ລາວຮັບເຄື່ອງຊ່ວຍເຫຼືອຈາກເກົາຫຼີ ມູນຄ່າ 10 ຕື້ກວ່າກີບ

  ວັນທີ 31 ກໍລະກົດທີ່ຜ່ານມາ, ຢູ່ກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ມີພິທີມອບ-ຮັບເຄື່ອງ ຊ່ວຍເຫຼືອຈາກສະມາຄົມສິລະປະ ແລະ ວັດທະນະທຳ ແຊຣິງ ສ.ເກົາຫຼີ ແລະ Ansan City ໃນມູນຄ່າ 1,35 ລ້ານໂດລາ ຫຼື ປະມານ 10 ຕື້ກວ່າກີບ, ຊຶ່ງຕາງໜ້າລັດຖະບານລາວຮັບໂດຍແມ່ນ ທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງ ຮສສ ແລະມອບໂດຍ ທ່ານນາງ ຢູ ຮຽນສຸກ ປະທານສະມາຄົມສິລະປະ ແລະ ວັດທະນະທຳ ແຊຣິງ ສ. ເກົາຫຼີ, ພ້ອມນັ້ນຍັງມີ ທ່ານ ຊິນ ຊອງຊຸນ ເອກອັກ ຄະລັດຖະທູດ ສ.ເກົາຫຼີ ປະຈຳລາວເຂົ້າຮ່ວມເປັນສັກຂີພິຍານ, ມີບັນດາພາກສ່ວນທີ່ກ່ຽວຂ້ອງຈາກກະ ຊວງ ແລະກະຊວງທີ່ກ່ຽວຂ້ອງເຂົ້າຮ່ວມ.

 ທ່ານ ນາງ ໃບຄຳ ຂັດທິຍະ ກ່າວວ່າ: ລັດຖະບານສອງປະເທດລາວ ແລະ ເກົາຫຼີ ໄດ້ມີການພົວພັບຮ່ວມມືລົງເລິກຫຼາຍດ້ານໃນຂົງເຂດພາກທຸລະກິດ ແລະດ້ານສັງຄົມ, ດັ່ງສະມາຄົມສິລະປະ ແລະວັດທະນະທຳ ແຊຣິງ ທີ່ໄດ້ມີການຮ່ວມມືກັບລາວໂດຍສະເພາະການຮ່ວມມືກັບກະຊວງ ຮສສ ແລະ ຄັ້ງນີ້ກໍເຊັນດຽວ ກັນເພື່ອສືບຕໍ່ການຮ່ວມມື, ການຊ່ວຍເຫຼືອທີ່ສະມາຄົມໄດ້ພະຍາຍາມຂົນຂວາຍຊອກຫາທຶນຮອນທາງດ້ານເຄື່ອງອຸປະໂພກ ແລະ ບໍລິໂພກເພື່ອມາສະໜັບສະ ໝູນບັນດາຄອບຄົວທຸກຍາກ ແລະໂຮງຮຽນທຸກຍາກໃນເຂດຫ່າງໄກຊອກຫຼີກ,ທັງແມ່ນໜຶ່ງໃນການຊ່ວຍເຫຼືອທີ່ມອບໃຫ້ກັບລາວ,ຊຶ່ງກະຊວງຈະນຳເອົາເຄື່ອງຊ່ວຍເຫຼືອໃນເທື່ອນີ້ໄປມອບໃຫ້ເຖິງປະຊາຊົນທີ່ທຸກຍາກໃນເຂດຫ່າງໄກຊອກຫຼີກເພື່ອແນໃສ່ໃຫ້ເຂົາເຈົ້າໄດ້ມີຊີວິດການເປັນຢູ່ທີ່ດີຂຶ້ນຕາມລຳດັບ.

 ສຳລັບເຄື່ອງຊ່ວຍເຫຼືອທີ່ນຳມາມອບໃນຄັ້ງນີ້ປະກອບມີເຄື່ອງນຸ່ງຫົ່ມ, ເສື້ອ, ໂສ້ງ ແລະເກີບ FiLa ຈໍານວນ 3,95 ພັນແກັດ, ພ້ອມທັງໂຕະນັກຮຽນ 228 ໜ່ວຍ, ຕັ່ງນັກຮຽນ 303 ໜ່ວຍ, ລວມມູນຄ່າທັງໝົດ 1,35 ລ້ານໂດລາ ຫຼື ປະມານ 11,47 ຕື້ກີບ.

--------------------

ຂຽນໂດຍ: ພິມພອນ

 ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์