6 ເດືຶອນ ເຊກອງສົ່ງອອກສິນຄ້າ ບັນລຸ 31,62% ຂອງແຜນປີ ມູນຄ່າຮ້ອຍຕື້ກວ່າກີບ

 ໃນປີ 2019 ແຂວງເຊກອງ ວາງຄາດໝາຍຕົວເລກຂອງການສົ່ງອອກສິນຄ້າໃຫ້ໄດ້ທັງໝົດ 40 ລ້ານໂດລາ ຫຼື ປະມານ 320 ຕື້ກີບ ແລະ ການນຳເຂົ້າສິນຄ້າໃຫ້ຢູ່ໃນລະດັບ 23,75 ລ້ານໂດລາ ຫຼື ປະມານ 190 ຕື້ກີບ ໂດຍການປະຕິບັດໃນ 6 ເດືອນຜ່ານມາເຫັນວ່າການສົ່ງອອກສິນຄ້າສົ່ງອອກສາມາດປະຕິ ບັດໄດ້ 12,65 ລ້ານໂດລາ ຫຼື ປະມານ 101,2 ຕື້ກີບ ເທົ່າກັບ 31,62% ຂອງແຜນການປີ.

  ອີງຕາມຂໍ້ມູນຈາກທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງເຊກອງຊຸດທີ I ວ່າ: ສິນຄ້າສົ່ງອອກສ່ວນໃຫຍ່ແມ່ນຜົນຜະລິດກະສິກໍາເປັນຕົ້ນແມ່ນໝາກກາເຟ, ມັນຕົ້ນດິບ-ແຫ້ງ, ຢາງພາລາ, ໝາກກ້ວຍ ແລະອື່ນໆ.

  ສ່ວນມູນຄ່າການນຳເຂົ້າສິນຄ້າແມ່ນປະຕິບັດໄດ້ 74,56 ຕື້ກີບ ເທົ່າກັບ 39,24% ຂອງແຜນການປີຊຶ່ງການສິນຄ້າທີ່ນຳເຂົ້າສ່ວນຫຼາຍຍັງແມ່ນວັດສະດຸການກໍ່ສ້າງ, ນ້ຳມັນເຊື້ອໄຟ, ເຄື່ອງໃຊ້ໄຟຟ້າ, ພະຫະນະຮັບໃຊ້ການຜະລິດ ແລະອາຫານສໍາເລັດຮູບ.

 ຂະນະທີ່ວຽກງານຄຸ້ມຄອງວິສາຫະກິດໃນ 6 ເດືອນແຂວງໄດ້ອອກອະນຸຍາດດໍາເນີນທຸລະກິດທັງໝົດ 22 ຫົວໜ່ວຍ, ມີທຶນຈົດທະບຽນ 35,63 ຕື້ກີບ, ໃນນີ້ອອກໃໝ່ 18 ຫົວໜ່ວຍ ແລະ ດັດແກ້ 4 ຫົວໜ່ວຍໂດຍມາຮອດປະຈຸບັນ ແຂວງເຊກອງມີຫົວໜ່ວຍວິສາຫະກິດທັງໝົດ 1.350 ຫົວໜ່ວຍ, ມີທຶນຈົດທະບຽນທັງໝົດ 1.043,31 ຕື້ກີບ ແລະການຈໍລະຈອນສິນຄ້າພາຍໃນປະຕິບັດໄດ້ 172,71 ຕື້ກີບເທົ່າກັບ 167,3% ຂອງແຜນການປີ, ທຽບໃສ່ໄລຍະດຽວຂອງປີຜ່ານມາເພີ່ມຂຶ້ນເທົ່າຕົວ.

 ແນວໃດກໍດີເພື່ອເຮັດໃຫ້ການສົ່ງອອກ ແລະນຳເຂົ້າສິນຄ້າບັນລຸຕາມຄາດໝາຍທີ່ວາງໄວ້, ທ່ານຮອງເຈົ້າ ແຂວງເຊກອງລະບຸວ່າ: ແຂວງຕ້ອງເອົາໃຈໃສ່ຄຸ້ມ ຄອງໂຮງງານອຸດສາຫະກຳປຸງແຕ່ງໃຫ້ເຄື່ອນໄຫວຢ່າງມີປະສິດທິຜົນ ແລະຄຸນນະພາບໂດຍເລັ່ງໃສ່ການປະຕິບັດກົດໝາຍ,ລະບຽບການກໍານົດໄວ້ຢ່າງເຂັ້ມງວ ດເປັນຕົ້ນການນໍາໃຊ້ວັດຖຸດິບ, ການປົກປັກຮັກສາສິ່ງແວດລ້ອມ, ຊຸກຍູ້ພາກເອກະຊົນເຂົ້າລົງທຶນໃນຂະແໜງການປຸງແຕ່ງໃຫ້ຫຼາຍຂຶ້ນ, ຕິດຕາມການສົ່ງ ອອກ ແລະນໍາເຂົ້າສິນຄ້າເປັນລະດັບ, ຄຸ້ມຄອງລາຄາສິນຄ້າຕາມທ້ອງຕະຫຼາດໃຫ້ເປັນປົກກະຕິ, ພ້ອມທັງຊຸກຍູ້ສົ່ງເສີມຫັດຖະກຳບັນດາເຜົ່າ ແລະຫັດຖະກຳພື້ນເມືອງເພື່ອສ້າງໃຫ້ມີຜະລິດຕະພັນໃໝ່ທີ່ຫຼາກຫຼາຍຂຶ້ນ, ທັງນີ້ກໍ່ເພື່ອເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2019 ຂອງ ແຂວງບັນລຸຄາດໝາຍ, ທັງເປັນການສ້າງຄວາມພ້ອມໃຫ້ແຂວງສາມາດປັບໂຕໃຫ້ທັນກັບແນວທາງປ່ຽນແປງໃໝ່ຂອງພັກ ແລະລັດຖະບານກໍຄືສາກົນໄດ້.

---------------------------------

ຂຽນໂດຍ: ສັນຍາ

ພາບແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์