ຄອບຄົວຕົວແບບລ້ຽງສັດຢູ່ເມືອງຫົງສາ

ທ່ານ ນາງ ພຸດສະພອນ ມຸນິວົງ ໄດ້ເລົ່າວ່າ: ຂ້າພະເຈົ້າອາຍຸ 46 ປີ, ມີອາຊີບຫຼັກເປັນພະນັກງານຢູ່ຫ້ອງການກະສິກຳ ແລະ ປ່າໄມ້ເມືອງຫົງສາ ແຂວງໄຊຍະບູລີ, ໃນຄອບຄົວປະກອບມີ 4 ຄົນ ຍິງ 2 ຄົນ, ໃນເມື່ອກ່ອນຄອບຄົວແມ່ນມີລາຍຮັບພຽງແຕ່ເງິນເດືອນຢ່າງດຽວ. ການດຳລົງຊີວິດແມ່ນພໍແຕ່ກຸ້ມຢູ່ກຸ້ມກິນ. ຍ້ອນມີແນວ ທາງແຜນນະໂບບາຍຂອງພັກອັນ ຖືກຕ້ອງ ແລະສອດຄ່ອງກັບຄວາມເປັນຈິງຢູ່ປະເທດເຮົາໃນການຊຸກຍູ້ສົ່ງເສີມການຜະລິດກະສິກຳເປັນສິນຄ້າຊຶ່ງເປັນວຽກທີ່ຕົນເອງມັກ ແລະ ໄດ້ເລືອກເອົາການລ້ຽງສັດເປັນເປົ້າໝາຍໃນການພັດທະນາຄອບຄົວ. ໃນປີ 2015 ຈິ່ງໄດ້ເລີ່ມຕົ້ນລ້ຽງສັດປີກ (ປະ ເພດໄກ່ພັນ ສາມສາຍເລືອດ ແລະລ້ຽງເປັດ ຈຳນວນໜຶ່ງ) ເພື່ອສະໜອງໃຫ້ ແກ່ຕະຫຼາດຢູ່ພາຍໃນເມືອງ. ໂດຍ ໄດ້ສ້າງລາຍຮັບທັງໝົດປະມານ 6,2 ລ້ານກີບຕໍ່ປີ, ໃຊ້ຕົນທຶນຈຳ ນວນ 3, 3 ລ້ານກີບ ແລະຫຼັງຈາກ ຫັກຕົ້ນທຶນແລ້ວຍັງເຫຼືອ 2,9 ລ້ານກີບຕໍ່ປີ; ມາຮອດປີ 2016 ໄດ້ທົດລອງລ້ຽງຈີ່ລໍ່ຈຳນວນ 4 ຄອກ ໄດ້ຜົນຜະລິດປະມານ 60 ກິໂລກຣາມ, ສ້າງລາຍຮັບໄດ້ສະ ເລ່ຍ 14 , 5 ລ້ານກີບຕໍ່ປີ. ໃຊ້ຕົ້ນທຶນຈຳນວນ 8,5 ລ້ານກີບ ແລະ ຫຼັງຈາກຫັກຕົ້ນທຶນແລ້ວຍັງເຫຼືອ 6 ລ້ານກີບຕໍ່ປີ.

  ຜ່ານການລ້ຽງທົດລອງ ແລະ ໄດ້ທົບທວນຕີລາຄາໂດຍການສົມທຽບການລ້ຽງສັດປີກກັບການລ້ຽງຈີ່ລໍ່ແລ້ວເຫັນວ່າ: ການລ້ຽງຈີ່ລໍ່ສາມາດສ້າງລາຍຮັບໄດ້ດີ ກວ່າການລ້ຽງສັດປີກ ແລະຄວາມຕ້ອງການຂອງຕະຫຼາດກໍ່ສູງ. ດັ່ງນັ້ນ, ຈິ່ງໄດ້ຫັນມາເອົາໃຈໃສ່ໃນການລ້ຽງຈີ່ລໍ່ເປັນພິເສດ.

 ມາຮອດປະຈຸບັນນີ້, ຄອບຄົວຂອງ ທ່ານ ນາງ ພຸດສະພອນ ມຸນິວົງ ໄດ້ຂະຫຍາຍຄອກຈີ່ລໍ່ລວມແລ້ວທັງໝົດ 13 ຄອກ ສະເລ່ຍຜົນຜະລິດໄດ້ປະມານ 900 ກິໂລກຣາມຕໍ່ປີ, ສ້າງລາຍຮັບໄດ້ສະເລ່ຍ 40 ລ້ານ 5 ແສນກີບຕໍ່ປີ. ໃຊ້ຕົ້ນທຶນລວມປະມານ 23,7 ລ້ານພັນກີບຕໍ່ປີ ແລະ ຫຼັງຈາກຫັກຕົ້ນທຶນແລ້ວຍັງເຫຼືອ 16,7 ລ້ານກີບຕໍ່ປີ.

ການສ້າງເສດຖະກິດຄອບຄົວຕາມແນວທາງແຜນນະໂຍບາຍຂອງພັກມີຫຼາຍທາງເລືອກແຕ່ບັນຫາສຳຄັນແມ່ນອີງໃສ່ທ່າແຮງ, ເງື່ອນໄຂ ແລະຄວາມສາມາດຕົວຈິງຂອງຕົນເອງ; ອັນສຳຄັນທີ່ຈະນຳໄປສູ່ຄວາມສຳເລັດໄດ້ກໍຄື: ຄວາມເປັນເອກະພາບພາຍໃນຄອບຄົວ, ຄວາມມັກຮັກໃນອາຊີບ, ຄວາມດຸໝັ່ນຂະຫຍັນພຽນ, ຄວາມອົດທົນ, ກ້າເຮັດ, ກ້າຕັດສິນໃຈ, ກ້າລົງທຶນ ແລະມີຫົວຄິດປະດິດສ້າງ. ດັ່ງນັ້ນ, ຄອບຄົວທ່ານນາງ ພຸດສະພອນ ມຸນິວົງ ຊຶ່ງເປັນຄອບຄົວຕົວແບບໃນການລ້ຽງສັດເປັນສິນຄ້າໃນການພັດທະນາເສດຖະກິດຄອບຄົວຈົນກ້າວຂຶ້ນສູ້ຄວາມສຳເລັດຕາມຄວາມມຸ່ງຫວັງ ແລະ ຍັງຈະສືບຕໍ່ຂະຫຍາຍທຸລະກິດການລ້ຽງໃຫ້ເຕີບໃຫຍ່ຂຶ້ນເລື້ອຍໆ.

 ---------------

 ຂຽນໂດຍ: ກິດຕິສັກ ບົວໄລ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์