ເກຶອບ 400 ຄອບຄົວ 8 ບ້ານນໍ້າຖ້ວມເມືອງນານ ຕ້ອງການສິ່ງຂອງຈຳເປັນຫຼາຍຢ່າງ

  ສະພາບນໍ້ານານຂຶ້ນຖ້ວມກະທັນຫັນເຊົ້າວັນທີ 31 ກໍລະກົດຜ່ານມາທີ່ 8 ບ້ານເມືອງນານ ແຂວງຫຼວງພະບາງ ເຖິງຈະບໍ່ມີລາຍງານຕົວເລກຜູ້ເສຍຊີວິດແຕ່ກໍມີຜູ້ບາດເຈັບນອກຈາກນີ້ຍັງເຮັດໃຫ້ຊັບສິນ, ເຮືອນຊານບ້ານຊ່ອງ, ເນື້ອທີ່ທຳການຜະລິດ ແລະສັດສາວາສີ່ງຂອງປະຊາຊົນເກືອບ 400 ຄອບຄົວລຽບແຄມສາຍນໍ້າດັ່ງກ່າວໄດ້ມີຄວາມເສຍຫາຍຢ່າງໜັກປະຈຸບັນລະດັບນໍ້າລົງສູ່ສະພາບປົກກະຕິປະຊາຊົນຜູ້ມີເງື່ອນໄຂໄດ້ເຂົ້າອະນາໄມບ້ານເຮືອນຂອງຕົນຂະນະທີ່ປະຈຸບັນປະຊາຊົນມີຄວາມຕ້ອງການເປັນອັນຮີບດ່ວນຫຼາຍຢ່າງເປັນຕົ້ນແມ່ນເຄື່ອງນຸ່ງຫົ່ມ ແລະອາຫານການກິນຈຳນວນຫຼາຍ.

  ຕາມຂໍ້ມມູນຈາກພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງຫຼວງພະບາງແຈ້ງວ່າ: 8 ບ້ານທີ່ຖືກກະທົບມີ 372 ຄອບຄົວເຊັ່ນ: ບ້ານນາຝາຍ 4 ຄອບຄົວ,ບ້ານປ່າໄຜ່ 35 ຄອບຄົວ, ບ້ານສີມຸງຄຸນ 35 ຄອບຄົວ, ບ້ານສີບຸນເຮືອງ 130 ຄອບຄົວ, ບ້ານນາເລົາ 120 ຄອບຄົວ, ບ້ານໂພນຫີນ 10 ຄອບ ຄົວ, ບ້ານນາເຄີນ 37 ຄອບຄົວ ແລະບ້ານທາດ 1 ຄອບຄົວ, ປະຊາຊົນບາງຄອບຄົວໄດ້ພຽງເຄື່ອງນຸ່ງຄາຄີງ ແລະ ມີບາງຄົນຍັງຕິດຢູ່ໃນເຮືອນ, ເຫດການຄັ້ງນີ້ໄດ້ສ້າງຄວາມເສຍຫາຍຫຼາຍກ່ວາທຸກຄັ້ງຜ່ານມາທີ່ມີຄົນເສຍຊີວິດສຳລັບຄັ້ງນີ້ມີພຽງຜູ້ໄດ້ຮັບບາດເຈັບບໍ່ມີຄົນເສຍຊີວິດ.

 ສ່ວນຂໍ້ມູນຄວາມເສຍຫາຍຍັງຢູ່ໃນຂັ້ນຕອນການເກັບກຳຂໍ້ມູນ, ເບື້ອງຕົ້ນຂອງອົງການປົກຄອງເມືືອງຊຶ່ງຊ້ວງເກີດເຫດໄດ້ສົ່ງກຳລັງເຈົ້າໜ້າທີ່ທະຫານ ແລະ ຕຳ ຫຼວດເມືອງ ເຂົ້າຊ່ວຍເຫຼືອປະຊາຊົນທີ່ຕິດຄ້າງຢູ່ໃນເຮືອນ,

 ພ້ອມທັງຊ່ວຍປ້ອງກັນຜົນກະທົບໃຫ້ບາງຄອບຄົວ ແລະຈັດຕັ້ງການປ້ອງກັນເວນຍາມເຝົ້າລະວັງຕະຫຼອດ 24 ຊົ່ວໂມງ ເນື່ອງຈາກຝົນຍັງສືບຕໍ່ຕົກ, ສ່ວນລະດັບນໍ້າໄດ້ຫຼຸດລົງເກືອບເຂົ້າສູ່ພາວະປົກກະຕິ. ປະຊາຊົນບາງຄອບຄົວໄດ້ຮັບການເບິ່ງແຍງຢ່າງໃກ້ສິດຈາກອົງການປົກຄອງເມືອງ. ປະຈຸບັນປະຊາຊົນຜູ້ມີເງື່ອນໄຂໄດ້ເຂົ້າອະນາໄມເຮືອນຂອງຕົນໂດຍສົມທົບກັບເຈົ້າໜ້າທີ່ເຂົ້າຊ່ວຍ.

  ແຕ່ສີ່ງທີ່ປະຊາຊົນຕ້ອງການເປັນອັນຮີບດ່ວນໃນປະຈຸບັນແມ່ນເຄື່ອງນຸ່ງຮົ່ມ, ອາຫານ ແລະນໍ້າ ເພື່ອບັນເທົາໄພເບື້ອງຕົ້ນເຊິ່ງຕອນແລງຂອງວັນທີ 30 ກໍລະກົດ ເພື່ອເປັນການຊ່ວຍເຫຼືອເບື້ອງຕົ້ນອົງການປົກຄອງແຂວງໄຊຍະບູລີ ໄດ້ມອບເງິນສົດ 5 ລ້ານກີບ ແລະອົງການປົກຄອງເມືອງໄຊຍະບູລີ ມອບນໍ້າດື່ມ ແລະ ມີ່ສຳເລັດຮູບມູນຄ່າ 2,4 ລ້ານກີບ ໃຫ້ປະຊາຊົນຜູ້ຖືກກະທົບ.

  ປະຈຸບັນອົງການປົກຄອງແຂວງຫຼວງພະບາງ ໄດ້ຕັ້ງຈຸດຮັບເຄື່ອງບໍລິຈາກຢູ່ຫ້ອງວ່າການປົກຄອງແຂວງພ້ອມນີ້ຫຼາຍພາກສ່ວນໃນສັງຄົມກໍ່ໄດ້ຈັດຕັ້ງກຸ່ມລະດົມການບໍລິຈາກເພື່ອນຳເຄື່ອງໄປມອບຊ່ວຍເຫຼືອໃຫ້ປະຊາຊົນຜູ້ໄດ້ຮັບຜົນກະທົບກັບສູ່ສະພາບປົກກະຕິໂດຍໄວ.

 ຢ່າງໃດກໍຕາມກົມອຸຕຸນິຍົມ ແລະອຸທົກກະສາດແຈ້ງວ່າ: ໃນໄລຍະວັນທີ 31 ກໍລະກົດ ຫາ 4 ສິງຫາ 2019 ພາຍຸ ໝູນເຂດຮ້ອນວິພາຫົວທີ 7 ປະຈຳປີ 2019 ຊຶ່ງໃນເວລາ 9:00 ໂມງຂອງວັນທີ31 ກໍລະກົດ 2019 ມີຈຸດສູນກາງຢູ່ເສັ້ນຂະໜານທີ 19.1 ອົງສາເໜືອ ແລະເສັ້ນແວງທີ 113.1 ອົງສາຕາເວັນອອກພວ ມເຄື່ອນທີ່ໄປທາງທິດຕາເວັນຕົກ-ຕາເວັນຕົກສ່ຽງເໜືອດ້ວຍຄວາມໄວ 15 ກິໂລແມັດຕໍ່ຊົ່ວໂມງ. ຈາກນັ້ນພາຍຸຫົວນີ້ຈະເຄື່ອນທີ່ຜ່ານເກາະໄຮໜານ ແລະ ຈະມີທ່າອ່ຽງເຄື່ອນເຂົ້າຝັ່ງທາງພາກເໜືອຂອງປະເທດ ສສ ຫວຽດນາມ ໃນໄລຍະວັນທີ 1 ຫາ 2 ສິງຫາ 2019 ນີ້ຈາກທ່າອ່ຽງການເຄື່ອນທີ່ຂອງພາຍຸຫົວນີ້ໃນໄລຍະ ວັນທີ 3 ຫາ 5 ສິງຫາ 2019 ຈະເຮັດໃຫ້ລົມມໍລະສຸມຕາເວັນຕົກສ່ຽງໃຕ້ມີກຳລັງແຮງເພີ່ມຂຶ້ນພັດປົກຄຸມຢູ່ພາກເໜືອລົງຫາພາກກາງຂອງປະເທດລາວຊຶ່ງຈະເຮັດໃຫ້ມີຝົກຕົກໃນລະດັບຄ່ອຍຫາປານກາງເປັນບໍລິເວນກວ້າງ ແລະຕົກໜັກຢູ່ບາງທ້ອງຖິ່ນແຂວງພາກເໜືອລົງຫາພາກກາງ ແລະ ພາກໃຕ້ດັ່ງນັ້ນຫົວພັນ, ຊຽງຂວາງ, ຫຼວງນໍ້າທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ໄຊສົມບູນ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ ນັບທັງນະຄອນຫຼວງວຽງຈັນ, ສາ ລະວັນ, ຈຳປາສັກ, ເຊກອງ ແລະອັດຕະປື ໃຫ້ມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ, ນໍ້າຖ້ວມຊຸ, ນໍ້າຖ້ວມອັ່ງ ແລະສຳລັບຜູ້ທີ່ຈະເດີນທາງໄປພາກເໜືອໃຫ້ມີສະຕິລະມັດລະວັງຕໍ່ສະພາບດິນເຈື່ອນຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດໃນໄລຍະ 1 ຫາ 5 ວັນຕໍ່ໜ້ານີ້.

------------------

ຂຽນໂດຍ: ອາພຸດເດດ ບຸບຜາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์