ທຫລ ເຊື່ອມມະຕິ 8 ແລະ ເອກະສານສຳຄັນ

ທະນາຄານແຫ່ງ ສປປ ລາວ (ທຫລ) ຈັດກອງປະຊຸມເຊື່ອມຊຶມມະຕິ 8 ສະໄໝທີ X ຂອງຄະນະບໍລິຫານງານສູນກາງພັກຕິດພັນກັບການມອບໃບຢັ້ງຢືນໃຫ້ໜ່ວຍພັກທີ່ຖືກຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະລະນຶກວັນຄ້າຍວັນເກີດຂອງປະທານ ສຸພານຸວົງ ແລະເອກະສານສໍາຄັນອື່ນໆ ຂຶ້ນໃນວັນທີ 30 ກໍລະກົດ 2019 ທີ່ສະຖາບັນການທະນາຄານໂດຍໃຫ້ກຽດເຂົ້າຮ່ວມຂອງສະຫາຍ ສອນໄຊ ສິດພະໄຊ ກໍາມະການສໍາຮອງສູນກາງພັກ, ເລຂາຄະນະພັກ ທຫລ, ຜູູ້ວ່າການ ທຫລ; ພ້ອມນີ້, ຍັງມີຄະນະພັກ, ເລຂາໜ່ວຍພັກ ແລະສະມາຊິກພັກທົ່ວອົງຄະນະພັກ ທຫລ ເຂົ້າຮ່ວມ.

  ໃນພິທີ, ສະຫາຍເລຂາຄະນະພັກ ທຫລ ໄດ້ນໍາສະເໜີບັນດາເນື້ອໃນຈິດໃຈຂອງມະຕິ 8 ແມ່ນການຕີລາຄາການຈັດຕັ້ງຜັນຂະຫຍາຍມະຕິກອງປະຊຸມຄົບຄະ ນະຄັ້ງທີ 7 ສະໄໝທີ X ຊຶ່ງໄດ້ຍົກໃຫ້ເຫັນໝາກຜົນຂອງການຈັດຕັ້ງປະຕິບັດມະຕິດັ່ງກ່າວ, ການນໍາພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການສ້າງຄວາມເຂັ້ມແຂງຂອງການຄຸ້ມຄອງມະຫາພາກໂດຍທຸກພາກສ່ວນທັງສູນກາງ ແລະ ທ້ອງຖິ່ນໄດ້ມີຄວາມຮັບຮູ້ທີ່ຖືກຕ້ອງ ແລະ ມີຄວາມເປັນເອກະພາບສູງຕໍ່ກັບທິດທາງແກ້ໄຂທີ່ສູນກາງພັກວາງອອກ ແລະ ນໍາເອົາເນື້ອໃນຈິດໃຈໄປຜັນຂະຫຍາຍ, ພ້ອມທັງກໍານົດມາດຕະການຫຼາຍຢ່າງເພື່ອແກ້ໄຂບັນຫາໃຫ້ທັນການ; ນອກນີ້, ທຸກພາກສ່ວນໄດ້ມີຄວາມພະຍາຍາມ ແລະເອົາໃຈໃສ່ແກ້ໄຂບັນຫາທີ່ເກີດຂຶ້ນຢ່າງຈິງຈັງ, ຊີ້ນໍາ-ນໍາພາ, ຕິດຕາມ, ກວດກາ ແລະຊຸກຍູ້ການຈັດຕັ້ງປະຕິບັດຕົວຈິງຢ່າງໃກ້ຊິດເພື່ອສ້າງເງື່ອນໄຂໃຫ້ແກ່ການຍູ້ແຮງການຈັດຕັ້ງປະຕິບັດໃນຕໍ່ໜ້າຄຽງຄູ່ກັນນັ້ນ, ຍັງເຫັນວ່າ: ໃນປະຈຸບັນສະພາບການລວມທາງດ້ານເສດຖະກິດ-ການເງິນຍັງສືບຕໍ່ມີຄວາມຫຍຸ້ງຍາກ,ການແກ້ໄຂບັນຫາບາງດ້ານຍັງຈໍາກັດ,ຍັງບໍ່ທັນສ້າງການຫັນປ່ຽນຢ່າງຈະແຈ້ງ.

 ຈາກນັ້ນ, ສະຫາຍ ຄໍາວົງ ທິບພະວົງ ຮອງເລຂາຄະນະພັກ ທຫລ, ຮອງຜູູ້ວ່າການ ທຫລ ໄດ້ເລົ່າຄືນມູນເຊື້ອ: ຊີວິດ ແລະການເຄື່ອນໄຫວປະຕິວັດຂອງທ່ານ ປະທານ ສຸພານຸວົງ ຊຶ່ງເປັນຜູ້ນໍາທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງສູງສົ່ງ, ຕໍ່ສູ້ຢ່າງກ້າແກ່ນພິລະອາດຫານຊຶ່ງຍາມໃດກໍ່ໄດ້ຍົກສູງສະຕິລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ດໍາລົງຊີວິດຢ່າງສັດຊື່ສຸດຈະລິດ ແລະ ງ່າຍດາຍ; ຕະຫຼອດຊີວິດຂອງເພິ່ນບໍ່ວ່າຈະຢູ່ໃນຕໍາແໜ່ງໃດ, ຄວາມຮັບຜິດຊອບອັນໃດເພິ່ນກໍ່ໄດ້ອຸທິດສະຕິປັນຍາ, ຄວາມຮູ້-ຄວາມສາມາດ ແລະ ຫົວຄິດປະດິດສ້າງໃຫ້ແກ່ພາລະກິດປະຕິວັດຊາດ ປະຊາທິປະໄຕ ກໍ່ຄືການປົກປັກຮັກສາ ແລະສ້າງສາພັດທະນາປະເທດຊາດເພື່ອເອກະລາດ,ອະທິປະໄຕຂອງຊາດ ແລະຄວາມສົມບູນພູນສຸກຂອງປະຊາຊົນເຮົາ. ນອກນັ້ນ,ສະຫາຍຮອງເລຂາຄະນະ ພັກ ທຫລ ຍັງໄດ້ເຜີຍແຜ່ຂໍ້ຕົກລົງຂອງຄະນະພັກ ທຫລ ວ່າດ້ວຍພາລະບົດບາດ, ໜ້າທີ່, ສິດ ແລະລະບອບດໍາເນີນຊີວິດການເມືອງຂອງຈຸພັກທີ່ຂຶ້ນກັບໜ່ວຍພັກຮາກຖານ.

  ກອງປະຊຸມໃນຄັ້ງນີ້ຍັງໄດ້ມີການສະຫຼຸບຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2018 ຊຶ່ງມີ 16 ໜ່ວຍພັກທີ່ຂຶ້ນກັບອົງ ຄະນະພັກ ທຫລ ໄດ້ຖືກຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ກວມເອົາ 57,14% ຂອງແຜນການ. ກອງປະຊຸມຍັງໄດ້ຮັບຮູ້ການຕົກ ລົງຂອງຂັ້ນເທິງກ່ຽວກັບການແຕ່ງຕັ້ງ ທ່ານ ພຸດທະໄຊ ສີວິໄລ ຫົວໜ້າກົມຄຸ້ມຄອງທະນາຄານທຸລະກິດຂຶ້ນເປັນຮອງຜູູ້ວ່າການ ທຫລ ຄົນໃໝ່.

--------------------

ຂຽນໂດຍ: ຣັດສະໝີ ດວງສັດຈະ

 ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์