ຄວາມໝາຍຂອງລູກນິມິດ

 ນິມິດແປວ່າເຄື່ອງໝາຍ ຫຼື ວັດຖຸທີ່ໃຊ້ເປັນເຄື່ອງໝາຍເຂດແຫ່ງສີມາວັດຕ່າງໆຊຶ່ງມີທັງໝົດ 9 ລູກ ໃນນັ້ນ1ລູກ ເປັນນິມິດເອກຕັ້ງຢູ່ກາງສີມາເພື່ອເປັນການຖວາຍບູຊາພະພຸດເຈົ້າ, ສ່ວນຈໍານວນ 8 ລູກ ຈະຖືກຈັດໃຫ້ຢູ່ຕາມທິດຕ່າງໆອ້ອມຮອບສີມາເອີ້ນວ່າທິດທັງ 8 ມີຄວາມໝາຍເປັນມຸງຄຸນຄືເປັນອົງແທນພະອໍຣະຫັນສາວົກ.

ອີງຕາມຂໍ້ມູນຈາກເວັບໄຊ໌ທັມມະລາວໃຫ້ຮູ້ວ່າ:ນິມິດເປັນເຄື່ອງໝາຍເຂດແຫ່ງສີມາ,ມີທັງໝົດ 9 ລູກຄື: 1) ນິມິດລູກເອກເປັນລູກທີ່ມີຄວາມສໍາຄັນຫຼາຍຖືເປັນປະທານຂອງລູກນິມິດທັງໝົດຈະຝັງ ໄວ້ບໍລິເວນໃຈກາງສີມາໂດຍອ້ອມດ້ວຍລູກນິມິດ 8 ລູກຊຶ່ງເປັນການຖວາຍບູຊາພະພຸດທະເຈົ້າຜູ້ເປັນພະປະມຸກແຫ່ງສົງເປັນການອັນເຊີນແລະບູຊາພະເກດເທບຜູ້ຮັກສາສະຖານທີ່ສ່ວນກາງຂອງສີມາ; 2) ທິດຕາເວັນອອກ (ບູຣະພາ)ລູກທີ່ຢູ່ດ້ານໜ້າຂອງສີມາຖືເປັນລູກນິມິດບໍລິວານທີ່ມີຄວາມໂດດເດັ່ນເປັນພິເສດເປັນລູກທຳອິດທີ່ເລີ່ມ ນັບດັ່ງນັ້ນຈຶ່ງປຽບນິມິດລູກນີ້ ເໝືອນປະຖົມສາວົກຂອງພະພຸດທະເຈົ້າຄືພະອັນຍາໂກນທັນຍະພະ ອັຄຣະສາວົກຜູ້ໄດ້ຮັບຍົກຍ້ອງວ່າ ເປັນເອຕທັຄຄະຜູ້ຮູ້ຣາຕີກາລະນານຄືມີຄວາມຮູ້ຫຼາຍຜ່ານໂລກມາຫຼາຍການຝັງລູກນິມິດໄວ້ດ້ານນີ້ເພື່ອເປັນການບູຊາພະອັນຍາໂກນທັນຍະເປັນການອັນເຊີນແລະບູຊາພະຈັນເທບຜູ້ຮັກສາສະຖານທີ່ສ່ວນດ້ານໜ້າຂອງສີມາ; 3) ທິດຕາເວັນອອກສ່ຽງໃຕ້ (ອາຄະເນ) ຢູ່ດ້ານໜ້າຝັ່ງຂວາຂອງສີມາການຝັງລູກນິມິດໄວ້ທິດນີ້ເພື່ອບູຊາພະມະຫາກັສປະເຖຣະພະອັຄຣະສາວົກຜູ້ໄດ້ ຮັບການຍົກຍ້ອງວ່າເປັນເອຕທັຄ ຄະຜູ້ຊົງທຸດົງໃນຕໍ່ມາໄດ້ເປັນປະທານສົງທຳສັງຄາຍະນາເປັນການ ອັນເຊີນ ແລະບູຊາພະອັງຄານເທບຜູ້ຮັກສາສະຖານທີ່ທາງດ້ານທິດຕາເວັນອອກສ່ຽງໃຕ້ຂອງສີມາອີກ ອົງໜຶ່ງ.

ສ່ວນລູກນິມິດ ທີ 4) ທິດໃຕ້ (ທັກສິນ)ເປັນລູກນິມິດທີ່ຢູ່ທາງດ້ານຂວາຂອງສີມາເປັນການບູຊາພະສາລີບຸດພະອັຄຣະສາວົກຝ່າຍຂວາຜູ້ໄດ້ຮັບການຍົກຍ້ອງວ່າເປັນເອຕທັຄຄະຜູ້ເລີດໃນທາງປັນຍາເປັນການອັນເຊີນແລະບູຊາພະພຸດເທບຜູ້ຮັກສາສະຖານທີ່ດ້ານທິດໃຕ້ຂອງສີມາ; 5) ທິດຕາເວັນຕົກສ່ຽງໃຕ້ (ຫໍຣະດີ)ທິດດ້ານຫຼັງຝັ່ງຂວາຂອງສີມາການຝັງລູກນິມິດທາງດ້ານນີ້ເພື່ອບູຊາພະອຸບາລີເຖຣະພະອັຄຣະສາວົກຜູ້ ໄດ້ຮັບການຍົກຍ້ອງວ່າເປັນເອຕທັຄຄະຜູ້ເລີດໃນທາງວິໄນເປັນການອັນເຊີນ ແລະບູຊາພະເສົາຊຶ່ງເປັນເທບໜຶ່ງໃນນົບເຄາະທັງ 9 ຄື ເທບຜູ້ດູແລຮັກສາສະຖານທີ່ດ້ານຕາເວັນຕົກສ່ຽງໃຕ້ຂອງສີມາ; 6) ທິດຕາເວັນຕົກ (ປະຈິມ) ເປັນລູກນິມິດທີ່ຝັງຢູ່ດ້ານຫຼັງຂອງສີມາເປັນເຄື່ອງໝາຍຂອງເງົາຊຶ່ງປຽບໄດ້ກັບພະເຖຣະທີ່ເປັນພຸດທະອຸບຖາຄອຍເຝົ້າຕິດຕາມຮັບໃຊ້ພະພຸດທະອົງເໝືອນເງົາຕາມໂຕດັ່ງນັ້ນການຝັງລູກນິມິດທາງທິດນີ້ເພື່ອເປັນການບູຊາພະອານົນເຖຣະພະອັຄຣະສາວົກຜູ້ໄດ້ຮັບການຍົກຍ້ອງວ່າເປັນເອຕທັຄຄະຜູ້ເລີດໃນທາງພະຫຸສູດ ແລະເປັນມະຫາພຸດທະອຸບຖາແດ່ພະພຸດທະເຈົ້າ ແລະອັນເຊີນບູຊາພະຫັດເທບຜູ້ຮັກສາທິດຕາ ເວັນຕົກ.

ສໍາລັບລູກນິມິດ ທີ 7) ທິດຕາເວັນຕົກສ່ຽງເໜືອ (ພາຍັບ)ການຝັງລູກນິມິດທີ່ຢູ່ດ້ານຫຼັງຝັ່ງຊ້າຍຂອງສີມານີ້ເປັນການບູຊາພະຄວັມປະຕິເຖຣະພະອັຄຣະສາວົກຜູ້ໄດ້ຮັບການຍົກຍ້ອງວ່າເປັນເອຕທັຄຄະຜູ້ເລີດໃນທາງລາບສັກຣະແລະຮູບງາມ ແລະອັນເຊີນບູຊາພະຣາຫູຊຶ່ງເປັນເທບປະຈຳທິດນີ້; (8) ທິດເໜືອ (ອຸດອນ) ລູກນິມິດທີ່ຝັ່ງທາງດ້ານນີ້ຖືວ່າເປັນລູກທີ່ສໍາຄັນອີກລູກໜຶ່ງຊຶ່ງຢູ່ດ້ານຊ້າຍຂອງສີມາເພື່ອເປັນການບູຊາພະໂມຄຄັລລານະພະອັຄຣະສາວົກຝ່າຍຊ້າຍຂອງພະພຸດທະເຈົ້າຜູ້ໄດ້ຮັບການຍົກຍ້ອງວ່າເປັນເອຕທັຄຄະຜູ້ເລີດໃນທາງສະແດງລິດແລະອັນເຊີນບູຊາພະສຸກເທບຜູ້ຮັກສາປະຈຳທິດນີ້; 9) ທິດຕາເວັນອອກສ່ຽງເໜືອ (ອີສານ)ລູກນິມິດທີ່ຝັ່ງຢູ່ດ້ານໜ້າຝັ່ງຊ້າຍຂອງສີມາທາງທິດເໜືອນີ້ເປັນເຄື່ອງໝາຍ ແຫ່ງຄວາມຜູກພັນມີຜົນທາງດ້ານຈິດໃຈຖືເປັນທິດສຸດທ້າຍເພື່ອເປັນການບູຊາພະຣາຫຸນເຖຣະຊຶ່ງເປັນພະໂອລົດຂອງເຈົ້າຊາຍສິດທັດຖະພະອັຄຣະສາວົກຜູ້ໄດ້ຮັບການຍົກຍ້ອງວ່າເປັນເອຕທັຄຄະຜູ້ເລີດໃນການສຶກສາ ແລະອັນເຊີນບູຊາພະອາທິດເທບຜູ້ຮັກສາປະຈຳທິດນີ້.

 ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์