ໂຄງການອ້າຍຈົວຕົ້ນກ້າ ປີ2 ຊ່ວຍສ້າງສິນລະທໍາແກ່ເຍົາວະຊົນ

  ສຳນັກປະຕິບັດທໍາວັດປ່າດວງຕາເນຕິບັນດິດກິດຕິສັກທັມມາຣາມບ້ານຫົວຂົວ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດພິທີບວດພະ ແລະອ້າຍຈົວ ຈຳນວນ 35 ອົງ ພາຍໃຕ້ “ໂຄງ ການອ້າຍຈົວຕົ້ນກ້າປີ 2” ຂຶ້ນໃນວັນທີ 1-2 ສິງຫາ 2019 ເພື່ອຝຶກອົບຮົມສິນລະທໍາໃຫ້ແກ່ນ້ອງນ້ອຍນັກຮຽນ, ເຍົາວະຊົນ ແລະຊາວໜຸ່ມເພື່ອໃຫ້ເຂົາເຈົ້າໄດ້ຫ່າງໄກຈາກສິ່ງເສບຕິດຕ່າງໆ.

ຕາມການລາຍງານຂ່າວຂອງໜັງສືພິມຂ່າວສານປະເທດລາວ ໃນທ້າຍອາທິດຜ່ານມາໃຫ້ຮູ້ວ່າ: ໂຄງການອ້າຍຈົວຕົ້ນກ້າໄດ້ກຳນົດເອົາເຍົາວະຊົນ,  ນັກຮຽນ  ແລະຊາວໜຸ່ມແຕ່ອາຍຸ 8-18 ປີ, ມີຈຸດປະສົງ ເພື່ອໃຫ້ພະ ແລະອ້າຍຈົວທີ່ເຂົ້າບວດຮູ້ຈັກລະສິນທຳ, ບາບບຸນຄຸນໂທດ, ຮູ້ຈັກຕອບແທນບຸນຄຸນພໍ່ແມ່  ແລະຄູ-ອາຈານ. ສຳລັບໂຄງການອ້າຍຈົວຕົ້ນກ້າ ປີ 2 ນີ້ມີພະ 5 ອົງ ແລະອ້າຍຈົວ 30 ອົງ, ຊຶ່ງຈະປະຕິບັດທຳ ແລະກິດຈະກຳຕ່າງໆທີ່ກ່ຽວຂ້ອງເປັນຈຳ ນວນ 9 ຄືນ 10 ວັນ ຄືຕັ້ງແຕ່ວັນທີ 2-11 ສິງຫາ 2019 ທີ່ສຳ ນັກປະຕິບັດທໍາວັດປ່າດວງຕາ ເນ ຕິບັນດິດ ກິດຕິສັກທັມມາຣາມບ້ານຫົວຂົວ ເມືອງນາຊາຍທອງ ນະຄອນຫຼວງວຽງຈັນ.

ພະອາຈານ ດວງຕາ ວົງກົດ ຣັຕຕະນະ ເຈົ້າອະທິການວັດສຳ ນັກປະຕິບັດທໍາວັດປ່າດວງຕາເນຕິບັນດິດ ກິດຕິສັກທັມມາຣາມ ກ່າວວ່າ:  ໂຄງການດັ່ງກ່າວ,  ເກີດຂຶ້ນຍ້ອນວ່າພະສົງ ແລະອຳນາດການປົກຄອງບ້ານເຫັນຄວາມສຳຄັນໃນການປູກຈິດສຳນຶກໃຫ້ລູກຫຼານຮູ້ຈັກສິນລະທຳ, ເຫັນຄຸນປະໂຫຍດຂອງຊີວິດ, ທັງເປັນການຊ່ວຍຫຼຸດຜ່່ອນບັນຫາຄວາມໜັກໃຈ ຂອງພໍ່ແມ່ທີ່ຢ້ານລູກຫຼານໄປເຮັດໃນທາງທີ່ບໍ່ດີໃນໄລຍະປິດພາກຮຽນ,  ບັນດາກິດຈະກໍາຫຼັກຕະຫຼອດໂຄງການປະກອບມີ: ກາບໄຫວ້ ພະສູດມົນ, ນັ່ງສະມາທິ, ອອກບິນທະບາດ ແລະປະຕິບັດທຳ.

ໃນຂະນະດຽວກັນ, ບັນດາຜູ້ເຖົ້າຜູ້ແກ່ບ້ານຫົວຂົວຕ່າງກໍພາກັນເວົ້າເປັນສຽງດຽວກັນວ່າ: ໂຄງການອ້າຍຈົວຕົ້ນກ້ານີ້ຖືວ່າເປັນຜົນດີຫຼາຍຢ່າງ,  ຊຶ່ງຈະເຮັດໃຫ້ບັນດາ ລູກຫຼານຮູ້ຈັກສິນລະທຳ,  ຮູ້ຈັກຄຸນ ພໍ່-ຄຸນແມ່,  ຮູ້ຈັກທີ່ຕ່ຳທີ່ສູງ,  ຮູ້ຈັກເຄົາລົບຜູ້ໃຫຍ່  ແລະຜູ້ເຖົ້າອາວຸໂສ, ທັງເປັນການຝຶກລູກຫຼານໃຫ້ມີ ຄວາມອົດທົນ  ແລະຫຼີກລ້ຽງການໃຊ້ເວລາຫວ່າງໄປເຮັດໃນທາງທີ່ບໍ່ດີ.

ໂຄງການອ້າຍຈົວຕົ້ນກ້າຈະສືບຕໍ່ດຳເນີນໄປທຸກໆປີ, ຊຶ່ງປີນີ້ເປັນປີທີ 2, ສ່ວນສາເຫດທີ່ຮັບອ້າຍຈົວ ໄດ້ພຽງແຕ່ 30 ອົງນັ້ນ, ເນື່ອງຈາກວ່າວັດດັ່ງກ່າວຫາກໍ່ສ້າງຂຶ້ນໃໝ່ ແລະບໍ່ມີທີ່ພັກຖາວອນ ແລະພຽງພໍ.

ນສພ ເສດຖະກິດ-ສັງຄົມ

แชร์