ຜະລິດຖ່ານ ອີກໜື່ງຕົ້ນເຫດຕັດໄມ້ຊະຊາຍ

  ໃນວັນທີ 22 ກໍລະກົດ ທີ່ແຂວງສະຫວັນນະເຂດ ທ່ານ ສີທົນ ນັນທະລາດ ຫົວໜ້າພະແນກອຸດສາຫະກຳ ແລະການຄ້າແຂວງໄດ້ລາຍງານກ່ຽວກັບການອະ ນຸຍາດ ແລະການຄຸ້ມຄອງໂຮງງານຜະລິດຖ່ານຂາວ-ຖ່ານດຳຕໍ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຊຸດທີ 1 ວ່າ: ຖ່ານດຳ ແມ່ນ: ຜະລິດຕະພັນທີ່ປະຊາຊົນຜະລິດນຳໃຊ້ໄມ້ຈາກຫົວໄຮ່ປາຍນາຜ່ານຂະບວນການປຸງແຕ່ງ 3-7 ວັນເປັນຜະລິດຕະພັນຮັບໃຊ້ພາຍໃນບໍ່ສາມາດສົ່ງອອກໄດ້, ຖ່າ ນດຳນີ້ທາງພະແນກບໍ່ໄດ້ອອກໃບອະນຸຍາດ ແລະບໍ່ໄດ້ຄຸ້ມຄອງ, ສ່ວນຖ່ານຂາວແມ່ນ: ຜະລິດຕະພັນທີ່ຜ່ານຂະບວນການປຸງແຕ່ງຕາມເຕັກນິກວິຊາການໃຊ້ເວລາຜະລິດດົນກວ່າຖ່ານດຳແຕ່ 15 ຫາ 20 ມື້ ໂດຍນຳໃຊ້ວັດຖຸດິບຈາກໄມ້ຕິ້ວ ແລະໄມ້ສວນປູກເປັນຜະລິດຕະພັນທີ່ສາມາດສົ່ງຂາຍອອກຕ່າງປະເທດ.

  ໃນທົ່ວແຂວງສະຫວັນນະເຂດມີໂຮງງານຜະລິດຖ່ານຂາວ 36 ໂຮງງານຢູ່ຕາມຕົວເມືອງຕ່າງໆຄື: ເມືອງອາດສະພັງທອງ 7 ໂຮງງານ, ເມືອງອາດພະລານໄຊ 6 ໂຮງງານ, ເມືອງພີນ 4 ໂຮງງານ, ເມືອງໄຊບູລີ 3 ໂຮງງານ, ເມືອງໄຊພູທອງ, ຈຳພອນ, ສອງຄອນ, ຊົນນະບູລີ, ທ່າປາງທອງ ແລະເມືອງນອງເມືອງລະ 2 ໂຮງງານນະຄອນໄກສອນພົມວິຫານ, ເມືອງອາດສະພອນ, ເຊໂປນ ແລະເມືອງວິລະບູລີ ເມືອງລະ 1 ໂຮງງານ.

  ໃນນີ້ເປັນການລົງທຶນຂອງຕ່າງປະເທດ 3 ໂຮງງານ, ສ່ວນທີ່ເຫຼືອແມ່ນການລົງທຶນຂອງເອກະຊົນພາຍໃນ, ເນື້ອທີ່ດິນສວນປູກທັງ 36 ໂຮງງານມີທັງໝົດ 1.276 ເຮັກຕາ ຊຶ່ງເປັນດິນຂອງໂຮງງານເອງ 383 ເຮັກຕາ, ດິນລັດ 146 ເຮັກຕາ ແລະ ດິນປະຊາຊົນ 147 ເຮັກຕາ. ເຕົາເຜົາທັງໝົດ 1.401 ເຕົາ, ມີແຮງງານທີ່ເຮັດວຽກທັງໝົດ 679 ຄົນ ຍິງ 188 ຄົນ ໃນນັ້ນເປັນຄົນຕ່າງປະເທດ 87 ຄົນ ຍິງ 11 ຄົນ, ມີທຶນຈົດທະບຽນ 28,7 ຕື້ກີບ.

  ການນໍາໃຊ້ວັດຖຸດິບ ຫຼື ໄມ້ທີ່ນໍາມາຜະລິດຖ່ານຂາວ ແລະນໍາມາເປັນເຊື້ອເພີງໃນການເຜົາແມ່ນມາຈາກຂີ້ເລື່ອຍ ແລະໄມ້ເສດຈາກໂຮງງານປຸງແຕ່ງໄມ້, ໄມ້ສວນປູກເຊັ່ນ: ໄມ້ກະຖິນນາລົງ, ກະ ຖິນເທພາ ແລະໄມ້ວິກ ທີ່ໄດ້ຮັບການຢັ້ງ ຢືນທາງດ້ານແຫຼ່ງທີ່ມາຈາກຂະແໜງ ກະສິກຳ ແລະປ່າໄມ້. ໄມ້ຕີ້ວຈາກໂຄຕ້າ ທີ່ລັດຖະບານແບ່ງໃຫ້ປະຈຳປີ ບົນພື້ນ ຖານການສຳຫຼວດຂອງຂະແໜງກະສິກຳ ແລະປ່າໄມ້, ໄມ້ຕີ້ວ ແລະໄມ້ຟືນ ທີ່ໄດ້ຈາກການບຸກເບີກໂຄງການສຳປະທານຕ່າງໆ ທີ່ໄດ້ຮັບການອະນຸມັດຈາກລັດຖະບານ. ສ່ວນຜະລິດຕະພັນທີ່ໄດ້ຈາກໂຮງງານຜະລິດຖ່ານຂາວປະກອບມີ: ຖ່ານອັດເມັດ, ອັດແທ່ງ, ຖ່ານຜົງ, ຖ່ານມຸ່ນ ແລະ ຖ່ານທີ່ເປັນກ້ອນ.

  ທ່ານຫົວໜ້າພະແນກອຸດສະຫະກໍາ ແລະ ການຄ້າຍັງໃຫ້ຮູ້ຕື່ມອີກວ່າ: ການສ້າງຕັ້ງໂຮງງານຖ່ານຂາວເຖິງແມ່ນວ່າ ຈະສ້າງຜົນປະໂຫຍດຫຼາຍຢ່າງຕໍ່ເສດ  ຖະກິດ-ສັງຄົມຂອງຫຼາຍທ້ອງຖິ່ນແຕ່ກໍ່ໃຫ້ເກີດຜົນກະທົບທາງລົບໄດ້ເຊັ່ນກັນເປັນຕົ້ນແມ່ນການທຳລາຍປ່າໄມ້ຢ່າງຊະຊາຍ, ການລັກລອບຕັດໄມ້ຂອງປະຊາ ຊົນ, ການບໍ່ເຄົາລົບລະບຽບກົດໝາຍຂອງຜູ້ປະກອບການ ແລະອື່ນໆ ຊຶ່ງກໍຍ້ອນການຄຸ້ມຄອງຂອງພາກລັດເຮົາຍັງບໍ່ໄດ້ດີ.

-------------------------------

ຂຽນໂດຍ: ວິທະຍຸກະຈາຍສຽງສະຫວັນ

ພາບແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์