ນະຄອນຫຼວງ ຮ່ວມມືກໍກຽດກຣຸບ ຈະຈັດແຂ່ງຂັນ ມວຍລະດັບຊາດ ເດືອນສິງຫານີ້

ສະຫະພັນມວຍລາວນະຄອນຫຼວງວຽງຈັນ (ນວ) ຮ່ວມ ມືກັບບໍລິສັດກໍກຽດບ໋ອກຊິງກຣຸບຈຳກັດຈາກປະເທດໄທຈະຈັດການ ແຂ່ງຂັນກີລາມວຍລາວ  ລາຍການລະດັບນະຄອນຫຼວງວຽງຈັນ ແລະ ລາຍການລະດັບຊາດ ໃຫ້ຕໍ່ເນື່ອງ ໂດຍຈະເລີ່ມເປີດສັງວຽນແຂ່ງຂັນ ໃນວັນທີ 10 ສິງຫານີ້ ທີ່ເວທີສະຫະພັນມວຍລາວ ນະຄອນຫຼວງ ວຽງຈັນ ບ້ານບຶງຂະຫຍອງ  ສປປ ລາວ ຢ່າງເປັນທາງການພ້ອມທັງ ຈະມີການຖ່າຍທອດສົດທຸກການແຂ່ງຂັນຂອງລາຍການດັ່ງກ່າວ ຜ່ານທາງໂທລະພາບ ລາວສະຕຣາເພື່ອອອກສູ່ສາຍຕາມວນຊົນຊາວ ລາວ ແລະສາກົນຢ່າງຕໍ່ເນື່ອງ.

ພິທີເຊັນສັນຍາຮ່ວມມືກັນຢ່າງ ເປັນທາງການຈັດຂຶ້ນເມື່ອຕອນ ບ່າຍຂອງວັນທີ  21  ກໍລະກົດ  ຜ່ານມາທີ່ຫ້ອງການສະຫະພັນມວຍລາວ ນະຄອນຫຼວງວຽງຈັນພະແນກສຶກສາທິການ ແລະກີລານະຄອນຫຼວງວຽງຈັນ ບ້ານບຶງຂະ ຫຍອງ ເມືອງສີສັດຕະນາກລະ ຫວ່າງທ່ານ ຄຳເສັງ ສູນດາລາ ປະທານສະຫະພັນມວຍລາວ-ມວຍສາກົນ, ມວຍວູຊູ ແລະມວຍ ປັນຈັກສີລັດນະຄອນຫຼວງວຽງຈັນ ທັງເປັນປະທານສະໂມສອນກີລາ ມວຍລາວ ຄຳເສັງ ແລະທ່ານ ກໍກຽດກຣຸບ ພານິຊຍາຣົມ ປະທານ ບໍລິສັດ ກໍກຽດ ບ໋ອກຊິງກຣຸບ  ຈຳກັດ ໂດຍມີທ່ານ ກອງແກ້ວ ແຫ່ງ ດາວົງໄຊ ຫົວໜ້າຂະແໜງກີລາລະ ດັບສູງພະແນກສຶກສາທິການ  ແລະ ກີລານະຄອນຫຼວງວຽງຈັນ ພ້ອມ ດ້ວຍບັນດາຄະນະບໍລິຫານງານ ຂອງທັງສອງພາກສ່ວນດັ່ງກ່າວ ແລະພະນັກງານວິຊາການທີ່ກ່ຽວ ຂ້ອງເຂົ້າຮ່ວມເປັນສັກຂີພິຍານ.

ທ່ານ ຄຳເສັງສູນດາລາ ປະທານສະຫະພັນມວຍລາວ-ມວຍສາ ກົນນະຄອນຫຼວງວຽງຈັນກ່າວວ່າ: ມື້ນີ້ເປັນພິທີເຊັນສັນຍາຢ່າງເປັນທາງການຂອງທັງສອງພາກສ່ວນເພື່ອຮ່ວມກັນພັດທະນາມວຍລາວ ແລະຈັດການແຂ່ງຂັນມວຍເພື່ອເປັນການຊຸກຍູ້ນັກກີລາມວຍລາວ ຮຸ່ນສືບທອດກ້າວສູ່ອາຊີບພ້ອມທັງ ເປັນການຖ່າຍທອດສົດມວຍລາວ ອອກສູ່ສາຍຕາຊາວຕ່າງປະເທດຕະຫຼອດໄລຍະເວລາ 5 ປີ ທີ່ສອງພາກສ່ວນຂອງພວກເຮົາໄດ້ລົງນາມບົດບັນທຶກຄວາມເຂົ້າໃຈແມ່ນຈະເລີ່ມຮ່ວມມືກັບໃນໄຟທ໌ການແຂ່ງຂັນຄູ່ຊິງຊະນະເລີດມວຍຮອບຮຸ່ນນໍ້າໜັກ 55 ກິໂລກຣາມຊິງສາຍແອວແຊ້ມຂອງຫົວໜ້າພະແນກສຶກສາທິການ ແລະກີລານະຄອນຫຼວງ ວຽງຈັນ ຄັ້ງທີ 1 ປະຈໍາປີ 2019 ທີ່ຈະຈັດຂຶ້ນໃນວັນທີ 10 ສິງຫານີ້ ເປັນຕົ້ນໄປ.ຫຼັງຈາກນັ້ນ,ກໍຈະມີການຈັດແຂ່ງຂັນມວຍລາຍການຕ່າງໆ ໃນທຸກໆອາທິດພ້ອມທັງຖ່າຍທອດສົດທຸກໆວັນເສົາທີ່ເວທີ ມວຍບຶງຂະຫຍອງຢ່າງເປັນປະຈໍາ ຜ່ານທາງໂທລະພາບລາວສະຕຣາ ເພື່ອອອກສູ່ສາຍຕາມວນຊົນຊາວ ລາວ ແລະສາກົນຢ່າງຕໍ່ເນື່ອງ.

ສ່ວນທ່ານ ກໍກຽດກຣຸບພານິຊຍາຣົມປະທານບໍລິສັດ ກໍກຽດ ບ໋ອກຊິງກຣຸບ ຈຳກັດກ່າວວ່າ: ການຮ່ວມມືຄັ້ງນີ້ທາງບໍລິສັດພວກເຮົາມີໜ້າທີ່ຫາຜູ້ສະໜັບສະໜູນ ແລະຊ່ວຍກະຈ່າຍການຖ່າຍທອດສົດໄປທີ່ປະເທດໄທເພື່ອຊ່ວຍພັດ ທະນາມວຍລາວ ແລະໃຫ້ຊາວໂລກ ໄດ້ເຫັນຫຼາຍຂຶ້ນ ໂດຍມີເປົ້າໝາຍ ຈະຈັດການແຂ່ງຂັນມວຍລາວ ຢູ ສູນກາງຂອງນະຄອນຫຼວງວຽງ ຈັນ ໃຫ້ດີທີ່ສຸດໂດຍນໍາເອົານັກມວຍ ໄທ ແລະຕ່າງປະເທດມາຮ່ວມແຂ່ງຂັນກັບນັກມວຍລາວ  ຢ່າງຕໍ່ເນື່ອງ ແນ່ນອນໃນໄລຍະເວລາ 5 ປີນີ້ ທາງພວກເຮົາຂໍສັນຍາວ່າຈະພະຍາຍາມສະໜັບສະໜູນນັກກີລາ ມວຍລາວກ້າວສູ່ສັງວຽນອາຊີບ ກໍຄືສາມາດກ້າວສູ່ລະດັບອາຊີ ແລະ ລະດັບໂລກໃຫ້ນັບມື້ເຕີບໃຫຍ່ຂະ ຫຍາຍຕົວຫຼາຍຂຶ້ນເລື້ອຍໆ.

ສໍາລັບການເລີ່ມປະຕິບັດໃນສັນຍາດັ່ງກ່າວຈະເລີ່ມດຳເນີນແຜນການຈັດການແຂ່ງຂັນມວຍລາວ ມວຍຮອບຮຸ່ນ 55  ກິໂລກຣາມຊິງສາຍແອວແຊ້ມຂອງຫົວໜ້າພະແນກສຶກສາທິການ ແລະກີລານະຄອນຫຼວງວຽງຈັນ ຄັ້ງທີ 1 ຄູ່ຊິງ ຊະນະເລີດໃນວັນທີ 10 ສິງຫາ 2019 ເປັນການພົບກັນລະຫວ່າງຂຸນເຫຼັກສະໂມສອນຄຳເສັງພົບກັບ ກັບຕັນສະໂມສອນມວຍລາວ ຂວັນ ໃຈສີໂຄດ ຫຼັງຈາກນັ້ນກໍຈະເລີມຈັດ ແຂ່ງຂັນເວທີລະດັບນາໆຊາດ ແລະ ພາຍໃນລວມເຖິງລາຍການຕ່າງໆ ຢ່າງໜ້ອຍຈະໃຫ້ມີການແຂ່ງຂັນທຸກວັນເສົາໃນແຕ່ລະອາທິດ.

ພາບ ແລະຂາ່ວຈາກ: ໜັງສຶພິມເສດຖະກິດ-ສັງຄົມ

 

แชร์