ໄທ ກຽມສະແດງສິນຄ້າ ກະຕຸ້ນທ່ອງທ່ຽວລຸ່ມແມ່ນໍ້າຂອງ

  ຝ່າຍສົ່ງເສີມການລົງທຶນອຸດສາຫະກໍາທ່ອງທ່ຽວການທ່ອງທ່ຽວແຫ່ງປະເທດໄທ (ທທທ) ຮ່ວມກັບແຂວງອຸດອນທານີກຽມຈັດງານ Thailand Shoppin g & Dining Paradise ຂຶ້ນເປັນປີທີ 2 ໃນລະຫວ່າງວັນທີ 1-31 ສິງຫາ 2019 ທີ່ສູນການຄ້າ central plaza ແຂວງອຸດອນທານີ ເພື່ອກະຕຸ້ນການໃຊ້ຈ່າຍຂອງນັກທ່ອງທ່ຽວທັງພາຍໃນ ແລະຕ່າງປະເທດໂດຍສະເພາະບັນດາປະເທດລຸ່ມແມ່ນໍ້າຂອງ ຫຼື ກຸ່ມ CLMV ລວມເຖິງປະຊາຊົນໃນພື້ນທີ່.

  ພິທີຖະແຫຼງຂ່າວງານດັ່ງກ່າວຈັດຂຶ້ນໃນວັນທີ 26 ກໍລະກົດ 2019 ທີ່ອຸດອນທານີປະເທດໄທພາຍໃຕ້ການເປັນປະທານຂອງທ່ານ ສິຣິໄຊ ຈິນດາຫຼວງ ຮອງແຈົ້າແຂວງ ແຂວງອຸດອນທານີ ແລະທ່ານ ກໍວິນ ວົງປະເສີດ ຜູ້ອໍານວຍການຝ່າຍສົ່ງເສີມການລົງທຶນອຸດສາຫະກໍາທ່ອງທ່ຽວການທ່ອງທ່ຽວແຫ່ງປະເທດໄທ, ໂດຍມີນາງສາວນະຄອນຫຼວງວຽງຈັນ ປະຈໍາປີ 2018, ຜູ້ໃຫ້ການສະໜັບສະໜູນ ແລະພາກສ່ວນກ່ຽວຂ້ອງເຂົ້າຮ່ວມ.

 ໂຄງການນີ້ຈັດຂຶ້ນເພື່ອກະຕຸ້ນການໃຊ້ຈ່າຍຂອງນັກທ່ອງທ່ຽວທັງພາຍໃນ ແລະຕ່າງປະເທດໂດຍສະເພາະກຸ່ມ CLMV ຄື: ມຽນມາ, ຫວຽດນາມ, ລາວ ແລະກໍາປູເຈຍລວມເຖິງປະຊາຊົນໃນພື້ນທີ່ດັ່ງກ່າວເກີດການໃຊ້ຈ່າຍໃນໄລຍະນອກລະດູການທ່ອງທ່ຽວ. ງານດັ່ງກ່າວຈະຈັດຂຶ້ນໃນລະຫວ່າງວັນທີ 1-31 ສິງ ຫາ 2019 ທີ່ສູນການຄ້າ central plaza ແຂວງອຸດອນທານີໂດຍຈະນໍາເອົາສິນຄ້າ ແລະການບໍລິການຕ່າງໆຈາກສູນການຄ້າ, ໂຮງແຮມ, ສະປາ, ຮ້ານຄ້າ, ຮ້ານອາຫານທີ່ມີຊື່ສຽງຫຼາຍກວ່າ 50 ຮ້ານຄ້າ ພ້ອມທັງມອບສິດທິພິເສດໃຫ້ ນັກທ່ອງທ່ຽວໂດຍຈັດໂປໂມຊັນຫຼຸດແລກແຈກແຖມຕະຫຼອດເດືອນສິງຫາ 2019.

  ພິເສດງານປີນີ້ນັກທ່ອງທ່ຽວທ່ານໃດຊື້ສິນຄ້າຄົບ 500 ບາດ ຫຼື ປະມານ 1,25 ແສນກີບ ຈະໄດ້ຮັບຄູ່ປອງຊິງໂຊກ 1 ໃບ ເພື່ອລຸ້ນຮັບລາງວັນໃຫຍ່ລົດໂຕໂຢຕ້າ ATIV ແລະລາງວັນອື່ນອີກຫຼາກຫຼາຍ.

----------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์