ແຂວງວຽງຈັນ ຕັດສິນຄະດີ 276 ເລື່ອງ

 ການຈັດຕັ້ງປະຕິບັດວຽກງານຂອງສານປະຊາຊົນແຂວງວຽງຈັນໃນ 6 ເດືອນຕົ້ນປີ 2019 ໄດ້ມີການຊີ້ແຈງໃນກອງປະຊຸມສະໄໝສາມັນເທື່ອທີ 7 ຂອງສະພາປະ ຊາຊົນ ແຂວງວຽງຈັນ ຊຸດທີ I ທີ່ໄດ້ຈັດຂຶ້ນລະຫວ່າງວັນທີ 30 ກໍລະກົດ ຫາ ວັນທີ1 ສິງຫາ 2019 ທີ່ສະໂມສອນໃຫຍ່ຂອງກອງບັນຊາການທະຫານແຂວງວຽງ ຈັນ ພາຍໃຕ້ການເປັນປະທານຂອງ ທ່ານ ບຸນເພັງ ສາຍນໍລະດີ ປະທານສະພາປະຊາຊົນແຂວງວຽງຈັນຊຸດທີ 1 ໂດຍການເປັນກຽດເຂົ້າຮ່ວມ

  ທ່ານ ຄຳພັນ ສິດທິດຳພາ ວ່າການເຈົ້າແຂວງໆວຽງຈັນ, ມີສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ, ຫົວໜ້າພະແນກການ ແລະ ນັກທຸລະກິດຂອງແຂວງເຂົ້າຮ່ວມ.

  ທ່ານ ອຸດົມ ພົມມະລິນ ປະທານສານປະຊາຊົນແຂວງວຽງຈັນໄດ້ລາຍງານຕໍ່ກອງປະຊຸມຄັ້ງນີ້ວ່າ: ໃນ 6 ເດືອນຕົ້ນປີ 2019 ມີຄະດີເຂົ້າມາສານປະຊາຊົນແຂວງ ແລະສານປະຊາຊົນເຂດທັງ 3 ເຂດຂອງແຂວງ 514 ເລື່ອງ, ໄດ້ຖືກພິຈາລະນາຕັດສິນແລ້ວ 276 ເລື່ອງ, ຍັງຄ້າງກຳລັງດຳເນີນຢູ່ 238 ເລື່ອງ, ຈຳນວນຄະດີທີ່ໄດ້ຕັດສິນແລ້ວນັ້ນມີຄູ່ຄວາມພໍໃຈເຫັນດີປະຕິບັດ 285 ເລື່ອງ ແລະຄູ່ຄວາມບໍ່ພໍໃຈຕໍ່ການຕັດສິນຂອງສານ 18 ເລື່ອງ.

  ໄດ້ຕັດສິນຄະດີອາຍາປັບໄໝຈຳເລີຍມູນຄ່າ 2 ຕື້ກວ່າກີບ, ຮິບຊັບເຂົ້າເປັນຂອງລັດມີລົດຈັກ 19 ຄັນ, ໂທລະສັບມືຖື 57 ໜ່ວຍ, ປືນສັ້ນ 2 ກະບອກ, ເງິນກີບ 1 ລ້ານກວ່າກີບ, ເງິນບາດ 880 ບາດ, ຢາບ້າ 20 ພັນກວ່າເມັດ, ຢາໄອ້ 7 ຫຼອດກັບ 1 ຖົງນ້ອຍ ແລະຖົງຄາເຟອິນ 2 ຖົງເພຶ່ອທຳລາຍຖິ້ມ.

  ຄະດີແພ່ງໄດ້ພິຈາລະນາໃຫ້ຈຳເລີຍສົ່ງເງິນໃຫ້ໂຈດຈຳນວນ 20 ລ້ານກວ່າກີບ, ເງິນບາດ 1,16 ລ້ານບາດ, ໄດ້ພິຈາລະນາຕັດສິນໃຫ້ໂຈດສົ່ງຊັບຄືນໃຫ້ຈຳເລີຍ 127 ລ້ານກວ່າກີບ, ເງິນບາດ 1,5 ລ້ານບາດ. ຄະດີການຄ້າໄດ້ພິຈາລະນາໄດ້ສົ່ງໃຫ້ຈຳເລີຍສົ່ງເງິນໃຫ້ໂຈດ 4,9 ຕື້ກີບ, ຄະດີເດັກໄດ້ຕັດສິນປັບໃໝຈຳເລີຍເປັນເງິນ 3 ລ້ານກວ່າກີບ.

  ປະທານສານປະຊາຊົນແຂວງວຽງຈັນໄດ້ກ່າວຕື່ມອີກວ່າ: ສຳລັບທິດທາງແຜນການ 6 ເດືອນທ້າຍປີ 2019 ນີ້ປະທານສານປະຊາຊົນແຕ່ລະຂັ້ນຈະສືບຕໍ່ສຶກສາອົບ ຮົມການເມືອງນໍາພາແນວຄິດໃຫ້ຜູ້ພິພາກສາ ແລະພະນັກງານຂອງສານປະຊາຊົນໃຫ້ມີຄຸນທາດການເມືອງໜັກແໜ້ນມີນໍາໃຈຮັກຊາດ, ຈົ່ງຮັກພັກດີຕໍ່ພັກ, ມີສະຕິເຄົາລົບກົດໝາຍຢ່າງເຂັ້ມງວດເອົາໃຈໃສ່ຕດຕາມກວດກາການຄຸ້ມຄອງປະຕິບັດໜ້າທີ່ຂອງພະນັກງານຕຸລາການ ແລະ ແກ້ໄຂບັນຫາທີ່ເກີດຂຶ້ນໃຫ້ທັນເວລາ, ຈະເອົາ ໃຈໃສ່ໃນການພິຈາລະນາຕັດສິນຄະດີ ແລະພິພາກສາຄະດີໃຫ້ວ່ອງໄວ, ຄົບຖ້ວນ, ຮອບດ້ານ, ພາວະວິໄສ, ຖືກກົດໝາຍ ແລະຖືກຄວາມເປັນຈິງ, ສູ້ຊົນແກ້ໄຂຄະດີທຸກປະເພດທີ່ເຂົ້າມາສານປະຊານຊົນໃຫ້ໄດ້ 85% ຂຶ້ນໄປ.

------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์