ເສດຖະກິດແຂວງຜົ້ງສາລີ ຈະຂະຫຍາຍຕົວໃນລະດັບ 6,86%

 6ເດືອນຕົ້ນປີຜ່ານມາຄະນະນຳທຸກຂັ້ນ ແລະທຸກພະແນກການ ແຂວງຜົ້ງສາລີ ໄດ້ສຸມໃສ່ໃນການພັດທະນາເສດຖະກິດຢ່າງຮອບດ້ານຕາມທຶນຮອນ ແລະ ທ່າແຮງບົ່ມຊ້ອນຂອງແຂວງໂດຍສະເພາະແມ່ນການຜັນຂະຫຍາຍມະຕິກອງປະຊຸມອົງການປົກຄອງແຂວງຄັ້ງ ທີ 6 ສະໄໝທີ VIII ແລະມະຕິກອງປະຊຸມສະໄໝສາມັນເທື່ອທີ 6 ຊຸດທີ I ຂອງສະພາປະຊາຊົນແຂວງ.

 ທ່ານ ຄຳເຫຼັກ ໃຈອີສານ ຫົວ ໜ້າພະແນກແຜນການ ແລະການລົງທຶນແຂວງ ໄດ້ລາຍງານຕໍ່ກອງປະຊຸມຄົບຄະນະບໍລິຫານງານພັກ ແຂວງຜົ້ງສາລີຄັ້ງທີ 9 ສະໄໝທີ X ທີຈັດຂຶ້ນໃນຕົ້ນເດືອນກໍລະກົດວ່າ: ປະຈຸບັນແຂວງຜົ້ງສາລີມີ 59 ກຸ່ມ, 516 ບ້ານ, 36.434 ຄົວເຮືອນ, ພົນລະເມືອງ186.179 ຄົນໂດຍຕາມການຄາດ ຄະເນປີ 2019 ນີ້ເສດຖະກິດແຂວງຜົ້ງສາລີຂະຫຍາຍຕົວໃນລະດັບ 6,86% (ແຜນການແມ່ນ 6,97%) ຂະແໜງກະສິກຳປ່າໄມ້ເພີ່ມຂຶ້ນ 4,41%; ອຸດສາ ຫະກຳ-ຫັດຖະກຳເພີ່ມຂຶ້ນ 6,81% ແລະການບໍລິການ 9,67%; ສ້າງມູນຄ່າເພີ່ມໄດ້ 1.557 ຕື້ກີບ ທຽບໃສ່ແຜນການຄາດວ່າຈະບັນລຸ 98,67% ໃນນັ້ນຂະ ແໜງກະສິກຳ 767,64 ຕື້ກີບ ກວມ 49,12% ຂອງ GDP; ອຸດສາຫະກຳ-ຫັດຖະກຳ 329,26 ຕື້ກີບ ກວມ 21,14% ຂອງ GDP; ການບໍລິການ 463 ຕື້ກີບ ກວມ 29,74% ຂອງ GDP ແລະລາຍຮັບສະເລ່ຍຈະບັນລຸໄດ້ 957 ໂດລາຕໍ່ຄົນຕໍ່ປີທຽບໃສ່ປີ ຜ່ານມາເພີ່ມຂຶ້ນ 21 ໂດລາ.

   ປັດໄຈທີ່ເຮັດໃຫ້ເສດຖະກິດຂະຫຍາຍຕົວແມ່ນເນື່ອງຈາກຂະແໜງການບໍລິການສາມາດບັນລຸໄດ້ເກີນແຜນເປັນຕົ້ນແມ່ນການຄ້າຂາຍຍົກ-ຂາຍຍ່ອຍ, ການບໍລິການ ພາກລັດ, ລາຍຮັບຈາກຂະແໜງໄປສະນີໂທລະຄົມມະນາຄົມ; ສ່ວນຂະແໜງກະສິກຳ ແລະອຸດສາຫະກຳມີທ່າອຽງຫຼຸດລົງ ໂດຍການຜົນຜະລິດເຂົ້າບັນລຸໄດ້ 16.608 ເຮັກ ຕາ ຜົນຜະລິດໃຫ້ໄດ້ 57.817 ໂຕນ ທຽບໃສ່ແຜນຫຼຸດລົງ0,48% ສະມັດສະພາບສະເລ່ຍ 3,48 ໂຕນ ຕໍ່ເຮັກຕາ ສຳລັບພືດທີ່ເປັນທ່າແຮງຂອງແຂວງແມ່ນອ້ອຍ, ຢາງພາລາ, ໝາກຖົ່ວເບີ, ໝາກກ້ວຍຫອມ ແລະຍອດຊາປອດສານພິດ... ສ່ວນ ສັດລ້ຽງແມ່ນສົ່ງເສີມລ້ຽງປະເພດຄວາຍ, ງົວ, ແບ້, ໝູ ແລະປາຊຶ່ງສາມາດສະໜອງຊີ້ນ ແລະປາບໍລິໂພກພາຍໃນໄດ້ 51, 39%; ທົ່ວແຂວງມີສີນຄ້າໂອດັອບ 8 ລາຍການ,ການນຳເຂົ້າສີນຄ້າບັນລຸ 45,15% ແລະ ການສົ່ງອອກບັນລຸ 53, 34%; ສາມາດຜະລິດພະລັງ ງານໄຟຟ້າພາຍໃນແຂວງໄດ້ 371,96 ລ້ານກິໂລວັດໂມງ, ມີ 3 ແຫ່ງທີ່ຂຸດຄົ້ນຖານຫີນຊົມໃຊ້ພາຍ ໃນ ແລະສົ່ງອອກ ໄດ້11.647 ໂຕນ ປະຕິບັດໄດ້ 18,18%; ທົ່ວແຂວງມີເສັ້ນທາງເຂົ້າເຖິງແລ້ວ 510 ບ້ານກວມ 98,84%; ອອກໃບຕາດິນຖາວອນໄດ້ 11.385; ປະຈຸບັນບ້ານທີ່ສາມາດຊົມໃຊ້ 3G ມີ 194 ບ້ານ, 4G ໄດ້ 74 ບ້ານ, ບ້ານຊົມໃຊ້ໂທລະສັບກວມ 94,92%; ປະຊາກອນທີ່ເຂົ້າເຖີງຄອມພິວເຕີ 4.260 ຄົນ, ເຂົ້າເຖິງອິນເຕີເນັດ 8.427 ຄົນ; ຂຸດຄົ້ນລາຍຮັບໄດ້ທັງໝົດ 28,36 ຕື້ກີບ ບັນລຸ 45,05%, ຍອດເງິນຝາກເຂົ້າທະນາຄານ 579,17 ຕື້ກີບ ແລະປ່ອຍສີນເຊື່ອ 266,77 ຕື້ກີບ.

  ຊຶ່ງຜົນງານທີ່ກ່າວມານັ້ນກໍ່ຍ້ອນພາຍໃນແຂວງມີຄວາມສະຫງົບ ແລະເປັນລະບຽບຮຽບຮ້ອຍ; ມີແຜນການອັນລະອຽດບວກກັບການຊີ້ນຳຢ່າງໃກ້ຊິດຂອງຄະນະນຳທຸກຂັ້ນ ແລະທຸກຂະແໜງການໃຫ້ການຮ່ວມມືພ້ອມກັນຈັດຕັ້ງປະຕິບັດອີກດ້ານໜຶ່ງແຂວງຜົ້ງສາລີແມ່ນມີຊາຍແດນຕິດກັບສສຫວຽດນາມ ແລະ ສປ ຈີນ ທີ່ເປັນຕະ ຫຼາດໃຫຍ່ສົງອອກສິນຄ້າຕ່າງໆ ລວມທັງຍ້ອນຄວາມບຸກບືນຜ່ານຜ່າຂອງບັນດາພະແນກການ ແລະ ເມືອງ, ການສະໜັບສະໜູນ ແລະ ມີສ່ວນຮ່ວມຂອງສັງຄົມຈຶ່ງເຮັດໃຫ້ການພັດທະນາເສດຖະກິດຂອງແຂວງຜົ້ງສາລີໄປຕາມທິດທາງ ແລະຈັງຫວະທີ່ດີ.

 ນອກຈາກ ແຂວງຜົ້ງສາລີຍັງມີສິ່ງທ້າທາຍຫຼາຍຢ່າງທີ່ຕ້ອງໄດ້ບຸກທະລຸຜ່ານຜ່າເປັນຕົ້ນກໍ່ແມ່ນການຄົ້ນຄວ້າວິໄຈຂອງຂະແໜງການທີ່ກ່ຽວຂ້ອງບໍ່ທັນໜັກແໜ້ນ ແລະການສະຫຼຸບລາຍງານຂໍ້ມູນຍັງຊັກຊ້າ, ການວິເຄາະຂໍ້ມູນບໍ່ເລີກເຊີງເທົ່າທີ່ຄວນ; ຄວາມເປັນເຈົ້າການໃນການຈັດຕັ້ງປະຕິບັດບັນດາຕົວເລກຄາດໝາຍຍັງບໍ່ທັນສູງບວກກັບການປະສານງານຂອງຂະແໜງການຕ່າງ ແລະເມືອງຍັງຈຳກັດ; ແບບແຜນການນຳພາ ແລະ ຄວາມສາມາດໃນການຊີ້ນຳຍັງເຮັດບໍ່ທັນໄດ້ດີ; ການປະຕິບັດວຽກ ງານຂອງບາງພະແນກການ, ຂະແໜງການ ແລະ ເມືອງຍັງບໍ່ທັນໄປຕາມແຜນ; ການຈັດຕັ້ງປະຕິບັດທຶນຊ່ວຍເຫຼືອລ້າ ແລະ ທຶນຂອງລັດຍັງເຮັດພໍໃຜພໍລາວບວກກັບຂອດການປະສານງານລະຫວ່າງສູນກາງ ແລະທ້ອງຖິ່ນຍັງບໍ່ກົມກຽວຊຶ່ງເຮັດໃຫ້ມີຄວາມຫຍຸ້ງຍາກໃນການກວດກາປະເມີນຜົນ; ການສົ່ງເສີມທຸລະກິດຂະໜາດກາງ ແລະ ຂະໜາດນ້ອຍບໍ່ທັນແຂງແຮງ ແລະ ແທດເຖິງ; ກົນໄກ, ມາດຕະການ ແລະວິທີການເກັບລາຍຮັບເຂົ້າງົບປະມານຍັງບໍ່ຮັດກຸມເທົາທີ່ຄວນ.

  ເພື່ອເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງນັ້ນທັງແຂວງແມ່ນຊຸກຍູ້ໃຫ້ແຕ່ລະພະແນກການ, ຂະແໜງການ ແລະເມືອງສ້າງແຜນການຈັດຕັ້ງປະ ຕິບັດວຽກງານຂອງຕົນແບບ ບຸກທະລຸ ແລະຊອກແຫຼ່ງທຶນມາຈັດ ຕັ້ງປະຕິບັດ; ເອື້ອອຳນວຍຄວາມ ສະດວກ ແລະຊຸກຍູ້ການຜະລິດຢ່າງແຂງແຮງ; ຜັນຂະຫຍາຍມະ ຕິກອງປະຊຸມໃຫຍ່ຄັ້ງທີ X ຂອງ ພັກ ແລະອົງຄະນະພັກແຂວງ ຖື ເອົາທິດໃນການສ້າງແຂວງເປັນ ຫົວໜ່ວຍຍຸດທະສາດ, ເມືອງເປັນ ຫົວໜ່ວຍເຂັ້ມແຂງຮອບດ້ານ ແລະ ບ້ານເປັນຫົວໜ່ວຍພັດທະນາ; ເພີ່ມ ທະວີການເກັບລາຍຮັບໃຫ້ໄດ້ຕາມ ຄາດໝາຍ ພ້ອມຂະຫຍາຍຖານການເກັບລາຍຮັບໃຫ້ຫລາຍຂຶ້ນ; ສົ່ງເສີມການຜະລິດລະດູແລງ-ລະດູຝົນ; ອົງການປົກຄອງທຸກຂັ້ນ ແລະ ຫົວໜ່ວຍວິສາຫະກິດ, ທຸກ ພາກສ່ວນເສດຖະກິດຕ້ອງປັບປຸງແບບແຜນວິທີເຮັດວຽກຂອງຕົນ; ເພີ່ມທະວີການຊຸກຍູ້ສົງເສີມການ ລົງທຶນພາຍໃນ ແລະຕ່າງປະເທດ ຢ່າງກວ້າງຂວາງ ເພື່ອເຮັດໃຫ້ເສດ ຖະກິດຂອງແຂວງຂະຫຍາຍຕົວໃນລະດັບດີຂຶ້ນກວ່າເກົ່າ.

------------------------

ໂດຍ: ສົມຄິດ ແກ້ວນວນລາ

แชร์