ຫັດຖະກຳຮຸ່ງຈະເລີນ ນຳສິນຄ້າຫຼາຍສີບລາຍການຮ່ວມງານວາງສະແດງຜະລິດຕະພັນໄມ້ລາວຄັ້ງທີ 5

    ງານວາງສະແດງຜະລິດຕະພັນໄມ້ລາວຄັ້ງທີ 5 ປະຈຳປີ 2019 ຈະເປີດຂຶ້ນຢ່າງເປັນທາງໃນວັນທີ 14 ມັງກອນ ແຕ່ງານໄດ້ເລີ່ມມາແຕ່ວັນທີ 12 ມັງກອນ ໄປຈົນຮອດວັນທີ 20 ມັງກອນ 2019 ໂດຍມີຫຼາຍສິບຫົວໜ່ວຍນຳສິນຄ້າສວຍງາມເຂົ້າຮ່ວມໜຶ່ງໃນນັ້ນກໍແມ່ນຮ້ານຫັດຖະກຳຮຸ່ງຈະເລີນທີ່ໄດ້ນຳເອົາສິນຄ້າຂອງຮ້ານເຂົ້າຮ່ວມເພື່ອສ້າງສີສັນກໍຄືເປີດເປີດໂອກາດໃຫ້ລູກໄດ້ເລືອກຊື້ຕາມໃຈມັກ.

  ທ່ານ ບຸນຖອງ ຫຼວງໂຄດ ເຈົ້າຂອງຮ້ານຫັດຖະກຳຮຸ່ງຈະ ເລີນເປີດເຜີຍຕໍ່ທີມງານໜັງສືພິມເສດຖະກິດ-ສັງຄົມວ່າ: ຮ້ານຫັດຖະກຳຮຸ່ງຈະ ເລີນໄດ້ຮັບການສ້າງຕັ້ງຂຶ້ນໃນປີ 2011 ເພື່ອຜະລິດສິນຄ້າຫັດຖະກຳຈາກໄມ້ເປັນການສ້າງມູນຄ່າເພີ່ມໃຫ້ກັບໄມ້ເສດທີ່ບໍ່ນຳໃຊ້ແລ້ວໃຫ້ກາຍມາເປັນໄມ້ທີ່ສວຍງາມມີລາຄາແພງຕາມແຕ່ລະລັກສະນະຂອງສິນຄ້າເປັນຕົ້ນແມ່ນປູດໄມ້, ຮາກໄມ້ ແລະອື່ນໆທີ່ສາມາດສ້າງຄວາມເພີ່ງພໍໃຈແກ່ລູກຄ້າພາຍໃນ ແລະຕ່າງປະເທດທີ່ມາສິນຄ້າພາຍໃນຮ້ານທີ່ປະຈຸບັນມີຢູ່ບ້ານອາກາດ (ທາງເຕ 2); ນາຄາຊີຕີ້ແຄມຂອງສວນເຈົ້າອະ ນຸວົງ ແລະຫຼັກ 29 ບ້ານຫ້ວຍນ້ຳ ເຢັນ ນະຄອນຫຼວງວຽງຈັນ.

 ທ່ານ ບຸນຖອງ ຫຼວງໂຄດ ເປີດເຜີຍຕື່ມວ່າ: ເພື່ອເປັນການເປີດໂອກາດໃຫ້ກັບລູກຄ້າໄດ້ເລືອກຊື້ເລືອກຫາສິນຄ້າຂອງຮ້ານໄດ້ຢ່າງສະດວກຂຶ້ນພາຍໃນງານວາງສະແດງຜະລິດຕະພັນໄມ້ລາວຄັ້ງທີ 5 ປະຈຳປີ 2019 ທາງຮ້ານກໍໄດ້ນຳສິນຄ້າສວຍງາມຫຼາຍສິບລາຍການເຂົ້າຮ່ວມວາງສະແດງລວມມູນຄ່າ 300 ລ້ານກວ່າກີບ ໃນນີ້ຄາດວ່າສິນຄ້າທັງໝົດທີ່ນຳຮ່ວມງານຈະໄດ້ຂາຍປະມານ 70% ຈາກຜູ້ຄົນທີ່ຄາດວ່າຈະມາຮ່ວມງານທັງໝົດ 2 ແສນກວ່າຄົນ.

  ແນວໃດກໍດີຕາມຂໍ້ມູນຈາກຄະນະຈັດງານຮູ້ວ່າ: ງານຄັ້ງນີ້ແມ່ນຈັດຂຶ້ນທີ່ສູນການຄ້າລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນຊຶ່ງຈຸດປະສົງຂອງການຈັດງານກໍເພື່ອສົ່ງເສີມການຜະລິດເຄື່ອງເຟີນິເຈີໄມ້ລາວທັງເປັນການໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ຜະລິດຕະພັນເພີນິເຈີໄມ້ລາວຫຼາຍຂຶ້ນໃຫ້ຜູ້ຜະລິດສາມາດເຂົ້າເຖິງຕະຫຼາດຈຳໜ່າຍສິນຄ້າໄດ້ທັງພາຍໃນ ແລະ ຕ່າງປະເທດກ້າວເຂົ້າໄປສູ່ການສ້າງຕາ ໜ່າງວາງ ສະແດງ-ຂາຍສິນຄ້າເພີນິເຈີກັບພາກພື້ນ ແລະສາກົນໄດ້ໃນອະນາຄົດ.

  ຕະຫຼອດງານຈະໄດ້ພົບກັບຄວາມພິເສດທີ່ແຕກຕ່າງຈາກຄັ້ງກ່ອນໆເປັນຕົ້ນແມ່ນການອອກແບບ ແລະຮູບຊົງຈາກຫຼາຍໂຮງງານ, ລາຄາບໍ່ແພງ, ມີສິນຄ້າໂອດັອບ, ພ້ອມດຽວກັນນັ້ນຍັງຈະມີກິດຈະກຳສົມມະນາບຸນຄຸນແກ່ລູກຄ້າທີ່ມາຊື້ພາຍໃນງານຫຼາກຫຼາຍໂດຍຄາດວ່າມູນຄ່າທີ່ນຳມາວາງສະແດງຄັ້ງນີ້ປະມານ 20 ຕື້ກີບ ໃນນີ້ຈະໄດ້ຂາຍປະມານ 70% ຈາກລູກຄ້າທີ່ມາທ່ຽວຊົມງານທັງໝົດປະມານ 2 ແສນກວ່າຄົນ.

  ປະຈຸບັນນີ້ຜູ້ປະກອບການໄດ້ເຂົ້າມາຈັບຈອງພື້ນທີ່ເພື່ອວາງຂາຍສິນຄ້າແລ້ວຈຳນວນທັງໝົດ 181 ຫ້ອງມາຈາກ 77 ຫົວໜ່ວຍໃນນີ້ມາ ຈາກຕ່າງແຂວງ 16 ຫົວໜ່ວຍ, ປະເທດໄທ 5 ຫົວໜ່ວຍເຫຼືອນັ້ນແມ່ນມາຈາກນະຄອນຫຼວງວຽງຈັນ ນອກຈາກນັ້ນພາຍໃນງານຍັງຈະມີຫຼາກຫຼາຍກິດຈະກຳທີ່ໜ້າສົນໃຈເປັນຕົ້ນແມ່ນງານຈົກສະຫຼາກຊິງລາງວັນ, ງານສະແດງສິລະປະດົນຕີຈາກນັກຮ້ອງຄົນດັງພາຍໃນ ແລະຕ່າງປະເທດໃນແຕ່ລະຄ່ຳຄືນ ແລະອື່ນໆອີກທີ່ຈະສາມາດສ້າງຄວາມເບີກບານມ່ວນຊື່ນໄດ້ຕະຫຼອດງານ.

แชร์