ໂຮງໝໍເມືອງໝອກຮັບອຸປະກອນການແພດ

  ເພື່ອອໍານວຍຄວາມສະດວກໃນການບົ່ງມະຕິພະຍາດ ແລະປິ່ນປົວຄົນເຈັບໃຫ້ມີຄວາມວ່ອງໄວ ແລະມີປະສິດທິພາບດີຂຶ້ນ ແລະເພື່ອເປັນການຕອບສະໜອງຄວາມຮຽກ ຮ້ອງຕ້ອງການຂອງວຽກງານການປິ່ນປົວພະຍາດຢູ່ໂຮງໝໍ ແລະ ສຸກສາລາໃຫ້ນັບມື້ມີຄວາມສະດວກທັງຮັບປະກັນທາງດ້ານຄຸນນະພາບດີຂຶ້ນຢ່າງບໍ່ຢຸດຢັ້ງ, ວັນທີ 26 ກໍລະກົດຜ່ານມາທີ່ຫ້ອງການສາທາລະນະສຸກ ເມືອງໝອກ ແຂວງຊຽງຂວາງສະຫະພາບເອີຣົບ ແລະລຸກຊໍາບວກມອບຮ່ວມກັບພະແນກສາທາລະນະສຸກເມືອງໝອກ ໄດ້ຈັດພິທີມອບ-ຮັບອຸປະກອນການແພດໃຫ້ສຸກສາລາ ແລະໂຮງໝໍເມືອງໝອກ.

  ເປັນກຽດມອບ-ຮັບໂດຍ ທ່ານ ດຣ ມິ່ງຂວັນໃຈ ຕອມໝັ້ນຍາ ຫົວໜ້າຂະແໜງປິ່ນປົວພະແນກສາທາລະນະສຸກ ແຂວງຊຽງຂວາງ ແລະ ທ່ານ ຄໍາແພງ ໄຊຍະຜອງ ຮອງເຈົ້າເມືອງໆໝອກ, ມີທ່ານ ແກ້ວພູທອນ ກິດຕິພັນ ຜູ້ປະສານງານອົງການແຄຣີຕັສ ລຸກຊໍາບວກ ປະຈໍາລາວພ້ອມດ້ວຍຄະນະ, ມີບັນດາອໍານວຍການໂຮງໝໍເມືອ ງ, ຫົວໜ້າຫ້ອງການສາທາລະນະສຸກເມືອງ ແລະພະນັກງານພາຍໃນຫ້ອງການເຂົ້າຮ່ວມ.

 ສໍາລັບອຸປະກອນທີ່ນໍາມາມອບໃນຄັ້ງນີ້ປະກອບມີ: ເຄື່ອງວິໄຈ 18 ປາຣາແມັດ 1 ເຄື່ອງ, ເຄື່ອງວັກແທກນໍ້າຕານໃນເລືອດ 4 ເຄື່ອງ, ຊຸດກັນເປື້ອນສໍາລັບຫ້ອງວິເຄາະ 11 ຊຸດ, ເຄື່ອງສະເປັກໂຕອ່ານຍ່ຽວ 11 ທາດ 1 ເຄື່ອງ, ເຄື່ອງປັ່ນເລືອດ 1 ເຄື່ອງ, ເຄື່ອງແທກຄວາມດັນເລືອດເດັກນ້ອຍ 4 ເຄື່ອງ, ເຄື່ອງວັດອົກຊີແຊນໃນເລືອດ ຜູ້ໃຫຍ່ ແລະ ຜູ້ນ້ອຍ 3 ເຄື່ອງ, ຄ້ອນເຄາະກວດ 3 ອັນ, ລໍ້ຍູ້ຄົນເຈັບຊະນິດ ແບບນອນ 1 ໜ່ວຍ, ບັ້ງໃສ່ຄີມ 3 ບັ້ງ, ບັ້ງອົກຊີໃຫຍ່ພ້ອມຫົວເກ 3 ບັ້ງ, ຕຽງນອນ ຄົນເຈັບ 2 ໜ່ວຍ, ໄຟເຍືອງກວດປະສູດ 3 ອັນ ແລະເຄື່ອງດູດຂີ້ສະເຫຼດ 4 ເຄື່ອງ ລວມມູນຄ່າທັງໝົດ 125 ລ້ານກວ່າກີບ.

----------------------

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์