ເມືອງໄຊທານີ ມີຜູ້ຕິດເຊື້ອໄຂ້ຍຸງ 1,2 ພັນຄົນ

  ເມືອງໄຊທານີ ຖືວ່າເປັນເມືອງທີ່ມີການລະບາດພະຍາດໄຂ້ຍຸງລາຍສູງຖ້າທຽບໃສ່ບັນດາເມືອງຂອງນະຄອນຫຼວງວຽງຈັນ ຊຶ່ງມີອັດຕາສ່ວນກວມ 30 ສ່ວນ ຮ້ອຍ ຂອງຈໍານວນໂຕເລກທົ່ວນະຄອນຫຼວງວຽງຈັນ ໃນນັ້ນມີຜູ້ຕິດເຊື້ອໄຂ້ຍຸງລາຍ 1,2 ພັນຄົນ ກວມເອົາ 69 ບ້ານ ແລະມີຜູ້ເສຍຊີວິດແລ້ວ 3 ຄົນ.

  ໃນວັນທີ 27 ກໍລະກົດ 2019, ກະຊວງສາທາລະນະສຸກ ໄດ້ສົມທົບກັບອົງການປົກຄອງນະຄອນຫຼວງວຽງຈັນ ແລະ ເມືອງໄຊທານີນຳພາປະຊາຊົນເປີດຂະ ບວນການທຳລາຍແຫຼ່ງເພາະພັນໜອນນໍ້າຍຸງລາຍຢູ່ບ້ານໄຊສົມບູນ ເມືອງໄຊທານີ ໂດຍມີທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກພ້ອມດ້ວຍຜູ້ຕາງໜ້າກົມ, ພະແນກການອ້ອມຂ້າງ, ບັນດາຫ້ອງເມືອງ, ພະນັກງານວິຊາການອາສາສະໝັກຕະຫຼອດຮອດປະຊາຊົນພາຍໃນບ້ານເຂົ້າຮ່ວມ.

  ທ່ານ ບຸນວັນ ຈະສົ້ວເກົ້າ ຮອງເຈົ້າເມືອງໄຊທານີ ໄດ້ລາຍງານໃຫ້ຮູ້ວ່າ: ໃນປີ 2019 ນີ້ ທົ່ວເມືອງໄຊທານີມີຜູ້ຕິດເຊື້ອໄຂ້ຍຸງ 1.200 ຄົນ, ກວມເອົາ 69 ບ້ານ ແລະມີຜູ້ເສຍຊີວິດແລ້ວ 3 ຄົນ ຊຶ່ງມີອັດຕາສ່ວນກວມ 30 ສ່ວນຮ້ອຍ ຂອງຈໍານວນໂຕເລກທົ່ວນະຄອນຫຼວງວຽງຈັນ ແລະເປັນເມືອງທີ່ມີໂຕເລກສູງທີ່ສຸດຖ້າທຽບໃສ່ໃນ 9 ເມືອງ; ສະເພາະບ້ານໄຊສົມບູນນີ້ມີໂຕເລກຜູ້ເປັນພະຍາດໄຂ້ຍຸງ 95 ກໍລະນີ ເຊິ່ງບັນດາປັດໄຈສ່ຽງທີ່ກໍ່ໃຫ້ເກີດການແຜ່ລະບາດແມ່ນເນື່ອງຈາກເມືອງແມ່ນມີພື້ນທີ່ກວ້າງຂວາງປະຊາກອນຫຼາຍກວມເອົາ 30% ຂອງປະຊາກອນໃນທົ່ວນະຄອນຫຼວງວຽງຈັນ ແລະ ກໍ່ມີການເຄື່ອນຍ້າຍປະຊາ

ກອນເປັນປະຈຳແຕ່ເໜືອຮອດໃຕ້ເຮັດໃຫ້ມີຄວາມສ່ຽງຕໍ່ການນຳເຊື້ອພະຍາດ, ແຜ່ ລະບາດຂະຫຍາຍໄວ ແລະຄວບຄຸມຍາກແຕ່ທາງເມືອງກໍ່ໄດ້ເອົາໃຈໃສ່ໃນການປຸກລະດົມເພື່ອປ້ອງກັນ, ແກ້ໄຂ ແລະມີການປິ່ນປົວໂດຍໄດ້ມີການລົງຕິດຕາມ ແລະສົມທົບກັບບ້ານໃນການລົງປະຕິບັດ 5 ປ ແບບຕະລຸມບອນເພື່ອເຮັດໃຫ້ປະຊາຊົນໄດ້ຮັບຮູ້ຂໍ້ມູນ ແລະເປັນເຈົ້າການມີສ່ວນຮ່ວມໃນການເຮັດອະນາໄມທຳຄວາມສະອາດ, ທໍາລາຍແຫຼ່ງເພາະພັນໜອນນໍ້າຍຸງລາຍເພື່ອສະກັດກັ້ນການເກີດພະຍາດໄຂ້ຍຸງລາຍ ຊຶ່ງຜ່ານການປະຕິບັດກໍ່ເຫັນໄດ້ວ່າ ມີທ່າອ່ຽງຫຼຸດລົງ ແລະໃນຕໍ່ໜ້າຍັງຈະ ໄດ້ສືບຕໍ່ເອົາໃຈໃສ່ປຸກລະດົມໃຫ້ປະຊາຊົນເຂົ້າໃຈຕໍ່ຜົນຮ້າຍຄວາມອັນຕະລາຍຂອງພະຍາດໄຂ້ຍຸງລາຍເພື່ອໃຫ້ວຽກຕອບໂຕ້ກາຍເປັນວຽກຂອງຊຸມຊົນ ແລະເຮັດໃຫ້ວຽກງານ 5 ປ ກາຍເປັນຂະບວນການທີ່ມີປະສິດທິຜົນ ແລະທໍາລາຍແຫຼ່ງເພາະພັນຂອງຍຸງລາຍໃຫ້ໝົດໄປຢ່າງສິ້ນເຊີງ.

  ນອກຈາກນັ້ນບັນດາການນຳພ້ອມດ້ວຍຄະນະຕະຫຼອດຮອດພາກສ່ວນກ່ຽວຂ້ອງກໍ່ໄດ້ລົງສຳຫຼວດໂຕຈິງຈຸດແຫຼ່ງເພາະພັນໜອນນໍ້າຍຸງລາຍຕາມເຮືອນຊານບ້ານຊ່ອງຂອງປະຊາຊົນເພື່ອທຳລາຍ ແລະ ສະກັດກັ້ນບໍ່ໃຫ້ມີການລະບາດຂອງພະຍາດພ້ອມທັງໄດ້ປຸກລະດົມແນະນຳປະຊາຊົນໃຫ້ຮູ້ວິທີປ້ອງກັນ ແລະ ສະກັດກັ້ນການລະບາດຂອງພະຍາດໄຂ້ຍຸງລາຍຢ່າງຖືກຕ້ອງ, ພ້ອມທັງມີສ່ວນຮ່ວມເປັນເຈົ້າການດ້ວຍຕົນເອງ.

---------------------

ພາບ ແລະຂ່າວຈາກ: ໜັງສືພີມເສດຖະກິດ-ສັງຄົມ

แชร์