ພາສີດ່ານສາກົນວັງເຕົ່າຈະສູ້ຊົນເກັບລາຍຮັບບັນລຸເປົ້າໝາຍ

  ສະພາບການຂະຫຍາຍຕົວຊ້າຂອງເສດຖະກິດກໍ່ຕາມແຕ່ໃນ 6 ເດືອນ ທ້າຍປີນີ້ພາສີດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ຈະສູ້ຊົນເຮັດໃຫ້ການຈັດເກັບລາຍຮັບເຂົ້າງົບປະມານຂອງລັດໃຫ້ໄດ້ຕາມຄາດໝາຍທີ່ວາງໄວ້.

ຕິດຕາມການໃຫ້ສໍາພາດຂອງ ທ່ານ ວິເລືອງ ວໍລະບຸດ ຫົວໜ້າພາສີດ່ານສາກົນວັງເຕົ່າຕໍ່ນັກຂ່າວໜັງສືພິມເສດຖະກິດ-ສັງຄົມ ປະຈໍາແຂວງເມື່ອບໍ່ດົນມານີ້ໃຫ້ຮູ້ວ່າ: ເພື່ອຮັບປະກັນໃຫ້ບັນລຸຕົວເລກແຜນການ ຫຼືລື່ນແຜນໃນການຈັດຕັ້ງປະຕິບັດການເກັບລາຍຮັບ, ເພື່ອເຮັດໃຫ້ກົງຈັກວຽກງານພາສີໃຫ້ມີຄວາມເຂັ້ມແຂງ ແລະ ທ່ວງທັນກັບສະ ພາບການໃນປະຈຸບັນທີ່ທັນສະໄໝພາສີດ່ານສາກົນວັງເຕົ່າຂອງພວກເຮົາຕ້ອງໄດ້ເອົາໃຈໃສ່ທາງດ້ານວິຊາສະເພາະຢ່າງເຂັ້ມງວດ, ໃນ 6 ເດືອນທ້າຍປີ 2019 ນີ້ ແມ່ນຈະໄດ້ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ-ພະນັກງານລັດຖະກອນຢ່າງຕໍ່ເນື່ອງ ແລະເປັນປົກກະຕິທີ່ຕິດພັນກັບຄວາມຮັບຜິດຊອບ, ເອົາ ໃຈໃສ່ສຶກສາອົບຮົມຄວາມຮູ້ທາງດ້ານເຕັກນິກເຄື່ອງມືທັນສະໄໝເຂົ້າໃສ່ໃນວຽກງານວິຊາສະເພາະ, ສືບຕໍ່ໂຄສະນາເຜີຍແຜ່ກົດໝາຍ-ນິຕິກໍາຕ່າງໆທີ່ກ່ຽວຂ້ອງພົວພັນກັບວຽກງານພາສີໃຫ້ທົ່ວເຖິງຕໍ່ນັກທຸລະກິດ, ຜູ້ປະກອບການໃຫ້ໄດ້ຮັບຮູ້ ແລະເຂົ້າໃຈຢ່າງກວ້າງຂວາງ, ປະສານສົມທົບກັບຂະແໜງການກ່ຽວຂ້ອງ ແລະອໍານາດການປົກຄອງທ້ອງຖິ່ນໃຫ້ກົມກຽວທັງວຽກພັກ ແລະວຽກລັດໃຫ້ມີຄວາມສາມັກຄີໜັກແໜ້ນ.

  ຕົວເລກແຜນການທີ່ຄາດຄະເນວ່າຕາມໝວດສິນຄ້າຄື: ຄ່າຊັກພິເສດ, ການນໍາເຂົ້ານໍ້າມັນເຊື້ອໄຟ, ນໍາເຂົ້າພາຫະນະ, ຊິ້ນສ່ວນອາໄຫຼ່, ວັດຖຸກໍ່ສ້າງ, ເຄື່ອງໃຊ້ໄຟຟ້າ, ເຄື່ອງບໍລິໂພກ-ອຸປະໂພກ, ສົ່ງເສີມການລົງທຶນ, ສິນຄ້ານໍາເຂົ້າສົ່ງອອກ, ປັບໃໝ-ຂາຍເຄື່ອງ, ຄ່າທໍານຽມຂາເຂົ້າ-ອອກຕ່າງປະເທດ, ທໍານຽມຄັງແຮ ແລະ ສິນຄ້າອື່ນໆ, ຈະຈັດເກັບລາຍຮັບທັງໝົດເຂົ້າງົບປະມານລັດ 318 ກວ່າຕື້ກີບ.

----------------------

ຂຽນໂດຍ: ໂພທິຣາຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 30/07/2019