ໄປເມືອງຄໍາ ຢ່າລືມແວ່ຊົມ ບໍ່ນໍ້າຮ້ອນບ້ານນາທອງ

ເມືອງຄໍາ ເປັນພູມລໍາເນົາ ຂອງພີ່ນ້ອງລາວລຸ່ມ, ເຜົ່າມົ້ງ ແລະເຜົ່າກຶມມຸເປັນສ່ວນໃຫຍ່ ໂດຍອາໄສການເຮັດໄຮ່ ແລະເຮັດສວນປະຊາຊົນເຂດນີ້ມີຄວາມດຸໝັ່ນຂະຫຍັນພຽນໃນການອອກແຮງງານເພີ່ມພູນຜະລິດຜົນທີ່ອາໄສຄວາມອຸດົມສົມບູນຂອງທໍາມະຊາດທີ່ອໍານວຍຄວາມສະດວກໃຫ້ແກ່ຜົນລະປູກຂອງເຂົາເຈົ້າເຊັ່ນ: ຜັກກາດ, ໝາກເຜັດ, ໝາກແຕງ ແລະອື່ນໆ.

ໃນເມື່ອກ່ອນເມືອງຄໍາ ເປັນພຽງຕົວເມືອງນ້ອຍໃນເຂດຊົນນະບົດແຕ່ມາຮອດປະຈຸບັນ, ແມ່ນໄດ້ຮັບການປົວແປງ ຊຶ່ງເປັນເມືອງທີ່ອຸດົມສົມບູນໄປດ້ວຍທໍາມະຊາດປ່າໄມ້ຂຽວງາມ, ມີຖໍ້ານໍ້າຕົກ, ຖໍ້າ, ວັດຖຸບູຮານເກົ່າແກ່ ແລະບໍ່ນໍ້າຮ້ອນບ້ານນາທອງເປັນບໍ່ນໍ້າຮ້ອນຈາກທໍາມະຊາດທີ່ກໍາລັງໄດ້ຮັບຄວາມນິຍົມຈາກບັນດານັກທ່ອງທ່ຽວທັງພາຍໃນ ແລະຕ່າງປະເທດທີ່ເຂົ້າມາທ່ຽວຊົມຢ່າງຫຼວງຫຼາຍ.

ບໍ່ນໍ້າຮ້ອນບ້ານນາທອງ,  ຕັ້ງຢູ່ຫ່າງຈາກເທສະບານເມືອງ 800 ແມັດ, ເປັນບໍ່ນໍ້າຮ້ອນທີ່ເກີດຈາກ ຫຼືບຫີນມີນໍ້າໃສສະອາດໄຫຼອອກມາຕະຫຼອດປີ ໃນອຸນຫະພູມປະມານ 45-50 ອົງສາ, ປະຈຸບັນບໍ່ນໍ້າຮ້ອນແຫ່ງນີ້ໄດ້ຮັບການປັບປຸງ ແລະປົວແປງໃຫ້ເປັນສະຖານທີ່ທ່ອງທ່ຽວແລ້ວດ້ວຍການມີສ່ວນຮ່ວມຈາກປະຊາຊົນເຂດດັ່ງກ່າວ  ໃນການສ້າງເປັນອ່າງສໍາລັບອາບນໍ້າໃນລະດູໜາວ ແລະເໝາະສໍາລັບການລົງແຊ່ທ່ານໃດໄດ້ໄປເຂດເມືອງຄໍາ ແຂວງຊຽງຂວາງຢ່າລືມໄປແວ່ຊົມ ແລະແຊ່ນໍ້າຮ້ອນທີ່ບໍ່ນໍ້າຮ້ອນເມືອງຄໍາອັນລືຊື່ນີ້ເພື່ອຜ່ອນຄາຍອາລົມ ແລະເຮັດໃຫ້ຈິດໃຈສົດຊື່ນແຈ່ມໃສຂຶ້ນ.

ນສພ ເສດຖະກິດ-ສັງຄົມ

แชร์