ລາວຈະມີສູນບໍລິການໃຫ້ຄຳປຶກສາຄວາມປອດໄພລະບົບເຕັກໂນໂລຊີຂໍ້ມູນຂ່າວສານ

   ວັນທີ 25 ກໍລະກົດ 2019 ທີ່ນະຄອນຫຼວງວຽງຈັນໄດ້ມີພິທີເຊັນສັນຍາຮ່ວມມືສ້າງສູນບໍລິການໃຫ້ຄຳປຶກສາດ້ານຄວາມປອດໄພຂອງລະບົບເຕັກໂນໂລຊີຂໍ້ມູນຂ່າວສານ ໂດຍການລົງນາມຂອງ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕອລ ແລະ ທ່ານ ວົງພູທອນ ສີຈັນທະລາດ ປະທານບໍລິສັດ ເຈແອວເອສ ໄອທີ ໂຊລູເຊີ້ນ ຈຳກັດ. ເຂົ້າຮ່ວມມີທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ (ກວຕ) ແລະບັນດາທ່ານຮອງລັດຖະມົນຕີ, ຫົວໜ້າຫ້ອງການ, ກົມ, ສະຖາບັນ, ແຂກທີ່ຖືກເຊີນຈາກພາກສ່ວນຕ່າງໆ ອ້ອມຂ້າງກະຊວງ ແລະພະນັກງານວິຊາການສອງຝ່າຍເຂົ້າຮ່ວມເປັນສັກຂີພິຍານ.

  ທ່ານ ສຸລິຍາ ແສງດາລາວົງ ຮອງຫົວໜ້າກົມເຕັກໂນໂລຊີດິຈິຕອລໄດ້ກ່າວວ່າ: ລະບົບໄອທີທັນສະໄໝເຖິງວ່າຈະມີຄຸນປະໂຫຍດຫຼາຍດ້ານແຕ່ກໍຍັງມີບາງດ້ານທີ່ເປັນອັບປະໂຫຍດຄຽງຄູ່ກັນໄປເຊັ່ນ: ຄວາມປອດໄພ, ການໂຈນລະກໍາຂໍ້ມູນແລະການກໍ່ອາສະຍາກໍາທາງລະບົບຄອມພິວເຕີທີ່ເອີ້ນກັນວ່າ “(Cy ber Crime/Cyber Sec urity)” ເປັນຕົ້ນ. ຜ່ານມາ, ດ້ານລົບໄດ້ສ້າງຄວາມເສຍຫາຍໃຫ້ແກ່ເສດຖະກິດ-ສັງຄົມ ແລະ ຄວາມໝັ້ນຄົງຂອງຊາດຊຶ່ງເກີດຂຶ້ນຢູ່ໃນຫຼາຍປະເທດຜ່ານມາແລ້ວ. ໃນເມື່ອວຽກງານຄວາມປອດໄພດ້ານໄອທີໄດ້ມີຄວາມສຳຄັນຄືແນວນັ້ນ, ກົມເຕັກໂນໂລຊີດິຈິຕອລຊຶ່ງມີພາລະບົດບາດໃນການຄຸ້ມຄອງມະຫາພາກ, ເຮັດການຄົ້ນຄວ້າ-ພັດທະ ນາ ແລະສົ່ງເສີມໃຫ້ມີການນຳໃຊ້ລະບົບ ໄອທີ-ດິຈິຕອລ ຢ່າງກວ້າງຂວາງ, ຖືກຕ້ອງ ແລະ ມີຄວາມປອດໄພສູງ. ສະນັ້ນ, ກົມຈິ່ງໄດ້ສຶກສາ ແລະ ສ້າງເງື່ອນໄຂໃນການຄົ້ນ ຄວ້າສ້າງລະບຽບການ ແລະພັດທະນາລະບົບຄວາມປອດໄພດ້ານໄອທີ (IT Security) ຕິດພັນກັບການທົດສອບລະບົບໄອທີທີ່ມີການນຳໃຊ້ຢູ່ໃນອົງກອນຕ່າງໆ ທັງພາກລັດ ແລະເອກະຊົນ ເພື່ອນຳໄປສູ່ຂະບວນການຂໍການຢັ້ງຢືນ-ຮັບຮອງມາດຕະຖານຄວາມປອດໄພດ້ານໄອທີຂອງ ສປປ ລາວ ຫຼື ສາກົນທີ່ເອີ້ນວ່າ: (ISO:27001) ຊຶ່ງເປັນມາດຕະຖານສາກົນປະກອບດ້ວຍ 114 ມາດຕະການເພື່ອຮັບປະກັນໃຫ້ແກ່ການນຳໃຊ້ລະບົບໄອທີ-ດິຈິຕອລ ທີ່ມີຄວາມປອດໄພສູງ.

  ຜ່ານການສຶກສາຂໍ້ມູນເບື້ອງຕົ້ນເຫັນວ່າ: ມີບໍລິສັດ/ຜູ້ປະກອບການທີ່ເປັນຜູ້ໃຫ້ບໍລິການດ້ານລະບົບໄອທີ, ອິນເຕີເນັດ, ໂທລະຄົມ ແລະສະຖາບັນການເງິນໃນ ສປປ ລາວ ຍັງກວມອັດສ່ວນຫຼາຍທີ່ຍັງບໍ່ທັນໃຫ້ຄວາມສໍາຄັນດ້ານຄວາມປອດໄພລະບົບໄອທີຂອງຕົນເທົ່າທີ່ຄວນ ແລະ ມີຫຼາຍອົງກອນແມ່ນຍັງບໍ່ທັນໄດ້ຮັບການຢັ້ງຢືນມາດຕະຖານຄວາມປອດໄພຂອງລະບົບໄອທີ(ISO:27001) ຫຼື ISO ອື່ນໆທີ່ກ່ຽວຂ້ອງຊຶ່ງເປັນຊ່ອງວ່າງໃຫ້ແກ່ກຸ່ມຄົນທີ່ບໍ່ຫວັງດີ (Hacker) ສາມາດເຈະລະບົບເພື່ອໂຈລະກໍາຂໍ້ມູນສໍາຄັນຂອງອົງກອນລວມທັງການເຈະເຂົ້າໃນລະບົບຄອມພິວເຕີຂອງສະຖາບັນການເງິນ, ທະນາຄານແລະອື່ນໆ ຊຶ່ງຈະສ້າງຄວາມເສຍຫາຍຕໍ່ຊັບສິນຂອງອົງກອນຂອງລັດ ແລະເອກະຊົນກໍຄືຊັບສິນຂອງປະຊາຊົນເປັນຈໍານວນບໍ່ໜ້ອຍ.

  ທ່ານ ວົງພູທອນ ສີຈັນທະລາດ ປະທານບໍລິສັດ ເຈແອວເອສ ໄອທີ ໂຊລູເຊີ້ນ ຈຳກັດ ໄດ້ກ່າວວ່າ: ຍຸກແຫ່ງສັງຄົມຂໍ້ ມູນຂ່າວສານ, ຍຸກແຫ່ງການເຊື່ອມໂຍງດ້ວຍລະບົບ ໄອທີ/ໄອຊີທີ, ດ້ວຍເຫດ ນີ້ຫຼາຍປະເທດໃນທົ່ວໂລກ ໄດ້ຖືສຳຄັນ ຕໍ່ກັບບັນຫາຄວາມປອດໄພ ແລະມາດ ຕະຖານລະບົບໄອທີ ເນື່ອງຈາກມີກຸ່ມຄົນທີ່ບໍ່ຫວັງດີໄດ້ສວຍໃຊ້ເຕັກໂນໂລຊີທີ່ ທັນສະໄໝ ເພື່ອເຈາະເຂົ້າໃນລະບົບຂໍ້ມູນຂ່າວສານຂອງບັນດາອົງກອນທີ່ສຳຄັນທັງພາກລັດ ແລະເອກະຊົນຊຶ່ງຕິດພັນກັບຄວາມໝັ້ນຄົງດ້ານຂໍ້ມູນຂ່າວສານ ແລະ ສປປ ລາວ ກໍເປັນໜຶ່ງໃນບັນດາປະເທດທີ່ພົບບັນຫາດັ່ງກ່າວ. ສະນັ້ນ, ບໍລິສັດຂອງພວກເຮົາຈິ່ງເຫັນວ່າບັນຫາ Cyber Security ເປັນວຽກທີ່ມີຄວາມສຳຄັນທີ່ສຸດ ແລະພວກເຮົາກໍມີບົດຮຽນຜ່ານການສຶກສາຄົ້ນຄວ້າ ແລະຮ່ວມມືກັບຫຼາຍບໍລິສັດທີ່ມືຊື່ສຽງທາງດ້ານການຮັກສາຄວາມປອດໄພໃນລະບົບໄອທີ.

-------------------------

​​ຂຽນໂດຍ: ກວຕ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์