ເຄິ່ງປີທ່ອງທ່ຽວແຂວງເຊກອງ ສ້າງລາຍຮັບໄດ້ 33 ຕື້ກວ່າກີບ

 (ເຊກອງ, ວັນທີ 19/07/ 2019) ໄລຍະຜ່ານມາແຂວງເຊກອງໄດ້ເອົາໃຈໃສ່ໃນການໂຄສະນາສະຖານທີ່ທ່ອງທ່ຽວຕ່າງໆ ໂດຍ ໃນໄລຍະຜ່ານມາແມ່ນໄດ້ມີກາສ້າງປ້າຍໂຄສະນາແຫຼ່ງທ່ອງທ່ຽວ,ຜະລິດແຜ່ນພັບ,ປົດສະເຕີ,ໂລໂກ້ ການທ່ອງທ່ຽວ ແລະປ້າຍຄຳຂວັນຕ່າງໆ,ນອກນັ້ນຍັງໄດ້ຮ່ວມການວາງສະແດງສິນຄ້າຜະລິດຕະພັນການທ່ອງທ່ຽວຢູ່ພາຍໃນແລະຕ່າງປະເທດຊຶ່ງເຮັດໃຫ້ໃນ6ເດືອນຕົ້ນປີ 2019 ສາມາດດຶງດູດນັກທ່ອງທ່ຽວທັງພາຍໃນແລະຕ່າງປະເທດໄດ້ເຖິງ 21.145 ເທື່ອຄົນ,ສາມາດສ້າງລາຍຮັບໄດ້ 33 ຕື້ກວ່າກີບ.

ວັນທີ 19 ກໍລະກົດ 2019 ແຂວງເຊກອງ ໄດ້ຈັດກອງປະຊຸມ ສະຫຼຸບຕີລາຄາຄືນການຈັດຕັ້ງປະ ຕິບັດວຽກງານຂະແໜງຖະແຫຼງ ຂ່າວ,ວັດທະນະທໍາ ແລະທ່ອງ ທ່ຽວ (ຖວທ) ໃນທົ່ວແຂວງປະຈໍາ 6 ເດືອນຕົ້ນປີ ແລະວາງທິດ ທາງແຜນການ 6 ເດືອນ ທ້າຍປີ 2019 ໂດຍການເປັນປະທານຂອງ ທ່ານ ບູ່ໄຊ ໄຊຍະເສນ ກໍາມະການພັກແຂວງ, ຫົວໜ້າພະແນກຖວທ ແຂວງ; ພ້ອມນີ້ກໍມີທ່ານຮອງເຈົ້າ ເມືອງ,ສະມາຊິກສະພາປະຊາຊົນແຂວງ, ບັນດາພະແນກ,  ຫ້ອງການ ແລະວິຊາການກ່ຽວຂ້ອງເຂົ້າຮ່ວມ.

ທ່ານ ຈັນໄທ ຄໍາມະນີວົງຮອງຫົວໜ້າພະແນກ ຖວທ ແຂວງເຊກອງໄດ້ລາຍງານວ່າ: ໃນໄລຍະຜ່ານມາພະແນກ ຖວທ ແຂວງເຊ ກອງໄດ້ມີການໂຄສະນາວຽກງານການທ່ອງທ່ຽວຜ່ານວິທະຍຸ,ໂທລະພາບ,ວາລະສານ-ໜັງສືພິມສື່ອອນລາຍຕ່າງໆ,ຜະລິດແຜ່ນພັບ,ປົດສະເຕີ, ໂລໂກ້ການທ່ອງທ່ຽວ,ປ້າຍໂຄສະນາ ແລະປ້າຍຄໍາຂວັນຕ່າງໆ.

ພ້ອມດຽວກັນນັ້ນກໍຍັງຊຸກຍູ້ສົ່ງເສີມກິດຈະກໍາທີ່ຕິດພັນກັບວຽກງານການທ່ອງທ່ຽວເປັນຕົ້ນແມ່ນງານບຸນປະເພນີເຜົ່າກະຕູບ້ານກັນດອນໃໝ່ເມືອງທ່າແຕງ,ບຸນປະ ເພນີເຜົ່າຖ່ານບ້ານໂນນໜອງຫວ້າ ເມືອງລະມາມ, ງານບຸນຊ່ວງເຮືອແພເມືອງດາກຈຶງ,ພິທີແຮ່-ສົມໂພດຮູບຫຼໍ່ເໝືອນທ່ານອົງແກ້ວຢູ່ເມືອງ ລະມາມ ແລະພິທີເປີດບ້ານແຈະ ເປັນບ້ານທ່ອງທ່ຽວຂອງເມືອງກລຶມ ຊຶ່ງໄດ້ກາຍເປັນຈຸດດຶງດູດນັກທ່ອງທ່ຽວເຮັດໃຫ້ມີນັກທ່ອງທ່ຽວ ເຂົ້າມາແຂວງເຊກອງໃນ 6 ເດືອນ ຜ່ານມາ ມີທັງໝົດ 21.145 ເທື່ອ ຄົນ, ໃນນັ້ນມີນັກທ່ອງທ່ຽວພາຍ ໃນ9.125 ຄົນ, ນັກທ່ອງທ່ຽວ ພາກພື້ນ  7.344 ຄົນ ແລະນັກທ່ອງ ທ່ຽວສາກົນ 4.676 ຄົນ ຊຶ່ງສາ ມາດສ້າງລາຍຮັບໄດ້ທັງໝົດ 33 ຕື້ ກວ່າກີບ ຫຼື ປະມານ 4,222 ລ້ານ ໂດລາ.

ປະຈຸບັນທົ່ວແຂວງເຊກອງ ມີແຫຼ່ງທ່ອງທ່ຽວທັງໝົດ 38 ແຫ່ງ ໂດຍມີແຫຼ່ງທ່ອງທ່ຽວດ້ານທຳມະຊາດ 20 ແຫ່ງ, ປະຫວັດສາດ 9 ແຫ່ງ,ວັດທະນະທຳ 6 ແຫ່ງ ແລະ ແຫຼ່ງທ່ອງທ່ຽວດ້ານກະສິກຳມີ 3 ແຫ່ງ,ຊຶ່ງໃນຈໍານວນທັງໝົດໄດ້ມີການສຳຫຼວດແລ້ວ 11 ແຫ່ງ ແລະ ເປີດນຳໃຊ້ເປັນທາງການແລ້ວ 9 ແຫ່ງ ໂດຍການສໍາປະທານຂອງພາກເອກະຊົນ.ນອກນັ້ນຍັງມີໂຮງ ແຮມ 10 ແຫ່ງ, ເຮືອນພັກ 27 ແຫ່ງ, ຮ້ານອາຫານ 20 ແຫ່ງ ແລະລີສອດ 3 ແຫ່ງ.

ສ່ວນທິດທາງແຜນການເຄື່ອນໄຫວໃນ 6 ເດືອນທ້າຍປີ, ທ່ານ ຮອງຫົວໜ້າພະແນກ ຖວທ ແຂວງ ກ່າວວ່າ: ສືບຕໍ່ຊຸກຍູ້ສົ່ງເສີມວຽກງານການທ່ອງທ່ຽວທາງທໍາມະຊາດ,ປະຫວັດສາດ,ວັດທະນະທໍາແລະດ້ານກະສິກໍາໃຫ້ມີຄວາມຫຼາກ ຫຼາຍສີສັນຮັບປະກັນການພັດທະນາທີ່ຍືນຍົງ ໂດຍການມີສ່ວນຮ່ວມຂອງຊຸມຊົນແລະການບໍລິການທີ່ມີຄຸນນະພາບ,ປັບປຸງກົດລະບຽບການຄຸ້ມຄອງຫົວໜ່ວຍທຸລະກິດຜູ້ປະກອບການໂຮງແຮມ,ເຮືອນພັກ,ຮ້ານອາຫານ,ຮ້ານກິນດື່ມ-ບັນ ເທີງ,ຮ້ານຄາຣາໂອເກະໃຫ້ສອດຄ່ອງຕາມລະບຽບຫຼັກການ ແລະລົງ ເກັບກໍາຂໍ້ມູນດ້ານການທ່ອງທ່ຽວເພື່ອມາໂຄສະນາຜ່ານສື່ຕ່າງໆ ແນໃສ່ດຶງດູດນັກທ່ອງທ່ຽວເຂົ້າທ່ຽວ ແຂວງເຊກອງໃຫ້ຫຼາຍຂຶ້ນ ແລະ ບັນລຸຕາມແຜນທີ່ວາງໄວ້.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์