ແຜນການ-ການເງິນ ຕ້ອງສຸມໃສ່ແກ້ໄຂ 6 ບັນຫາຄົງຄ້າງ

 ເພື່ອເປັນທິດທາງໃນການແກ້ໄຂບັນຫາຂໍ້ຄົງຄ້າງທັງເຮັດໃຫ້ວຽກງານແຜນການ ແລະການລົງທຶນ, ການເງິນ-ງົບປະມານ ແລະນະໂຍບາຍເງິນຕາມີການຫັນປ່ຽນທີ່ຕັ້ງໜ້າ ແລະປະກອບສ່ວນສໍາຄັນເຂົ້າໃນການພັດທະນາລວມຂອງປະເທດ, ທ່ານ ທອງລຸນ ສີສຸລິດ ນາຍົກລັດຖະ ມົນຕີ ໄດ້ເນັ້ນໃຫ້ຂະແໜງການດັ່ງກ່າວສຸມໃສ່ແກ້ໄຂ 6 ບັນຫາທີ່ເປັນຂໍ້ຫຍຸ້ງຍາກ ແລະ ຄົງຄ້າງໃນການຈັດຕັ້ງປະຕິບັດວຽກງານແຜນ ການ-ການເງິນໃນປີ 2018 ຜ່ານມາ. 

  ກອງປະຊຸມການຈັດຕັ້ງປະຕິບັດວຽກງານແຜນການ-ການເງິນໃນປີ 2018 ໄດ້ຈັດຂຶ້ນໃນຕົ້ນອາທິດຜ່ານມາເພື່ອສະຫຼຸບຕີລາຄາການຈັດ ຕັ້ງປະຕິບັດວຽກງານໃນປີ 2018, ຊຶ່ງເສດຖະກິດສືບຕໍ່ຂະຫຍາຍຕົວໃນລະດັບ 6,5%, ລວມຍອດຜະລິດຕະພັນພາຍໃນສະເລ່ຍຕໍ່ຄົນບັນ ລຸ 2.599 ໂດລາສະຫະລັດ, ການຈັດຕັ້ງປະຕິບັດແຜນງົບປະມານແຫ່ງລັດໄດ້ທັງໝົດ 99,23% (ລວມທຶນ ODA), ສ່ວນດ້ານລາຍຈ່າຍປະຕິບັດໄດ້ 97,10% ຂອງແຜນການປີ.

  ໃນໂອກາດ ທ່ານ ນາຍົກລັດ ຖະມົນຕີໃຫ້ກຽດເຂົ້າຮ່ວມໂອ້ລົມກອງປະຊຸມທ່ານໄດ້ຕີລາຄາການຈັດຕັ້ງປະຕິບັດວຽກງານແຜນການ-ການເງິນ ໃນປີ 2018 ໂດຍເນັ້ນໃຫ້ວຽກງານແຜນການ ແລະ ການລົງທຶນ, ການເງິນ-ງົບປະມານ ແລະ ນະໂຍບາຍເງິນຕາສຸມໃສ່ແກ້ໄຂ 6 ບັນ ຫາທີ່ຄົງຄ້າງໃນການຈັດຕັ້ງປະຕິບັດວຽກງານແຜນການ-ການເງິນປະຈໍາປີ 2018 ຄື: 1) ການເຕີບໂຕທາງດ້ານເສດຖະກິດເຖິງຈະສືບຕໍ່ເຕີບໂຕຢ່າງຕໍ່ເນື່ອງແຕ່ກໍຕໍ່າກວ່າແຜນການທີ່ວາງໄວ້ ແລະຕໍ່າກວ່າຈັງຫວາການເຕີບໂຕໃນປີຜ່ານມາ ແລະ ສິ່ງທີ່ໜ້າເປັນຫວ່ງກວ່ານັ້ນ ຄືພື້ນຖານຫົວໜ່ວຍທຸລະກິດຍັງບໍ່ທັນເຂັ້ມແຂງ ແລະຍັງມີຂໍ້ຈໍາກັດໃນການສ້າງເປັນຖານລາຍຮັບທີ່ແນ່ນອນເຮັດໃຫ້ການເພີ່ມຂຶ້ນຂອງ ລາຍຮັບງົບປະມານບໍ່ທັນມີຄວາມໝັ້ນທ່ຽງສ່ວນຫຼາຍຍັງອີງໃສ່ຊັບພະຍາກອນທໍາມະຊາດເປັນຕົ້ນຕໍ; 2) ການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດຍັງຊັກຊ້າໂດຍສະເພາະມາດຕະຖານປັບປຸງສະພາບແວດລ້ອມ ແລະ ອໍານວຍຄວາມສະດວກໃນການດໍາເນີນທຸລະກິດ, ມາດຕະການພັດທະນາ SME, ການສົ່ງເສີມການຜະລິດຢູ່ພາຍໃນປະເທດ, ມາດຕະການແກ້ໄຂໜີ້ສິນພາຍໃນໂດຍສະເພາະການແກ້ໄຂໜີ້ສິນໂຄງການລົງທຶນຂອງລັດດ້ວຍການຈັດສັນງົບປະມານເຂົ້າແຜນແຕ່ລະປີ ແລະແກ້ໄຂດ້ວຍຮູບແບບອວ່ານໜີ້ 3 ແຈຍັງບໍ່ທັນມີປະສິດ ທິຜົນເທົ່າທີ່ຄວນຊຶ່ງບັນຫາທີ່ພົບໃນປະຈຸບັນຍ້ອນບໍ່ມີເງິນກ້ອນເພື່ອອັດສີດເຂົ້າສູ່ລະບົບເສດຖະກິດ ແລະແກ້ໄຂໜີ້ສິນຕົວຈິງ. 3) ການ ພັດທະນາຊົນນະບົດ ແລະແກ້ໄຂຄວາມທຸກຍາກຍັງບໍ່ທັນເຮັດໄດ້ເຖິງຮາກຖານເຮັດໃຫ້ການພັດທະນາລວມທັງລາຍຮັບຂອງປະຊາຊົນຢູ່ໃນເຂດຕົວເມືອງ ແລະ ຊົນນະບົດຍັງມີຄວາມແຕກໂຕນກັນຫຼາຍ.

 ສໍາລັບບັນຫາທີ 4) ແມ່ນການເກັບລາຍຮັບງົບປະມານມີທ່າອ່ຽງດີຂຶ້ນແຕ່ຍັງບໍ່ສາມາດເກັບໄດ້ຢ່າງຄົບຖ້ວນເພາະການຫັນເປັນທັນສະໄໝຍັງບໍ່ສາມາດຄວບຄຸມໄດ້ທຸກຂົງເຂດທຸກພື້ນທີ່ເຮັດໃຫ້ການຂາດດູນງົບປະມານຍັງສູງ ແລະ ສະພາບຄ່ອງທາງດ້ານເສດຖະກິດ-ງົບປະມານ ຍັງເປັນສິ່ງທ້າທາຍ.5) ການຄຸ້ມຄອງການລົງທຶນໂຄງການຂະໜາດໃຫຍ່ພັດທະນາພື້ນຖານໂຄງລ່າງຍັງບ່ໍທັນມີຄວາມຄືບໜ້າເປັນຕົ້ນ ແມ່ນຂະແໜງໄຟຟ້າ, ບໍ່ແຮ່, ສ່ວນຂະແໜງການບໍລິການຍັງບໍ່ທັນປະກອບສ່ວນຢ່າງແຂງແຮງຕໍ່ການເຕີບໂຕເສດຖະກິດ ແລະ ການສ້າງ ລາຍຮັບແກ່ງົບປະມາແຫ່ງລັດ. 6) ການຂາດດູນການຊໍາລະສະສາງເງິນຕາກັບຕ່າງປະເທດຍັງສູງ ແລະປະລິມານຄັງສໍາຮອງເງິນຕາຕ່າງປະເທດຍັງຕໍ່າເຮັດໃຫ້ເສດຖະກິດມະຫາພາກຍັງມີຄວາມບອບບາງ.

แชร์