ປິດກອງປະຊຸມສະໄໝສາມັນເທື່ອທີ 7 ສພຂ ເຊກອງ

  ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງເຊກອງຊຸດທີ I ໄດ້ອັດລົງດ້ວຍຜົນສໍາເລັດຢ່າງຈົບງາມ, ພາຍຫຼັງທີ່ດໍາເນີນມາເປັນເວລາ 3 ວັນ ນັບຕັ້ງແຕ່ວັນທີ 23-25 ກໍລະກົດ 2019 ທີ່ສະໂມສອນສະພາປະຊາຊົນແຂວງໂດຍພາຍໃຕ້ການເປັນປະທານຂອງທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ.

ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງເຊກອງຊຸດທີ I ດໍາເນີນໄປດ້ວຍບັນຍາກາດສ້າງສັນ, ດ້ວຍຄວາມຮັບຜິດຊອບສູງຂອງບັນດາທ່ານສະມາ ຊິກສະພາປະຊາຊົນແຂວງໃນການຄົ້ນຄວ້າພິຈາລະນາ ແລະຮັບຮອງເອົາບັນຫາສໍາຄັນຂອງແຂວງເຊກອງ, ຮັບປະກັນທາງດ້ານເນື້ອໃນພ້ອມທັງມີຄວາມເປັນເອກະພາບສູງຕໍ່ການຄົ້ນຄວ້າພິຈາລະນາ ແລະຮັບຮອງເອົາບັນຫາສໍາຄັນຕ່າງໆ ເຊັ່ນ: ໄດ້ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບ ປະມານແຫ່ງລັດ 6 ເດືອນຕົ້ນປີ ແລະທິດທາງ ແຜນການ 6 ເດືອນທ້າຍປີ 2019 ຂອງແຂວງ; ຮັບຮອງເອົາການສະເໜີດັດແກ້ງົບປະມານ 6 ເດືອນທ້າຍປີ 2019 ຂອງແຂວງ; ຮັບຮອງເອົາບົດລາຍງານຂອງກອງບັນຊາການ ປກສ ແຂວງກ່ຽວກັບການຄຸ້ມຄອງ, ແກ້ໄຂອຸບັດເຫດຕາມທ້ອງຖະໜົນ ແລະບັນຫາຢາເສບຕິດ.

  ນອກຈາກນີ້ໃນກອງປະຊຸມຍັງຮັບຮອງເອົາການສະເໜີຍົກຍ້າຍ ແລະແຕ່ງຕັ້ງບຸກຄະລາກອນຂອງສະພາປະຊາຊົນແຂວງຄື: ສະເໜີຍົກຍ້າຍ ທ່ານ ນາງ ໄຮມະນີ ວົງໜໍ່ແກ້ວ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 16 ແຂວງເຊກອງ, ປະທານຄະນະກໍາມະການວັດທະນະທໍາ-ສັງຄົມ ແລະບັນດາເຜົ່າສະພາປະຊາຊົນແຂວງເປັນເລຂາທິການສະພາປະຊາຊົນແຂວງ; ຮັບຮອງເອົາການແຕ່ງຕັ້ງທ່ານ ນາງ ຄໍາເສັງ ທຸມມະວົງສາ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງລະມາມເປັນປະທານຄະນະກໍາມະການວັດທະນະທໍາ-ສັງຄົມ ແລະບັນດາເຜົ່າສະພາປະຊາຊົນແຂວງ.

---------------------

ຂຽນໂດຍ: ສັນຍາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์