ເຊກອງມີຜູ້ເສຍຊີວິດຈາກອຸບັດຕິເຫດ 13 ຄົນ

 ປະຈຸບັນພັກ-ລັດຖະບານໄດ້ລົງທຶນຢ່າງຫຼວງຫຼາຍເຂົ້າໃນການພັດທະນາປະເທດຊາດໃຫ້ຈະເລີນຮຸ່ງເຮືອງ, ເວົ້າສະເພາະຢູ່ແຂວງເຊກອງ ກໍພວມໄດ້ຮັບການພັດທະນາດ້ານພື້ນຖານໂຄງລ່າງໂດຍສະເພາະແມ່ນການກໍ່ສ້າງສໍານັກງານ, ອົງການ,ຫ້ອງການ,ຖະໜົນຫົນທາງບາງບ່ອນກໍໄດ້ຮັບການກໍ່ສ້າງຂຶ້ນໃໝ່ ແລະຂະຫຍາຍອອກຢ່າງຫຼວງຫຼາຍ, ບາງສາຍກໍໄດ້ຮັບການສ້ອມແປງຄືນເພື່ອເຮັດໃຫ້ການສັນຈອນໄປ-ມາຫາສູ່ກັນໄດ້ຢ່າງສະດວກສະບາຍຂຶ້ນກວ່າເກົ່າ.

  ຄຽງຄູ່ກັບການຂະຫຍາຍຕົວຂອງຖະໜົນຫົນທາງນັ້ນ, ຍານພາຫະນະທຸກປະເພດກໍມີລັກສະນະເພີ່ມຂຶ້ນຢ່າງຫຼວງຫຼາຍເຊັ່ນດຽວກັນ, ອັນໄດ້ເຮັດໃຫ້ການສັນຈອນໄປ-ມາບາງຄັ້ງພົບຄວາມຫຍຸ້ງຍາກສັບສົນ,ຜູ້ຂັບຂີ່ຍານພາຫະນະຕາມຖະໜົນຫົນທາງບາງຄົນພັດຍັງບໍ່ທັນເປັນເຈົ້າການໃນການປະຕິບັດກົດລະບຽບການສັນຈອນເປັນຕົ້ນອາຍຸກະສຽນບໍ່ທັນເຖິງ,ສະພາຍເຕັກນິກລົດບາງຄົນກໍບໍ່ດີ, ຂັບຂີ່ລົດໃນເວລາມືນເມົາ, ແລ່ນລົດໄວເກີນຂອບເຂດ ແລະອື່ນໆນີ້ແມ່ນສ່ວນໜຶ່ງທີ່ພາໃຫ້ອຸບັດເຫດເກີດ ຂຶ້ນບໍ່ເວັ້ນໃນແຕ່ລະວັນຊຶ່ງບັນຫາດັ່ງກ່າວໄດ້ສ້າງຄວາມສູນເສຍທາງດ້ານຊີວິດ, ຊັບສິນ, ສຸຂະພາບ ແລະອື່ນໆຢ່າງຫຼວງຫຼາຍມາສູ່ຕົນເອງ.

  ຕາມການລາຍງານຂອງ ທ່ານ ພັນເອກ ແຄນທອງ ປືມມະນີ ຮອງຫົວໜ້າກອງບັນຊາການ ປກສ ແຂວງເຊກອງ ໃຫ້ຮູ້ວ່າ: ໃນ 6 ເດືອນຕົ້ນປີ 2019 ນີ້ ແຂວງເຊກອງມີອຸບັດເຫດເກີດຂຶ້ນທັງໝົດ 68 ລາຍທຽບໃສ່ປີ 2018 ຫຼຸດລົງ 3 ລາຍ, ໃນນີ້ມີຜູ້ເສຍຊີວິດ 13 ຄົນ ທຽບໃສ່ປີ 2018 ເພີ່ມຂຶ້ນ 2 ຄົນ ໂດຍການເກີດອຸບັດ ເຫດສ່ວນໃຫຍ່ແມ່ນຍ້ອນນັກຂັບຂີ່ຈໍານວນໜຶ່ງຍັງບໍ່ປະຕິບັດຕາມກົດລະບຽບຈະລາຈອນຢ່າງເຂັ້ມງວດເປັນຕົ້ນແມ່ນການດື່ມສິ່ງມືນເມົາແລ້ວຂັບຂີ່ລົດໄວ, ບໍ່ໃຫ້ກຽດເຊິ່ງກັນ ແລະກັນ, ຂັບຂີ່ລົດເປັນພືງເປັນແພ, ປ່ຽນທິດທາງເດີນ, ແຊງບໍ່ຮັບປະກັນ ແລະສາເຫດອື່ນໆ.

  ສ່ວນບັນຫາຢາເສບຕິດ, ທ່ານ ພັນເອກ ແຄນທອງ ປືມມະນີ ຮອງຫົວໜ້າກອງບັນຊາການ ປກສ ແຂວງເຊກອງ ກ່າວວ່າ: ໃນ6 ເດືອນຜ່ານມາເກີດຂຶ້ນທັງໝົດ 23 ເລື່ອງທຽບໃສ່ 6 ເດືອນທ້າຍປີ 2018 ຫຼຸດລົງ 6 ເລື່ອງ, ກັກຕົວຜູ້ຖືກຫາໄດ້ 23 ຄົນແລະຢຶດຂອງກາງປະເພດຢາໄອໄດ້ 0,707 ກຣາມ ແລະຢາບ້າ 7.401 ເມັດ.

---------------------

ຂຽນໂດຍ: ສັນຍາ

ພາບ ແລະຂ່າວຈາກ: ໜັງສືພີມເສດຖະກິດ-ສັງຄົມ

แชร์