ເປີດຢ່າງເປັນທາງການງານວາງສະແດງສິນຄ້າຜະລິດຕະພັນລາວ

  ວັນທີ 22 ກໍລະກົດຜ່ານມາທີ່ສູນການຄ້າລາວ-ໄອເຕັກ ສະພາການຄ້າ ແລະອຸດສາຫະກຳແຫ່ງຊາດລາວ (ສຄອ) ໄດ້ເປີດງານວາງສະແດງຜະລິດຕະພັນ ລາວ 2019 ຄັ້ງທີ 6 ໂດຍໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາ ຫະກຳ ແລະການຄ້າ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງຊາດ ລາວ, ມີບັນດາລັດຖະມົນຕີ, ຫົວໜ່ວຍທຸລະກິດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ນາງ ຈັນທະຈອນ ວົງໄຊຮອງ ປະທານ ສຄອ ກ່າວວ່າ: ງານວາງສະແດງຜະລິດຕະພັນລາວຄັ້ງນີ້ແມ່ນໄດ້ລະດົມຂົນຂວາຍຜູ້ປະກອບການ, ຜູ້ຜະລິດສິນ ຄ້າໃນທຸກຂະແໜງທົ່ວປະເທດເພື່ອນຳ  ເອົາຜະລິດຕະພັນທີ່ເປັນເອກະລັກຂອງ ແຕ່ລະແຂວງມາວາງສະແດງ, ໂຄສະນາ ແລະຈຳໜ່າຍເພື່ອແນໃສ່ຍົກລະດັບການຜະລິດ-ການຈຳໜ່າຍພາຍໃນໃຫ້ນັບມື້ນັບຂະຫຍາຍຕົວ,ມີຄຸນນະພາບໄດ້ມາດຕະຖານກ້າວສູ່ລະດັບສາກົນ ແລະເປັນການສ້າງຄວາມພາກພູມໃຈຕໍ່ສິນຄ້າ-ຜະລິດຕະພັນທີ່ຜະລິດໃນລາວເພື່ອດຶງດູດນັກທ່ອງທ່ຽວ ແລະນັກລົງທຶນເຂົ້າມາລາວ ໃຫ້ນັບມື້ນັບຫຼາຍຂຶ້ນ, ງານວາງສະແດງຜະລິດຕະພັນລາວໄດ້ຈັດຂຶ້ນໃນລະຫວ່າງວັນທີ 20-28 ກໍລະກົດ 2019.

  ງານວາງສະແດງໃນປີນີ້ ເຫັນວ່າຜູ້ປະກອບການມີຄວາມສົນໃຈ ແລະເຂົ້າຮ່ວມງານຫຼາຍຂຶ້ນຖ້າທຽບໃສ່ປີຜ່ານ ມາເຖິງວ່າຈຳນວນຫ້ອງຈະຫຼຸດລົງຈາກ 180 ຫ້ອງມາເປັນ 172 ຫ້ອງແຕ່ຈຳນວນບໍລິສັດ, ຜູ້ປະກອບການແມ່ນມີຈຳນວນເພີ່ມຂຶ້ນຈາກ 115 ບໍລິສັດມາເປັນ 117 ບໍລິສັດ, ຜະລິດຕະພັນທີ່ເຂົ້າຮ່ວມ ງານວາງສະແດງມີຜະລິດຕະພັນທີ່ເດັ່ນ ຈາກ 17 ແຂວງລວມມີຊາຜົ້ງສາລີ, ຜ້າ ຝ້າຍບໍ່ແກ້ວ, ຫັດຖະກຳອຸດົມໄຊ, ສີ້ນຊຳ ເໜືອ, ຫັດຖະກຳຫຼວງພະບາງ, ເຂົ້າໄກ່ ນ້ອຍຊຽງຂວາງ, ຫວາຍແຂວງວຽງຈັນ, ໝໍ້ແປງບໍລິຄຳໄຊ, ກາເຟປາກຊ່ອງ ແລະສິນຄ້າເອກະລັກອື່ນໆຂອງແຕ່ລະແຂວງ.

------------------------

ໜັງສືພິມເສດຖະກິດ-ສັງຄົມ

แชร์