ເມືອງເລົ່າງາມ ເກັບລາຍຮັບເຂົ້າງົບປະມານ ໄດ້ລື່ນແຜນການ

  ທ່ານ ພອນພະນົມ ສີອ່ອນແກ້ວ ຮັກສາການຫົວໜ້າຫ້ອງການໆເງິນເມືອງເລົ່າງາມໄດ້ລາຍງານໃນກອງປະຊຸມຄົບຄະນະບໍລິຫານງານພັກເມືອງໃຫ້ຮູ້ວ່າ: ເມືອງເລົ່າງາມມີແຜນຈັດເກັບ ລາຍຮັບເຂົ້າງົບປະມານທີ່ສະພາຮັບຮອງ 8,37 ຕື້ກີບ, ຫ້ອງການໆເງິນເມືອງຈຶ່ງໄດ້ສົມທົບກັບອຳນາດການປົກຄອງເມືອງ, ຂະແໜງການຕ່າງໆ ປຶກສາຫາລື ແລະແບ່ງປັນຕົວເລກງົບປະມານໃຫ້ບັນດາກົມກອງ-ຫ້ອງການຕ່າງໆ, ກຸ່ມບ້ານ ແລະບ້ານໃນການຈັດຕັ້ງປະຕິບັດແຜນລາຍຮັບ ແລະ ການຄຸ້ມຄອງລາຍ ຈ່າຍ ປະຈຳປີ 2019, ພ້ອມທັງໄດ້ຊຸກຍູ້ການຈັດ ເກັບລາຍຮັບອາກອນ, ທີ່ດິນ ແລະ ຊັບສິນ ໃຫ້ໄດ້ຕາມແຜນການທີ່ ຮອງຮັບໄວ້. ມາຮອດປະຈຸບັນ ເມືອງເລົ່າງາມ ສາມາດຈັດເກັບ ລາຍຮັບບັນລຸແລ້ວ 5,687 ຕື້ກີບ ເທົ່າກັບ 69,89% ຂອງແຜນ ການປີ, ທຽບໃສ່ໄລຍະດຽວຂອງປີ 2018 ປະຕິບັດໄດ້ 112%, ໃນ ນັ້ນລາຍຮັບສ່ວຍສາອາກອນປະຕິບັດໄດ້ 4 ຕື້ກວ່າກີບ, ທີ່ດິນ 1 ຕື້ກວ່າກີບ, ລາຍຮັບວິຊາການ 495 ລ້ານກີບ, ຄ່າທຳນຽມ 63 ລ້ານກີບ ແລະລາຍຮັບຊັບສິນບັນລຸໄດ້ 963 ລ້ານກວ່າກີບ.

  ຄຽງຄູ່ກັນນັ້ນກໍ່ໄດ້ເອົາໃຈໃສ່ຄຸ້ມຄອງດ້ານລາຍຈ່າຍໃຫ້ໄປຕາມແຜນການທີ່ກຳນົດໄວ້ຊຶ່ງມີທັງໝົດ 31 ຕື້ກວ່າກີບ, ໃນນັ້ນເງິນເດືອນພະນັກງານ-ລັດຖະກອນ, ເງິນດັດສົມສົ່ງເສີມ,ເງິນບໍລິຫານ,ເງິນກໍ່ສ້າງຮາກຖານ ແລະອື່ນໆ, ຊຶ່ງມາຮອດປະຈຸບັນປະຕິບັດ ໄດ້ 15 ຕື້ກວ່າກີບ ທຽບໃສ່ແຜນ 48,53% ໃນນັ້ນໄດ້ຈ່າຍເງິນເດືອນ, ເງິນອຸດໜູນເບ້ຍລ້ຽງ, ບໍລິຫານປົກກະຕິ, ເງິນດັດສົມສົ່ງເສີມ ແລະອື່ນໆ. ສ່ວນການຈັດເກັບລາຍຮັບບ້ານສາມສ້າງ 3 ບ້ານ ຄື: ບ້ານໜອງແກ, ຂົວເສັດ ແລະ ບ້ານດະເຊັຍໂພນຫີນປະຕິບັດໄດ້ກາຍເຄິ່ງທຽບໃສ່ແຜນການປີ, ສິ່ງທີ່ພົ້ນເດັ່ນໃນການຈັດຕັ້ງປະຕິບັດເກັບລາຍຮັບເຂົ້າງົບປະມານປະຈຳປີ 2019 ນີ້ ທີ່ສາມາດປະຕິບັດໄດ້ເກີນແຜນແມ່ນໄດ້ມີການຊີ້ນຳຢ່າງໃກ້ຊິດຂອງຄະນະນຳທຸກຂັ້ນ ແລະ ຜູ້ຈັດຕັ້ງປະຕິບັດ, ທັງໄດ້ປະສານສົມທົບກັນຢ່າງຕໍ່ເນື່ອງ.

  ສຳລັບຄາດໝາຍ ແລະ ທິດທາງໃນໄລຍະ 6 ເດືອນທ້າຍປີ 2019 ເພື່ອເຮັດໃຫ້ການເກັບລາຍຮັບບັນລຸຕາມແຜນການທີ່ວາງໄວ້ຈະຕ້ອງໄດ້ສຸມໃສ່ຫຼາຍບັນຫາທີ່ຈະຕ້ອງໄດ້ເກັບກຳຂໍ້ມູນຖານລາຍຮັບຢ່າງລະອຽດ, ພ້ອມທັງເກັບໜີ້ຄ້າງມອບໃຫ້ທ່ວງທັນເວລາ ແລະ ສຸມໃສອາກອນເຄື່ອນຍ້າຍສິນຄ້າກະສິກຳເປັນຕົ້ນ: ອາກອນເຄື່ອນຍ້າຍກາເຟ, ມັນຕົ້ນ ແລະອື່ນໆ ຕາມທ່າແຮງຂອງເມືອງແນໃສຕອບສະໜອງໃຫ້ກັບການພັດທະນາເສດຖະກິດສັງຄົມ ແລະ ການແກ້ໄຂຄວາມທຸກຍາກຊຶ່ງໄດ້ຄາດຄະ ເນລາຍຮັບໝົດປີ 8,64 ຕື້ກີບ.

------------------

ຂຽນໂດຍ: ວິໄລວອນ ສິດທິໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์