ເມືອງລອງ ເຂັ້ມງວດຕິດຕາມກວດກາໂຄງການປູກກ້ວຍ

  ເພື່ອເປັນການປະຕິບັດຕາມກົດໝາຍສົ່ງເສີມການລົງທຶນສະບັບເລກທີ 14/ສພຊ, ລົງວັນທີ 17 ພະຈິກ 2016  ແລະປະຕິບັດຕາມບົດສັນວ່າດ້ວຍໂຄງ ການປູກກ້ວຍໂດຍນໍາໃຊ້ມາດຕະຖານການຜະລິດກະສິກໍາທີ່ດີຢູ່ບ້ານບໍ ແລະ ບ້ານຈຳປີໃນວັນທີ 30 ເດືອນກໍລະກົດຜ່ານມາ, ຄະນະກໍາມະການຄຸ້ມຄອງການລົງທຶນຂັ້ນເມືອງ, ເມືອງລອງ ແຂວງຫຼວງນໍ້າທາ ໄດ້ລົງຕິດຕາມກວດກາໂຄງການປູກກ້ວຍຢູ່ 2 ບ້ານດັ່ງກ່າວໂດຍມີທ່ານ ຄໍາພູ ສຸກຈະເລີນ ຫົວໜ້າຫ້ອງ ການກະສິກໍາ ແລະປ່າໄມ້ເມືອງ, ທ່ານ ບຸນບາງ ສາຍໂພນ ຫົວໜ້າຫ້ອງການຊັບພະຍາກອນທໍາມະຊາດ ແລະສິ່ງ ແວດລ້ອມເມືອງ, ມີທ່ານ ເວີຍ ທຽນຍຸ ອໍາ ນວຍການບໍລິສັດຕີຢວນສໍາປະທານປູກຢາງພາລາຈໍາກັດ, ພາກສ່ວນທີ່ກ່ຽວຂ້ອງເມືອງ ແລະພະນັກງານວິຊາການຂອງບໍລິສັດເຂົ້າຮ່ວມ.

  ຈຸດປະສົງຂອງການລົງເຮັດວຽກໃນຄັ້ງນີ້, ແມ່ນໄດ້ລົງຕິດຕາມ ແລະ ກວດກາໂຄງການປູກກ້ວຍບ້ານບໍ ແລະ ບ້ານຈາປີໂດຍສະເພາະແມ່ນຕິດຕາມ ແລະກວດກາກ່ຽວກັບການກໍ່ສ້າງ ແລະ ທະລຸເສັ້ນທາງຈາກຂົວຂ້າມນໍ້າມະບ້ານຈະເລີນໄຊຫາສວນກ້ວຍບ້ານບໍຊຶ່ງມີຄວາມຍາວຈໍານວນ 40 ກິໂລແມັດ ຊຶ່ງການກໍ່ສ້າງ ແລະທະລຸເສັ້ນທາງດັ່ງກ່າວສໍາເລັດແລ້ວ 50%, ການສ້າງຂົວຂ້າມນໍ້າຫ້ວຍ ແລະຂົວຂ້າມນໍ້າຄາ ບ້ານບໍ ຈໍານວນ 3 ແຫ່ງ, ການກໍ່ສ້າງໂຮງປັບອຸນ ຫະພູມໃນການຮັກສາກ້ວຍ ແລະເຕັກນິກການປູກກ້ວຍໂດຍການໃຊ້ມາດຕະຖານກະສິກໍາທີ່ດີ, ຊຶ່ງມີເນື້ອທີ່ທັງໝົດ 120 ເຮັກຕາ, ໂຄງການປູກກ້ວຍຂອງບໍລິສັດຕີຢວນສໍາປະທານປູກຢາງພາລາຈໍາກັດລວມມີມູນຄ່າທັງໝົດ 20 ກວ່າລ້ານຢວນ ຫຼື ເທົ່າກັບ 24 ຕື້ກວ່າກີບ.

 ໂດຍໄດ້ເລີ່ມຈັດຕັ້ງປະຕິບັດມາແຕ່ຕົ້ນເດືອນຕຸລາ ປີ 2018 ເປັນຕົ້ນມາ ແລະມາຮອດປະຈຸບັນການປູກກ້ວຍສໍາເລັດແລ້ວ 80%, ຄາດວ່າການປູກກ້ວຍດັ່ງກ່າວຈະໃຫ້ສໍາເລັດໃນຕົ້ນເດືອນ ສິງຫາ 2019 ນີ້ ແລະຈະໄດ້ເລີ່ມເກັບກູ້ຜົນຜະລິດໃນຕົ້ນປີ 2020.

--------------------

 ຂຽນໂດຍ: ສົມພອນ

 ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์