ໄຊຍະບູລີ ແຕ່ງຕັ້ງປະທານແນວລາວ ສ້າງຊາດຄົນໃໝ່

  ໃນວັນທີ 18 ກໍລະກົດຜ່ານມາ, ທີ່ຫ້ອງການແນວລາວສ້າງຊາດແຂວງໄຊຍະບູລີ ໄດ້ຈັດພິທີມອບ-ຮັບໜ້າທີ່ລະຫວ່າງປະທານແນວລາວສ້າງຊາດ ແຂວງໄຊຍະບູລີຜູ້ເກົ່າ ແລະຜູ້ໃໝ່ຂຶ້ນ.

  ໃນພິທີ ທ່ານ ບົວຈັນ ວັນພັນ ຮອງປະທານແນວລາວສ້າງຊາດແຂວງໄດ້ຂຶ້ນຜ່ານບົດບັນທຶກການມອບ-ຮັບໜ້າທີ່ວ່າ: ແນວລາວສ້າງຊາດແມ່ນອົງການຈັດຕັ້ງສໍາພັນການເມືອງຂອງທົ່ວສັງຄົມ, ເປັນສະຫະພັນສະມັນໃຈທີ່ສ້າງຂຶ້ນບົນພື້ນຖານຄວາມຕື່ນຕົວຂອງອົງການຈັດຕັ້ງການເມືອງ, ເຊິ່ງເປັນຕົວແທນໃຫ້ແກ່ທຸກຊັ້ນຄົນ, ຊົນ ເຜົ່າ, ສາສະໜາ ແລະ ເພດໄວ, ລວມທັງຕົວແທນຄົນລາວທີ່ດໍາລົງຊີວິດຢູ່ຕ່າງປະເທດ, ທັງແມ່ນການຈັດຕັ້ງທີ່ສືບທອດພາລະກໍາປະຫວັດສາດ ແລະ ມູນເຊື້ອອັນສະ ຫງ່າອົງອາດຂອງແນວລາວ   ອິດສະຫຼະ ແລະແນວລາວຮັກຊາດ, ມີບົດບາດໃນການເຕົ້າໂຮມຄວາມ ສາມັກຄີ, ສຶກສາອົບຮົມ ແລະປຸກລະດົມທົ່ວປວງຊົນລາວບັນດາ ເຜົ່າ ແລະຊັ້ນຄົນຕ່າງໆເຂົ້າຮ່ວມ ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດກໍ່ຄືແຂວງໄຊຍະບູລີ, ຕະຫຼອດໄລຍະຜ່ານມາອົງການແນວລາວສ້າງຊາດແຂວງໄຊຍະບູລີ ແມ່ນໄດ້ເອົາໃຈໃສ່ໃນການເຕົ້າໂຮມ ຄວາມສາມັກຄີຂອງປະຊາຊົນບັນດາເຜົ່າ ແລະພະນັກງານຫຼັກແຫຼ່ງ ທົ່ວແຂວງ, ວຽກງານສາສະໜາ ແລະເຜົ່າ, ປະຈຸບັນທົ່ວແຂວງມີ 8 ເຜົ່າ, ເຊື່ອຖື 2 ສາສະໜາຄື: ສາດສະໜາພຸດມີຜູ້ເຊື່ອຖື 287.638 ຄົນ, ຍິງ 150.720 ຄົນ, ສາດສະ ໜາ ເຢຊູຕຣິດມີຜູ້ເຊື່ອຖື 4.218 ຄົນ, ຍິງ2.131 ຄົນ, ໄດ້ເປີດຂະບວນການແຂ່ງຂັນສ້າງຄອບຄົວ ແລະ ບ້ານສາມັກຄີປອງດອງສໍາ ເລັດ 379 ບ້ານ, ສ້າງໄດ້ຄອບຄົວສາມັກຄີປອງ ດອງ 49.242 ຄອບຄົວ ແລະສ້າງໄດ້ບ້ານສາມັກຄີປອງດອງ 254 ບ້ານ, ນອກນັ້ນ ຍັງໄດ້ຊຸກຍູ້ສົ່ງເສີມພ້ອງທັງປຸກ ລະດົມຂົນຂວາຍພໍ່ແມ່ປະຊາຊົນບັນດາເຜົ່າໃນທົ່ວແຂວງເພື່ອປະກອບສ່ວນວັດຖຸ-ຈິດໃຈ ແລະທຶນຮອນເຂົ້າໃນການຊ່ວຍເຫຼືອສັງຄົມ,ສະຖານທີ່ການສຶກສາ,ບູລະນະປະຕິສັງຂອນວັດວາອາຮາມ,ປູສະນິຍະສະຖານ, ບູຮານວັດຖຸຂອງພຸດທະສາສະໜາ.

ຈາກນັ້ນໃນພິທີກໍ່ໄດ້ມີການເຊັນບົດບັນທຶກການມອບ-ຮັບໜ້າທີ່ລະຫວ່າງ ທ່ານ ຄໍາສິງ ສໍລະສຸກ ປະທານແນວຜູ້ໃໝ່ ແລະ ທ່ານ ຄໍາສຸກ ທໍ່ ປະທານແນວຜູ້ເກົ່າ, ໂດຍມີທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີບັນດາຕາງໜ້າໃຫ້ 8 ອົງການຈັດຕັ້ງອ້ອມຂ້າງແຂວງ ແລະ ພະນັກງານພາຍໃນຫ້ອງການແນວລາວສ້າງຊາດແຂວງເປັນສັກຂີພິຍານ.

------------------------

ຂຽນໂດຍ: ອຸ່ນເຮືອນ ໂພທິລັກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์