ກອງປະຊຸມສະໄໝສາມັນເທື່ອທີ 7 ຂອງ ສພຂ ຄຳມ່ວນ ພິຈາລະນາຫຼາຍບັນຫາ

 ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນ ແຂວງຄຳມ່ວນ ຊຸດທີ I ໄດ້ຈັດຂຶ້ນໃນລະຫວ່າງວັນທີ 24-26 ກໍລະກົດ 2019 ທີ່ສະໂມສອນໃຫຍ່ 21 ມີນາ ພາຍໃຕ້ການເປັນປະທານຂອງທ່ານ ສົມໃຈ ເພັດສີນວນ ປະທານສະພາປະຊາຊົນແຂວງ, ເປັນກຽດເຂົ້າຮ່ວມມີທ່ານ ບຸນປອນ ບຸດຕະນະວົງ ຮອງປະທານສະພາ ແຫ່ງຊາດ, ທ່ານ ໂອໄດ ສຸດາພອນ ກຳມະການສູນກາງພັກ, ເລຂາຄະ ນະບໍລິຫານງານພັກແຂວງ, ເຈົ້າແຂວງໆຄຳມ່ວນ, ບັນດາທ່ານຄະນະສະມາຊິກສະພາແຫ່ງ ຊາດປະຈຳເຂດເລືອກຕັ້ງທີ 12, ຄະນະສະມາຊິກສະພາປະຊາຊົນແຂວງ, ຫົວໜ້າພະແນກການ,ພະນັກງານອາວຸໂສບຳນານ, ເຈົ້າເມືອງ, ຕະຫຼອດແຂກຖືກເຊີນເຂົ້າຮ່ວມ.

 ທ່ານ ສົມໃຈ ເພັດສີນວນ ໄດ້ກ່າວເປີດກອງປະຊຸມວ່າ: ຕະຫຼອດໄລຍະ 3 ປີຜ່ານມາທີ່ອົງການອຳນາດລັດທຸກຂັ້ນ ແລະທົ່ວປວງຊົນລາວຊາວແຂວງຄຳມ່ວນໄດ້ສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ. ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ ແລະ ມະຕິກອງປະຊຸມສະໄໝສາ ມັນເທື່ອ ທີ 1-6 ຂອງສະພາປະຊາຊົນ ແຂວງຄໍາມ່ວນຊຸດທີ I ກໍ່ຄືແຜນ ພັດທະນາເສດຖະກິດ-ສັງຄົມຂອງແຂວງເຫັນວ່າມີຜົນສໍາເລັດຫຼາຍດ້ານບົນຈິດໃຈດັ່ງກ່າວ, ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ I ນີ້ ຈະໄດ້ສຸມໃສ່ພິຈາລະນາຮັບຮອງເອົາບັນດາເນື້ອໃນສຳຄັນເຊັ່ນ: ພິຈາລະນາຮັບຮອງເອົາແຜນພັດທະນາເສດຖະກິດ-ສັງຄົມ ແລະແຜນງົບປະມານແຫ່ງລັດ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2019 ຊຶ່ງສະເໜີໂດຍທ່ານເຈົ້າ ແຂວງໆຄຳມ່ວນ, ຮັບຮອງເອົາ ການຊີ້ແຈງຈາກພະແນກການເງິນກ່ຽວກັບການເກັບລາຍຮັບ ແລະຄຸ້ມຄອງລາຍຈ່າຍ 6 ເດືອນຕົ້ນປີ, ການຊີ້ແຈງສະພາບຂໍ້ຂັດແຍ່ງຈາກການຂຶ້ນທະບຽນທີ່ດິນ ແລະອອກໃບຕາດິນຊໍ້າຊ້ອນໃນໄລຍະຜ່ານມາ, ຊີ້ແຈງການຈັດຕັ້ງປະຕິບັດວຽກງານພັດທະນາຊົນນະບົດ ແລະລຶບລ້າງຄວາມທຸກຍາກຕິດພັນກັບການຊຸກຍູ້ສົ່ງເສີມການຜະລິດເປັນສິນຄ້າ, ການຊີ້ແຈງກ່ຽວກັບການຄຸ້ມຄອງພາຫະນະຂົນສົ່ງສິນຄ້າຜ່ານແດນ, ການສ້ອມແປງເສັ້ນທາງໄລຍະຜ່ານມາ, ຊີ້ແຈງກ່ຽວກັບການຄຸ້ມຄອງທີ່ດິນວັດທະນະທຳຫີນພູຄັນນາ (ເມືອງທ່າແຂກ), ຮັບຟັງການໃຫ້ຄວາມກະຈ່າງແຈ້ງຕໍ່ວຽກ ງານການຄຸ້ມຄອງອອກປຶ້ມສຳມະໂນຄົວ, ຮັບຟັງການຜ່ານມະຕິກອງປະຊຸມຂອງຄະນະປະຈຳສະພາປະຊາຊົນແຂວງຄຳມ່ວນວ່າດ້ວຍການຮັບຮອງເອົາຫົວໜ້າພະແນກພາຍໃນແຂວງຜູ້ໃໝ່.

   ນອກນັ້ນຍັງໄດ້ຮັບຟັງການລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 6 ເດືອນຕົ້ນປີທິດທາງແຜນການທ້າຍປີຂອງອົງການໄອຍາການ ແຂວງ, ສານປະຊາຊົນແຂວງ ແລະຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນ ການເຄື່ອນໄຫວວຽກງານ 6 ເດືອນຕົ້ນປີ ແລະແຜນການ 6 ເດືອນທ້າຍປີ 2019 ຂອງຄະນະປະຈຳສະພາປະຊາຊົນແຂວງຄຳມ່ວນ.ທັງໝົດເຫຼົ່ານີ້ແມ່ນຄວາມຮັບຜິດຊອບທາງດ້ານການເມືອງໃນການພິຈາລະນາຄົ້ນຄວ້າບົນພື້ນຖານສະພາບຄວາມເປັນຈິງແກ່ສະມາຊິກສະພາປະຊາຊົນໃນຖານະເປັນຕົວແທນຂອງປະຊາຊົນປະກອບຄຳຄິດຄຳເຫັນພິຈາລະນາ ແລະ ຮັບຮອງເອົາເນື້ອໃນສຳຄັນຂອງກອງປະຊຸມຄັ້ງນີ້ເພື່ອຕອບສະໜອງຄວາມຮຽກຮ້ອງຕ້ອງການ, ຄວາມຄອງຄອຍຂອງປະຊາຊົນໃນທົ່ວແຂວງ.

------------------------

ຂຽນໂດຍ: ມະນີວັນ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์