ເປີດຂະບວນລົດໄຟຂົນສິນຄ້າຜ່ານແດນຂ້າມຂົວມິດຕະພາບ ລາວ-ໄທ

 ກົມທາງລົດໄຟກະຊວງໂຍທາທິການ ແລະ ຂົນສົ່ງໄດ້ຈັດພິທີເປີດແລ່ນຂະບວນລົດໄຟຂົນສົ່ງສິນຄ້າຜ່ານແດນຂ້າມຂົວມິດຕະພາບ ລາວ-ໄທ ແຫ່ງທີ 1 ຂຶ້ນເປັນທາງການໃນວັນທີ 1 ສິງຫາ 2019 ທີ່ລານຕູ້ສິນຄ້າທ່ານາແລ້ງ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ກຽດຕິຄຸນ ຊາດປະເສີດ ເອກອັກຄະຣາຊະທູດໄທປະຈໍາລາວ, ທ່ານ ວໍລະວຸດ ມາລາ ຮັກສາການແທນ ຜູ້ວ່າການການລົດໄຟແຫ່ງປະທດໄທ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ແສງທະວີໃສ ມະລີວັນ ຫົວໜ້າກົມທາງລົດໄຟກ່າວວ່າ: ໂຄງການກໍ່ສ້າງທາງເຊື່ອມຕໍ່ລົດໄຟ: ລາວ-ໄທ ໄລຍະທີ 1 ໄດ້ຮັບເງິນກູ້ຍືມ ແລະ ຊ່ວຍເຫຼືອລ້າຈາກອົງການເນດາປະເທດໄທມູນຄ່າ 197 ລ້ານບາດ ໄດ້ສໍາເລັດການກໍ່ສ້າງທາງລົດໄຟມີຄວາມຍາວ 3,5 ກິໂລ ໃນທ້າຍປີ 2008 ແລະໄດ້ເປີດການນໍາໃຊ້ຕົ້ນປີ 2009 ໂດຍປະຕິບັດຕາມສັນຍາຮ່ວມແລ່ນລົດໄຟລະຫວ່າງສອງລັດຖະບານລາວ-ໄທ ທີ່ໄດ້ເຊັນສັນຍາຮ່ວມກັນໃນວັນທີ 30 ມີນາ 2008 ໂດຍເບື້ອງຕົ້ນໄດ້ດໍາເນີນການບໍລິການແລ່ນລົດໄຟຂົ່ນສົ່ງໂດຍສານແຕ່ສະຖານີທ່ານາແລ້ງຫາສະຖານີໜອງຄາຍມີຄວາມຍາວ 6 ກິໂລ, ມີຜູ້ໂດຍສານນໍາໃຊ້ບໍລິ ການສະເລ່ຍ 35 ພັນຄົນຕໍ່ປີ, ມີ 2 ຖ້ຽວຕໍ່ມື້ເຊິ່ງແມ່ນການຂົນສົ່ງທີ່ເປັນ ທາງເລືອກໜຶ່ງໃຫ້ພໍ່ແມ່ປະຊາຊົນສອງຝາກຝັ່ງ ແລະ ນັກທ່ອງທ່ຽວໄປມາໄດ້ສະ ດວກຍິ່ງຂຶ້ນ.

  ຕໍ່ມາໃນເດືອນມິຖຸນາ 2012 ໄດ້ເຊັນສັນຍາກູ້ຢືມ ແລະຊ່ວຍເຫຼືອລ້າລະຫວ່າງລັດຖະບານລາວ ແລະອົງການເນດາປະເທດໄທເພື່ອສືບຕໍ່ໂຄງການກໍ່ສ້າງທາງລົດໄຟ ລາວ-ໄທໄລຍະ 2 ໃນມູນຄ່າທັງໝົດ 1.650 ລ້ານບາດ ດ້ວຍເງິນກູ້ຢືມ 70% ແລະ ຊ່ວຍເຫຼືອລ້າ 30% ໃນນັ້ນໄດ້ແບ່ງອອກເປັນສອງຕອນຄື: ຕອນທີ 1 ໄດ້ຈັດຕັ້ງປະຕິບັດການກໍ່ສ້າງແຕ່ເດືອນມີນາ 2013 ແລະ ສໍາເລັດໃນເດືອນກັນຍາ 2015 ປະກອບມີລານຕູ້ສິນຄ້າ CY, ຫ້ອງການສາງໃນຮົ່ມ, ທາງລົດໄຟເຂົ້າໄປຫາລານຕູ້ສິນຄ້າ, ລາງຫຼີກລະບົບໂທລະຄົມ ແລະສິ່ງອໍານວຍຄວາມສະດວກຕ່າງໆ ໃນມູນຄ່າ 655 ລ້ານບາດ.

  ສ່ວນຕອນທີ 2 ແມ່ນຈະສືບຕໍ່ກໍ່ສ້າງທາງລົດໄຟແຕ່ທ່ານາແລ້ງຫາສະຖານີນະຄອນຫຼວງວຽງຈັນ (ບ້ານຄໍາຫວາດເມືອງໄຊເຊດຖາ) ຍາວ 7,5 ກິໂລ ຊຶ່ງໄດ້ເຊັນສັນຍາກໍ່ສ້າງໃນວັນທີ 28 ມິຖຸນາ 2019 ຈະເລີ່ມກໍ່ສ້າງໃນເດືອນຕຸລາ 2019 ຄາດວ່າຈະໃຫ້ສໍາເລັດໃນເດືອນ ທັນວາ 2021 ເພື່ອສືບຕໍ່ການນໍາໃຊ້ລາ ນຕູ້ສິນຄ້າ (CY) ໃຫ້ຖືກຕ້ອງຕາມຈຸດປະສົງເປົ້າໝາຍໃນວັນທີ 8 ພຶດສະພາ 2018 ໄດ້ມີການເຊັນບົດບັນທຶກຈັດຫາດ້ານເຕັກນິກລະຫວ່າງກົມທາງລົດ ໄຟ ແລະ ການລົດໄຟແຫ່ງປະເທດໄທເພື່ອກະກຽມໃຫ້ແກ່ການຂົນສົ່ງສິນຄ້າທາງລົດໄຟຕາມສັນຍາທີ່ສອງລັດຖະບານລາວ-ໄທໄດ້ເຊັນສັນຍາຮ່ວມມືກັນໄວ້ນັ້ນ ຊຶ່ງໄລຍະຜ່ານມາກົມທາງລົດໄພ ແລະການລົດໄຟແຫ່ງປະເທດໄທໄດ້ປະສານສົມທົບຢ່າງໃກ້ຊິດເພື່ອຊຸກຍູ້ພາກສ່ວນກ່ຽວຂ້ອງ ແລະເຈົ້າໜ້າທີ່ທັງສອງປະເທ ດເພື່ອຊ່ວຍເຫຼືອອໍານວຍຄວາມສະດວກໃຫ້ຂະບວນລົດໄຟຂົນສົ່ງສິນຄ້າ ສາມາດແລ່ນຜ່ານໄປມາໄດ້ອັນເປັນພື້ນຖານທີ່ດີໃຫ້ແກ່ການຂົນສົ່ງສິນຄ້າທາງລົດ ໄຟລາວ-ຈີນ ແລະ ໄທ-ຈີນ ທີ່ຈະເຊື່ອມຕໍ່ກັນໃນອະນາຄົດອັນໃກ້.

 ສໍາລັບເວລາການຂົນສົ່ງສິນຄ້າແມ່ນຢູ່ໃນໄລຍະ 6 ໂມງ ຫາ 21 ໂມງ, ໂດຍມີ 2 ຖ້ຽວຕໍ່ມື້, ໂດຍນໍ້າໜັກສິນຄ້າບໍ່ເກີນ 15 ໂຕນຕໍ່ເພົາ (1 ຖ້ຽວມີ 10 ເພົາ).

-----------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์