງແຜນການ 3,19 ແສນໂຕນຕໍ່ຄົນຕໍ່ປີ, ສະເລ່ຍໃສ່ຫົວຄົນໄດ້ 71 ກິໂລຕໍ່ຄົນຕໍ່ 6 ເດືອນ ຊຶ່ງການປັກດຳເຂົ້ານາແຊງຜ່ານມາບໍ່ສາມາດປະຕິບັດໄດ້ຕາມແຜນເນື່ອງຈາກການສະໜອງນໍ້າໃຫ້ລະດູນາແຊງບໍ່ໄດ້ຕາມແຜນການ, ງົບປະມານຊັກຊ້າ ແລະ ບໍ່ພຽງພໍກັບຄວາມຕ້ອງການ, ສ່ວນພືດຜັກປະຕິບັດໄດ້ 77,65 ພັນໂຕນ ເທົ່າກັບ68,29% ຂອງແຜນການ, ສະເລ່ຍໃສ່ຫົວຄົນໄດ້ 83 ກິໂລຕໍ່ຄົນຕໍ່ 6 ເດືອນ, ໝາກໄມ້ສົດປະຕິ ບັດໄດ້ 11,04 ພັນໂຕນ, ພືດອຸດສາຫະກຳ 1,71 ພັນເຮັກຕາ ແລະການສະໜອງທາດຊີ້ນ, ປາໄດ້ 30,39 ພັນໂຕນເທົ່າກັບ 46,7% ຂອງແຜນການປີ, ສະ ເລ່ຍໃສ່ຫົວຄົນໄດ້ 32,7 ກິໂລຕໍ່ຄົນຕໍ່ 6 ເດືອນ.

  ສ່ວນການຜະລິດເປັນສິນຄ້າທີ່ໄດ້ປະຕິບັດຕາມ 8 ໂຄງການທີ່ວາງອອກເປັນຕົ້ນໂຄງການຜະລິດງົວຊີ້ນເປັນສິນຄ້າ, ໂຄງການປູກເຂົ້າອິນຊີ, ໂຄງການປູກພືດຜັກອິນຊີ, ໂຄງການປູກສາລີເປັນສິນຄ້າ, ໂຄງການປູກມັນຕົ້ນເປັນສິນຄ້າ, ລ້ຽງໝູເປັນສິນຄ້າ, ໂຄງການລ້ຽງປາ ແລະ ສັດນໍ້າເປັນສິນຄ້າ, ເຫັນວ່າໃນໄລຍະ 6 ເດືອນຕົ້ນປີມີຜະລິດຕະພັນກະສິກຳສົ່ງອອກຕ່າງປະເທດໃນ 3 ດ້ານປະກອບມີດ້ານການປູກຝັງຄື: ເຂົ້າ 63,7 ໂຕນ, ທາດແປ້ງ 19,34 ພັນໂຕນ, ພືດອຸດສາຫະກຳ 24,60 ພັນໂຕນ, ໄມ້, ໝາກໄມ້-ພືດຜັກ 1 ພັນກວ່າໂຕນ, ເຄື່ອງປ່າຂອງດົງ 14,82 ພັນໂຕນ, ສ່ວນດ້ານການລ້ຽງສັດລວມມີຊີ້ນຄວາຍອົບແຫ້ງ 10 ໂຕນ ແລະດ້ານປ່າໄມ້ໄດ້ສົ່ງອອກແມ່ນໄມ້ສັກສຳເລັດຮູບ 112,29 ແມັດກ້ອນ,ຜະລິດຕະພັນໄມ້ຄຸ້ມຄອງສຳເລັດຮູບ 2,51 ພັນແມັດກ້ອນ, ຜະລິດຕະພັນໄມ້ວິກສຳເລັດຮູບ 31,36 ແມັດກ້ອນ, ຜະລິດຕະພັນໄມ້ດູ່ສຳເລັດຮູບ 2,18 ພັນແມັດກ້ອນ, ຜະລິດຕະພັນໄມ້ຄຳພີສຳເລັດຮູບ 3,73 ແມັດກ້ອນ, ເບ້ຍໄມ້ດູ່ລາຍ 1,35 ພັນເບ້ຍ, ໄມ້ປ່ອງເຄິ່ງສຳເລັດຮູບ 15,46 ພັນໂຕນ,ໄມ້ຕິ້ວຖ່ານຂາວ 2,10 ພັນໂຕນ, ຍານ 5,5 ໂຕນ, ນໍ້າມັນຍາງ 800 ກິໂລ, ຝຸ່ນເຄືອແໝ 30 ໂຕນ ແລະຖ່ານກັ່ນຕອງ 100 ໂຕນ, ໂດຍຄິດເປັນມູນຄ່າທີ່ສົ່ງອອກທັງໝົດ 11,31 ລ້ານໂດລາ ຫຼື ປະມານ 96,14 ຕື້ກີບ.

  ກອງປະຊຸມເປີດກວ້າງຄົບຄະນະພັກຮາກຖານພະແນກກະສິກຳ ແລະ ປ້າໄມ້ປະຈຳ ນະຄອນຫຼວງວຽງຈັນ ຄັ້ງນີ້, ໂດຍການເຂົ້າຮ່ວມເປັນປະທານຂອງ ທ່ານ ບຸນທອງ ພົມມະຈັນ ຄະນະປະຈຳພັກຫົວໜ້າຄະນະຈັດຕັ້ງນະຄອນຫຼວງ, ທ່ານ ສຸລະສິດ ພິລາກຸນ ຫົວໜ້າພະແນກບໍລິຫານລັດກົມຈັດຕັ້ງພະນັກງານກະຊວງກະສິ ກຳ ແລະປ່າໄມ້, ທ່ານ ຫຼ້າສາຍ ນວນທາສິງ ເລຂາຄະນະພັກຮາກຖານຫົວໜ້າພະແນກກະສິກຳ ແລະປ່າໄມ້ນະຄອນຫຼວງວຽງຈັນ, ພ້ອມດ້ວຍບັນດາເລຂາ, ຮອງເລຂາໜ່ວຍພັກຫ້ອງການ, ນະແໜງການ, ສູນ ແລະສະມາຊິກພັກອ້ອມຂ້າງພະແນກເຂົ້າຮ່ວມ.

------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์