ຂັ້ນຕອນປູກກ້ວຍຫອມຕາມເຕັກນິກ

  ກ້ວຍຫອມເປັນໝາກໄມ້ທີ່ບໍລິໂພກງ່າຍ ແລະມີວິຕາມິນສູງຕໍ່ຮ່າງກາຍຊ່ວຍລະບາຍງ່າຍບໍ່ວ່າເດັກນ້ອຍ ຫຼືຄົນສູງອາຍຸກໍ່ສາມາດບໍລິໂພກໄດ້ເພື່ອເປັນຂອງຫວານຫຼັງຮັບປະທານອາຫານສິ່ງສຳຄັນຍັງສາມາດແປຮູບໄດ້ຫຼາຍຢ່າງເຊັ່ນ: ກ້ວຍອົບແຫ້ງ, ນໍ້າຫວານກ້ວຍ ແລະອື່ນໆອີກຫຼາຍຢ່າງ.

  ແຫຼ່ງຂໍ້ມູນຈາກສະຖາບັນຄົ້ນຄວ້າກະສິກຳ-ປ່າໄມ້ແຫ່ງຊາດໃຫ້ຮູ້ວ່າ: ກ້ວຍຫອມແມ່ນໝາກໄມ້ຊະນິດໜຶ່ງທີ່ມີຫຼາຍຢູ່ໃນບ້ານເຮົາ ແລະນິຍົມບໍລິໂພກກັນຫຼາຍ, ສ່ວນແນວພັນທີ່ຊາວສວນສ່ວນໃຫຍ່ມັກປູກແມ່ນກ້ວຍຫອມ (AAA Gorup) ໃຫ້ຜົນຜະລິດສູງ,ລົດຊາດຫວານຫອມດີ ແລະໝາກໃຫຍ່. ສໍາລັບວິທີການປູກລວມມີຫຼາຍຂັ້ນຕອນຄື: 1) ການກຽມດິນ: ໄຖພວມດິນໃຫ້ເລິກພໍປະມານ 1 ຄັ້ງ ຕາກດິນແລ້ວໄຖພວນ 1-2 ຄັ້ງໃຫ້ດິນຜຸຜຸ່ຍດີ. 2) ກຽມຂຸມປູກ: ໄລຍະປູກລະຫວ່າງແຖວ ແລະ ຕົ້ນຫ່າງກັນປະມານ 2x2 ແມັດ, ຂະໜາດຂຸມປູກກວ້າງ, ຍາວ ແລະເລິກປະມານ 30x30x30 ຊັງຕີແມັດ ແລະຮອງພື້ນຂຸມດ້ວຍດິນປຸຍອິນຊີປະມານ 5 ກິໂລຕໍ່ຂຸມ. 3) ກຽມພັນປູກ: ໃຊ້ໜໍ່ພັນທີ່ສົມບູນປາສະຈາກສັດຕູພືດຄວາມຍາວຂອງໜໍ່ 25-35 ຊັງຕີແມັດ ມີໃບປະມານ 2-3 ໃບ, ວາງໜໍ່ພັນທີ່ກົ້ນພື້ນຂຸມຈັດ ວາງໃຫ້ຕົ້ນທີ່ຕິດຕົ້ນແມ່ຢູ່ໃນທິດທາງດຽວກັນເພື່ອໃຫ້ມີການອອກງອກໄປໃນທິດທາງດຽວກັນ ແລະສະດວກໃນການດູແລຮັກສາຖົມດິນບໍລິເວນຂຸມໃຫ້ແໜ້ນ ແລະປົກຫຸ້ມດ້ວຍເຟືອງ ຫຼືຫຍ້າແຫ້ງແລ້ວຫົດນໍ້າໃຫ້ຊຸ່ມ. 4) ການໃຫ້ນໍ້າ: ຕ້ອງໃຫ້ນໍ້າຢ່າງສະໝໍ່າສະເໝີຕະຫຼອດລະດູປູກເມື່ອໜ້າດິນແຫ້ງຕ້ອງໃຫ້ນໍ້າ (ໂດຍເກັບຕົວຢ່າ ງດິນຈາກຜິວດິນເລິກ 15 ຊັງຕີແມັດກຳເປັນກ້ອນຖ້າແບມືອອກແລ້ວແຕກຊະຄວນໃຫ້ນໍ້າເພີ່ມແກ່ຕົ້ນກ້ວຍ).

   ສ່ວນຂັ້ນຕອນທີ 5) ການໃຫ້ປຸ໋ຍ: ຕ້ອງໃສ່ປຸ໋ຍຄັ້ງທີ 1 ແລະ 2 ເມື່ອຕົ້ນກ້ວຍມີອາຍຸ 1 ແລະ 3 ເດືອນດ້ວຍສູດ 20-10-10 ຫຼື 15-15-15 ຫຼືສູດໃກ້ຄຽງ 125- 250 ກຣາມຕໍ່ຕົ້ນຕໍ່ຄັ້ງ ແລະຄັ້ງ ທີ 3 ແລະ 4 ເມື່ອອາຍຸ 5 ຫາ 7 ເດືອນ ດ້ວຍສູດ 13-13-21 ຫຼື ສູດໃກ້ຄຽງໃນອັດຕາ125-250 ກຣາມຕໍ່ຕົ້ນຕໍ່ຄັ້ງໃສ່ປຸ໋ຍອິນຊີ (ຝຸ່ນ ຄອກ ຫຼື ປຸ໋ຍໝັກ) ປີລະ 1-2 ຄັ້ງ. 6) ການແຕກໜໍ່: ຫຼັງຈາກ ປູກກ້ວຍໄດ້ປະມານ 5 ເດືອນ ໃຫ້ ຕັດແຕ່ງໜໍ່ເພື່ອໃຫ້ຕົ້ນແມ່ມີຄວາມສົມບູນ. 7) ການຄໍ້າຢັນຕົ້ນ: ຕ້ອງໃຊ້ໄມ້ຄໍ້າຢັນ ຫຼືດາມກ້ວຍທຸກຕົ້ນທີ່ອອກປີແລ້ວເພື່ອປ້ອງກັນລຳຕົ້ນຫັກລົ້ມແລະຕະຫຼອດລະດູການຄໍ້າຢັນໃຫ້ຢູ່ໃນສະພາບໝັ້ນຄົງແຂງແຮງ. 8) ການຫຸ້ມເຄືອ ແລະຕັດແຕ່ງຮູບຊົງຂອງໃບ: ການຫຸ້ມເຄືອຈະເຮັດຫຼັງການຕັດປີບໍ່ເກີນ 15 ວັນ ເພື່ອໃຫ້ເປືອກກ້ວຍໃສງາມ ແລະປ້ອງກັນແມງໄມ້ທຳລາຍດ້ວຍຖົງຢາງສີຟ້າແບບເປີດທາງລຸ່ມໄດ້ໂດຍຫຸ້ມທັງເຄືອແລະຫຸ້ມທຸກເຄືອ. ສ່ວນການຕັດແຕ່ງຊົງໃບຄວນຕັດເມື່ອໃບເລີ່ມຫັກກ່ອນທີ່ຈະສຽດສີກັບເປືອກກ້ວຍຫຼັງຈາກນັ້ນກໍ່ເລີ່ມເກັບກ່ຽວ ແລະບໍລິໂພກໄດ້.

------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์