ຍົກລະດັບບົດບາດຍິງ-ຊາຍເຂົ້າເຖິງການສຶກສາ ສຳລັບເດັກໃຫ້ຄູ-ອາຈານ

ວັນທີ  23  ກໍລະກົດ ຜ່ານມາ ຢູ່ທີ່ຫ້ອງການແພຣນ ເມືອງ ປາກທາ ແຂວງບໍ່ແກ້ວ ໄດ້ຈັດພິທີຝຶກອົບຮົມຄູດ້ານບົດບາດຍິງ-ຊາຍຂອງໂຄງການສົ່ງເສີມການເຂົ້າເຖິງການສຶກສາສຳລັບເດັກໃຫ້ກັບ ຄູ-ອາຈານ ຊັ້ນມັດທະຍົມທົ່ວ ເມືອງປາກທາ ໂດຍການເຂົ້າຮ່ວມຂອງທ່ານ ຄຳເພັດປັນຍາຫົວໜ້າ ຫ້ອງການສຶກສາທິການ ແລະກີລາ ເມືອງມີຜູ້ອຳນວຍການໂຮງຮຽນ, ຄູ-ອາຈານຕະຫຼອດຮອດຜູ້ຮັບຜິດຊອບວຽກງານດັ່ງກ່າວເຂົ້າຮ່ວມ.

ທ່ານ ຄຳເພັດ ປັນຍາ ໄດ້ເນັ້ນໜັກໃຫ້ຄູ-ອາຈານທີ່ເຂົ້າຝຶກອົບຮົມຄັ້ງນີ້ກຳແໜ້ນເນື້ອໃນຈິດໃຈ ແລະ ພຶດຕິກຳຕໍ່ກັບບົດບາດຍິງ-ຊາຍ,ນຳເອົາຄວາມຮູ້ດັ່ງກ່າວນີ້ໄປຊົມໃຊ້ໃຫ້ມີປະສິດທິພາບສູງພ້ອມທັງຊ່ວຍກັນປະກອບຄຳຄິດຄຳເຫັນຕໍ່ເນື້ອໃນການຝຶກອົບຮົມຢ່າງກວ້າງ ຂວາງ ແລະເລິກເຊິ່ງ,ເອົາໃຈໃສ່ ລົງເລິກເປັນພິເສດຕໍ່ກັບບັນຫາ ເດັກພິການ ແລະເດັກປະລະການ ຮຽນ ໂດຍການຊອກວິທີການສົ່ງເສີມດ້ານກິດຈະກຳຕ່າງໆໃຫ້ເດັກໄດ້ເຂົ້າເຖິງການສຶກສາເພີ່ມຂຶ້ນ.

ຊຸດຝຶກອົບຮົມໃນຄັ້ງນີ້ຈະໄດ້ຮຽນຮູ້ກ່ຽວກັບບົດບາດຍິງ-ຊາຍ ແລະຄວາມສະເໝີພາບບົດບາດ ຍິງ-ຊາຍເຊັ່ນ: ຄວາມຊົງຈຳທຳ ອິດກ່ຽວກັບບົດບາດຍິງ-ຊາຍ, ວິເຄາະຄວາມແຕກຕ່າງລະຫວ່າງ ເພດ ແລະບົດບາດ,ການສວມບົດ ບາດເພື່ອການຍ່າງເພື່ອສິດອຳນາດ,ວິເຄາະການປ່ຽນແປງດ້ານບົດບາດຍິງ-ຊາຍ ແລະການສະແດງລະຄອນນອກນັ້ນຜູ້ເຂົ້າຮ່ວມຍັງ ໄດ້ຮຽນຮູ້ກ່ຽວກັບຄວາມຮຸນແຮງ ດ້ານບົດບາດຍິງ-ຊາຍໃນໂຮງຮຽນເຊັ່ນ: ຄວາມຮຸນແຮງໃດທີ່ເກີດ ຂຶ້ນໃນໂຮງຮຽນ, ຄວາມຮຸນແຮງ ທາງບົດບາດຍິງ-ຊາຍໃນໂຮງຮຽນ,ການວິເຄາະພື້ນທີ່ໂຮງຮຽນ, ການ ເຊື່ອມສານບົດບາດຍິງ-ຊາຍເຂົ້າ ໃນຫ້ອງຮຽນ  ຫຼື  ຫຼັກສູດ ແລະວິທີການສອນ, ການຄຸ້ມຄອງບໍລິ ຫານໂຮງຮຽນ ແລະອື່ນໆ.

ຈຸດປະສົງຊຸດຝຶກອົບຮົມຄັ້ງນີ້ ເພື່ອສ້າງຄວາມເຂົ້າໃຈໃຫ້ຄູ-ອາ ຈານຕໍ່ກັບສິດສະເໝີພາບຍິງ-ຊາຍ,ໃຫ້ເດັກຍິງ ແລະເພດອື່ນໆມີສິດສະເໝີພາບເທົ່າທຽມກັບເພດຊາຍ ແລະເພື່ອຫຼຸດຜ່ອນການຖືກລ່ວງລະເມີດທາງເພດທັງນີ້ເພື່ອແນໃສ່ເສີມຂະຫຍາຍພາລະບົດບາດຂອງເດັກຍິງແລະໄວໜຸ່ມໃຫ້ມີສ່ວນຮ່ວມໃນ ການພັດທະນາໂຕເອງຢູ່ໃນໂຮງ ຮຽນ,ຊຸມຊົນ ແລະສັງຄົມພ້ອມທັງ ສະໜັບສະໜູນກິດຈະກຳນອກໂມງ ຮຽນແລະນຳເອົາເວລາຫວ່າງມາເຮັດກິດຈະກຳເພື່ອເຮັດໃຫ່ເດັກຍິງ ແລະໄວໜຸ່ມສາມາດຝຶກຝົນພັດທະນາໂຕເອງໃຫ້ເປັນຜູ້ໃຫຍ່ທີ່ມີຄວາມຮູ້ຄວາມສາມາດຕື່ມອີກ.

 ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 26/07/2019