ເມືອງແກ່ນທ້າວ ຝຶກອົບຮົມຄູພັກສິ້ນປີຮຽນ

ວັນທີ 18 ກໍລະກົດຜ່ານມາທີ່ໂຮງຮຽນມັດທະຍົມສົມບູນ ແກ່ນທ້າວໄດ້ມີກອງປະຊຸມຝຶກອົບ ຮົມຄູພັກສິ້ນປີຮຽນປະຈໍາປີ 2019 ຂອງເມືອງແກ່ນທ້າວ ແຂວງໄຊ ຍະບູລີ. ເຂົ້າຮ່ວມມີທ່ານ ສີຄານແກ່ນມະນີຮອງເຈົ້າເມືອງແກ່ນ ທ້າວ, ທ່ານ ສົມພອນ ຈິນດາວົງ ຫົວໜ້າຫ້ອງການສຶກສາທິການ ແລະກີລາເມືອງ, ມີຮອງຫົວໜ້າ ຫ້ອງການ, ຜູ້ອໍານວຍການ, ຮອງຜູ້ອໍານວຍການໂຮງຮຽນ, ຄູ-ອາຈານພາຍໃນເມືອງເຂົ້າຮ່ວມ.

ກອງປະຊຸມໄດ້ເຊື່ອມຊຶມຄໍາສັ່ງ ສະບັບເລກທີ 1/ກມສພ ວ່າດ້ວຍການເພີ່ມທະວີການກໍ່ສ້າງໜ່ວຍ ພັກປອດໃສ, ເຂັ້ມແຂງ, ໜັກແໜ້ນ, ມະຕິສະບັບເລກທີ 030/ກມສພ ວ່າດ້ວຍມາດຖານພະນັກງານນໍາ ພາ-ຄຸ້ມຄອງອັນລວມ ແລະອັນສະເພາະຂອງຂະແໜງການສຶກສາ,ດໍາລັດຂອງລັດຖະບານວ່າ   ດ້ວຍວັນພັກ, ກົດໝາຍວ່າດ້ວຍພະ ນັກງານ-ລັດຖະກອນ, ກົດໝາຍ ວ່າດ້ວຍການສຶກສາ,ຂໍ້ຕົກລົງຂອງ ລັດຖະມົນຕີກະຊວງສຶກສາທິການ ແລະກີລາວ່າດ້ວຍ 3 ຂໍ້ແຂ່ງຂັນຂອງຂະແໜງການສຶກສາ ແລະກີ ລາ, ບົດແນະນໍາຂອງລັດຖະມົນຕີກະຊວງສຶກສາທິການ ແລະກີລາວ່າດ້ວຍການຈັດຕັ້ງປະຕິບັດ 3 ຂໍ້ ແຂ່ງຂັນຂອງຂະແໜງການສຶກສາແລະກີລາ ແລະແນະນໍາການຈັດຕັ້ງປະຕິບັດການປະເມີນຜົນລັດຖະກອນຄູ.

ຈາກນັ້ນໄດ້ຄົ້ນຄວ້າສົນທະນາແລກປ່ຽນບົດຮຽນນໍາກັນເປັນຕົ້ນແມ່ນບັນຫາການສິດສອນຂອງຄູ,ການແຕ່ງບົດສອນ,ການສອບເສັງຈົບຊັ້ນ (ປ5 ແລະມ4),ການສອບເສັງນັກຮຽນເກັ່ງ, ການສ້າງຕໍາແໜ່ງຄູປະສົບການ, ການບັນຈຸສັບຊ້ອນຄູ, ຕົວຊີ້ວັດຂອງໂຮງຮຽນຍັງບໍ່ທັນບັນລຸ,ບັນຫານັກຮຽນປະລະຊັ້ນມັດທະຍົມ, ການກໍ່ສ້າງອ່າງລ້າງມື, ກໍ່ສ້າງຫ້ອງນໍ້າ, ການເກັບເງິນຊຸກຍູ້ການສຶກສາເພື່ອມາພັດທະນາໂຮງຮຽນສົກຮຽນ 2019-2020 ແລະພ້ອມກັນຊອກ ຫາວິທີແກ້ໄຂບັນຫາຕ່າງໆຮ່ວມກັນ.

ໃນກອງປະຊຸມຄັ້ງນີ້ທ່ານ ສີຄານແກ່ນມະນີຮອງເຈົ້າເມືອງ ແກ່ນທ້າວ ໄດ້ຮຽກຮ້ອງມາຍັງ ການນໍາຫ້ອງການສຶກສາທິການ ແລະກີລາເມືອງ,ຜູ້ອໍານວຍການ ໂຮງຮຽນ ແລະຄູສອນຈົ່ງເພີ່ມທະວີຄວາມສາມັກຄີໃຫ້ເປັນປຶກແຜ່ນ ແລະໃຫ້ມີຄວາມເປັນເອກະພາບ ກັນພາຍໃນຄະນະນໍາແຕ່ລະຂັ້ນໃນການແກ້ໄຂແຕ່ລະບັນຫາແຕ່ນ້ອຍ ຫາໃຫຍ່ຈຶ່ງຈະແກ້ໄຂໄດ້. ນໍາເອົາເນື້ອໃນຈິດໃຈຂອງກອງປະຊຸມໄປຄົ້ນຄວ້າຈັດຕັ້ງປະຕິບັດໃຫ້ເກີດດອກອອກຜົນຕາມເນື້ອໃນຈິດໃຈການແຂ່ງຂັນທົ່ວຂະແໜງການສຶກສາ ແລະກີລາພາຍໃນເມືອງເຮັດໃຫ້ມີທ່າກ້າວ, ມີຜົນສໍາເລັດຕາມຈຸດປະສົງຄາດໝາຍທີ່ວາງໄວ້.

ພາບ ແລະຂາ່ວຈາກ: ໜັງສຶພິມເສດຖະກິດ-ສັງຄົມ

แชร์