ເຕັກນິກ ການປູກໝາກຂຽບ

  ໝາກຂຽບເປັນໝາກໄມ້ທີ່ມີລົດຊາດຫວານພໍດີກິນນິຍົມບໍລິໂພກທົ່ວໄປທັງພາຍໃນ ແລະຕ່າງປະເທດທັງເປັນໝາກໄມ້ທີ່ສາມາດປັບຕົວເຂົ້າກັບສະພາບແວດລ້ອມໄດ້ດີ ຊຶ່ງເໝາະສົມຢ່າງຍິ່ງທີ່ຊາວສວນຈະຫັນມາປູກເພື່ອເປັນສິນຄ້າ ແລະໃນປະຈຸບັນກຳລັງກ້າວເຂົ້າສູ່ລະດູຝົນຊຶ່ງເປັນໂອກາດດີສໍາລັບການປູກໝາກຂຽບ.  

  ອີງຕາມຂໍ້ມູນຈາກສູນຄົ້ນຄວ້າ ກະສິກໍາ ແລະປ່າໄມ້ ໃຫ້ຮູ້ວ່າ: ໝາກຂຽບເປັນໝາກໄມ້ທີ່ສາມາດ ປັບຕົວເຂົ້າກັບສະພາບແວດລ້ອມໄດ້ດີ ແລະນິຍົມປູກໃນເຂດອາກາດ ຮ້ອນ, ສ່ວນວິທີປູກແມ່ນສາມາດ ປະຕິບັດໄດ້ງ່າຍໆຄື: ຄວນຂຸດຂຸມ ປູກໃຫ້ມີຂະໜາດກວ້າງ, ຍາວ ແລະເລິກປະມານ 50 ຊັງຕີແມັດ, ໄລ-ຍະປູກ 3x3 ແມັດຕໍ່ຕົ້ນ, ປະ ມານ 150 ຕົ້ນຕໍ່ໄລ່, ຫຼັງຈາກທີ່ ກຽມຂຸມສຳເລັດແລ້ວ ໃຫ້ປະສົມດິນກັບຝຸ່ນຄອກ ຈຳນວນ 5 ກິໂລກຣາມ ແລະປຸ໋ຍຣອດຟໍສເຟດ ຈຳ ນວນ 500 ກຣາມເຂົ້າກັນ ໃນຂຸມສູງປະມານ 2/3 ຂອງຂຸມ, ແລ້ວຍົກຕົ້ນໄມ້ທີ່ກ້າໄວ້ນັ້ນ ລົງໃນຂຸມ ໂດຍໃຫ້ລະດັບຂອງດິນໃນຖົງສູງ ກວ່າລະດັບດິນປາກຂຸມເລັກນ້ອຍ, ໃຊ້ມີດແຫຼມແລ່ງຖົງຈາກກົ້ນຂຶ້ນ ຫາປາກຖົງຢາງທັງ 2 ດ້ານ (ຊ້າຍ-ຂວາ), ຈາກນັ້ນ ໃຫ້ດຶງຖົງຢາງອອກ ໂດຍລະວັງຢ່າໃຫ້ ດິນແຕກແລ້ວກວດເອົາດິນທີ່ເຫຼືອ ລົງໃນຂຸມ, ກົດດິນບໍລິເວນກົກຕົ້ນ ໃຫ້ແໜ້ນ, ພ້ອມທັງປັກໄມ້ ແລະ ມັດເຊືອກໄວ້ເພື່ອປ້ອງກັນລົມພັດ ແລ້ວຫາວັດສະດຸປົກດິນບໍລິເວນ ລຳຕົ້ນເຊັ່ນ ເຟືອງ, ຫຍ້າແຫ້ງ ແລະຫົດນ້ຳໃຫ້ຊຸ່ມ, ພ້ອມເຮັດຮົ່ມບັງເພື່ອຊ່ວຍກັນແສງແດດ.

  ສໍາລັບການຮັກສາ ແລະ ໃສ່ຝຸ່ຍແມ່ນສາມາດປະຕິບັດຄື: ຕົ້ນທີ່ຍັງບໍ່ທັນໃຫ້ຜົນຜະລິດໃສ່ປຸ໋ຍວິທະຍາສາດສູດ 15-15-15 ໃນອັດຕາສ່ວນ 0,5 ກິໂລກຣາມຕໍ່ຕົ້ນຕໍ່ປີ, ແບ່ງໃສ່ 2-3 ຄັ້ງ, ສ່ວນ ຕົ້ນທີ່ໃຫ້ຜົນຜະລິດແລ້ວກໍ່ສາມາດ ແບ່ງໄລຍະການໃຫ້ປຸ໋ຍດ້ວຍບຳ ລຸງຕົ້ນໃຊ້ປຸ໋ຍວິທະຍາສາດສູດ 15-15-15, ສ່ວນໄລຍະອອກດອກຈະໃຊ້ສູດ 8-24-24, ສຳລັບໄລຍະເປັນໝາກ ແມ່ນໃຊ້ສູດ 15- 15-15  ແລະໄລຍະສຸດທ້າຍແມ່ນ ຈະປັບປຸງຄຸນນະພາບຂອງໝາກ ໃຫ້ໃຫຍ່ ແລະ ຫວານໃຊ້ສູດ 13-13-21. ສະເພາະປະລິມານປຸ໋ຍທີ່ໃຊ້ແມ່ນຂຶ້ນຢູ່ກັບອາຍຸຂອງຕົ້ນ ແລະຜົນຜະລິດຈາກຕົ້ນ, ເຊິ່ງອັດຕາ ທີ່ໃຊ້ຢູ່ລະຫວ່າງ 2-4 ກິໂລ ກຣາມຕໍ່ຕົ້ນຕໍ່ປີ.

  ສ່ວນການໃຫ້ນໍ້າໃນໄລຍະການປູກໃໝ່ຈຳເປັນຕ້ອງໃຫ້ນໍ້າຢ່າງສະໝໍ່າສະເໝີເພາະຈະຊ່ວຍໃຫ້ໝາກຂຽບຈະເລີນເຕີບໂຕໄດ້ໄວ, ຈຳນວນລອດຕາຍສູງ, ໝາກຂຽບຈະເລີ່ມໃຫ້ໝາກໄດ້ໃນປີທີ 2, ຖ້າໃຫ້ນໍ້າແກ່ຕົ້ນໝາກຂຽບສະໝໍ່າສະເໜີຈະຊ່ວຍໃຫ້ຂະໜາດຂອງໝາກໃຫຍ່ ແລະມີຄຸນນະພາບດີ.

-----------------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์