ມອບ-ຮັບອາຄານພະແນກ ວຕ ແລະ ປທສ ແຂວງຄຳມ່ວນ

   ວັນ 19 ກໍລະກົດ 2019 ໄດ້ຈັດພິທີມອບ-ຮັບອາຄານ 2 ຫຼັງຢ່າງເປັນທາງການຄື: ອາຄານພະແນກວິທະຍາສາດ ແລະເຕັກໂນໂລຊີ (ວຕ) ແຂວງ ແລະພະແນກໄປສະນີ, ໂທລະຄົມມະນາຄົມ ແລະການສື່ສານ (ປທສ) ແຂວງຄຳມ່ວນ (ຢູ່ທີ່ບໍລິເວນປ່າສັກຕິດກັບເສັ້ນທາງເລກທີ 13 ໃຕ້) ໃນພິທີດັ່ງກ່າວໂດຍການເປັນກຽດເຂົ້າຮ່ວມຂອງ ທ່ານ ໂອໄດ ສຸດາພອນ ເຈົ້າແຂວງໆຄໍາມ່ວນ, ມີທ່ານຮອງລັດຖະມົນຕີກະຊວງ ວຕ ແລະ ກະຊວງ ປທສ , ທ່ານຫົວໜ້າພະ ແນກອ້ອມຂ້າງແຂວງ, ແຂກຖືກເຊີນ, ບໍລິສັດທີ່ປຶກສາ ແລະບໍລິສັດຜູ້ຮັບເໝົາກໍ່ສ້າງຕະຫຼອດເຖິງພະນັກງານວິຊາການເຂົ້າຮ່ວມ .

ອາຄານພະແນກ ປທສ ແຂວງເປັນອາຄານ 3 ຊັ້ນຂະໜາດກວ້າງ 13 ແມັດ, ຍາວ 35 ແມັດ, ປະກອບມີຫ້ອງເຮັດວຽກ 20 ຫ້ອງ, ຫ້ອງປະຊຸມໃຫຍ່ບັນ ຈຸ 50 ຄົນ ຈໍານວນ 1 ຫ້ອງ, ຫ້ອງ ປະຊຸມນ້ອຍບັນຈຸ 20  ຄົນ ຈໍານວນ 1 ຫ້ອງ, ຫ້ອງຝຶກອົບຮົມ 1 ຫ້ອງ, ຫ້ອງນໍ້າ 13 ຫ້ອງ, ໂຄງສ້າງເສົາ-ຄານເຮັດ ດ້ວຍເບຕົງເສີມເຫຼັກ, ຝາກໍ່ດ້ວຍດິນຈີ່, ໂຄງຫຼັງຄາເຫຼັກມຸງດ້ວຍຊີແຟັກສີຟ້າ, ພື້ນປູກະໂລ, ຕິດຕັ້ງລະບົບໄຟຟ້າ, ແອເຢັນໃນອາຄານ, ຕິດຕັ້ງໝໍ້ແປງໄຟ ຟ້າ 50 KVA ຄົບຊຸດ, ບ່ອນຈອດລົດ, ຫຼັກທຸງ, ຮົ້ວອ້ອມ ແລະລະບົບຕົກແຕ່ງເດີ່ນຄົບຊຸດ .

ສໍາລັບອາຄານພະແນກ ວຕ ແຂວງເປັນອາຄານ 3 ຊັ້ນຂະໜາດກວ້າງ 13 ແມັດ, ຍາວ 29 ແມັດ, ປະກອບມີຫ້ອງເຮັດວຽກ 12 ຫ້ອງ,ຫ້ອງປະຊຸມໃຫຍ່ບັນຈຸ 50 ຄົນ ຈໍານວນ 1 ຫ້ອງ, ຫ້ອງນໍ້າ 12 ຫ້ອງ, ໂຄງສ້າງເສົາ-ຄານເຮັດດ້ວຍເບຕົງເສີມເຫຼັກ, ຝາກໍ່ດ້ວຍດິນຈີ່, ໂຄງຫຼັງຄາເຫຼັກມຸງດ້ວຍຊີແຟັກສີ ແດງ, ພື້ນປູກະໂລ, ຕິດຕັ້ງລະບົບໄຟຟ້າ, ແອເຢັນໃນອາຄານ, ຕິດຕັ້ງໝໍ້ແປງໄຟຟ້າ 50 KVA ຄົບຊຸດ, ບ່ອນຈອດລົດ, ຫຼັກທຸງ, ຮົ້ວອ້ອມ ແລະ ລະບົບຕົກແຕ່ງເດີ່ນຄົບຊຸດ.

 ຊຶ່ງການກໍ່ສ້າງອາຄານທັງ 2 ພະແນກມີມູນຄ່າ 9 ຕື້ກວ່າກີບ ໃນນັ້ນອາຄານພະແນກ ປທສ ແຂວງມີມູນຄ່າກໍ່ ສ້າງ 5,27 ຕື້ກີບ, ສ່ວນອາຄານພະແນກ ວຕ ແຂວງມີມູນຄ່າກໍ່ສ້າງ 4,5  ຕື້ກີບ ໂຄງການກໍ່ສ້າງອາຄານພະແນກ ວຕ ແລະ ປທສ ແຂວງໂດຍແມ່ນບໍລິສັດ ໄຊສົມພົງ ກໍ່ສ້າງເຄຫາສະຖານ ແລະ ຂົວທາງຈໍາກັດເປັນຜູ້ຮັບເໝົາກໍ່ສ້າງ, ບໍລິສັດລັດວິສາຫະກິດກໍ່ສ້າງ ແລະສໍາຫຼວດອອກແບບເຄຫາສະຖານແຂວງເປັນທີ່ປຶກສາ ແລະ ດໍາເນີນການຄຸ້ມຄອງ, ຕິດຕາມການກໍ່ສ້າງໂດຍແມ່ນເປັນເຈົ້າຂອງໂຄງການຮ່ວມຂອງພະແນກ ວຕ ແລະ ປທສ ແຂວງໂດຍໂຄງການດັ່ງກ່າວໄດ້ເລີ່ມລົງມືກໍ່ສ້າງມາແຕ່ເດືອນສິງ ຫາ 2017 ແລະໄດ້ສຳເລັດໃນວັນທີ 11 ກໍລະກົດ 2019 .

  ຈາກນັ້ນທ່ານ ນາງ ໄພບູນ ໄຊຍະກຸມມານ ຫົວໜ້າພະແນກ ວຕ ແຂວງຕາງໜ້າເຈົ້າຂອງໂຄງການຂຶ້ນກ່າວຮັບອາຄານໃໝ່ທັງ 2 ຫຼັງ, ເປັນກຽດເຊັນສັນ ຍາໂດຍແມ່ນຫົວໜ້າທັງສອງພະແນກ ແລະຕາງໜ້າບໍລິສັດຜູ້ຮັບເໝົາກໍ່ສ້າງ.

---------------------------------

ຂຽນໂດຍ: ແດງສະຫວັດ ແສນພານິດ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์