ໄຊຍະອອກໃບຕາດິນໄດ້ 7 ພັນກວ່າຕອນ

  ຜ່ານມາພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງໄຊຍະບູລີ ໄດ້ມີຄວາມພະຍາຍາມປະຕິບັດວຽກຄຸ້ມຄອງທີ່ດິນໃຫ້ເຂົ້າສູ່ລະບົບ, ສອດຄ່ອງກັບກົດ ໝາຍຊຶ່ງໄດ້ກໍານົດເຂດ, ກຳນົດປະເພດທີ່ດິນ ແລະເປົ້າໝາຍການນຳໃຊ້ທີ່ດິນໃຫ້ເໝາະສົມກັບເງື່ອນໄຂທ່າແຮງຂອງທ້ອງຖິ່ນ, ພັດທະນາທີ່ດິນໃຫ້ມີມູນຄ່າເພີ່ມ, ສ້າງລາຍຮັບຈາກທີ່ດິນໃຫ້ຫຼາຍ, ລີກເວັ້ນຜົນສະທ້ອນທາງລົບດ້ານສິ່ງແວດລ້ອມ ແລະສັງຄົມ, ຂຶ້ນທະບຽນອອກໃບຕາດິນຕາມແຜນຈັດສັນທີ່ດິນ, ຮັບປະກັນການປົກຫຸ້ມປ່າໄມ້ໃຫ້ກວມ 70% ຂຶ້ນໄປ, ໂດຍສ້າງເປັນໂຄງການ, ເປັນແຜນງານຈັດຕັ້ງປະຕິບັດຢ່າງເປັນລະບົບ.

 ທ່ານ ສົມຈິດ ຈັນທະວົງຫົວ ໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງໄດ້ໃຫ້ຮູ້ວ່າ: ຜ່ານມາແມ່ນໄດ້ສືບຕໍ່ສຸມໃສ່ການຈັດສັນທີ່ດິນຂັ້ນບ້ານ, ປະຈຸບັນສໍາເລັດແລ້ວ 239 ບ້ານ, ທຽບໃສ່ບ້ານໃນທົ່ວແຂວງເທົ່າກັບ 55,32%, ໃນນັ້ນປະຕິບັດ 6 ເດືອນ ຕົ້ນປີໄດ້ 29 ບ້ານ, ເທົ່າກັບ 35,36% ຂອງແຜນ ການປີ ແລະຈັດສັນຂັ້ນເມືອງສຳເລັດ 2 ເມືອງຄື: ເມືອງໄຊຍະບູລີ ແລະ ເມືອງແກ່ນທ້າວ.

 ການອອກໃບຕາດິນຢູ່ແຂວງຜ່ານມາໄດ້ແບ່ງເປັນ 3 ໄລຍະຄື: ໄລຍະທີ 1 ເລີ່ມແຕ່ປີ 2002–2008 ແມ່ນການຄຸ້ມຄອງການອອກໃບຕາດິນຂອງຂະແໜງທີ່ດິນ, ທີ່ຂຶ້ນກັບພະແນກການເງິນແຂວງ; ໄລຍະທີ 2 ແຕ່ ປີ 2008-2012 ໂດຍແມ່ນການຄຸ້ມຄອງຂອງອົງການຄຸ້ມຄອງທີ່ດິນແຂວງ ແລະ ໄລຍະທີ 3 ແຕ່ ປີ 2013-2019 ແມ່ນການຄຸ້ມຄອງຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມຊຶ່ງຮອດປະຈຸບັນທົ່ວແຂວງອອກໃບຕາດິນໄດ້ທັງໝົດ 98,7 ພັນຕອນ; ສະ ເພາະປີ 2016-2019(3 ປີ 6 ເດືອນ) ອອກໃບຕາດິນໄດ້ທັງໝົດ 38,07 ພັນຕອນ, ທຽບໃສ່ແຜນການ 5 ປີ, ປະຕິບັດໄດ້ 127%; ໃນນັ້ນແຜນການອອກໃບຕາດິນ ປີ 2019 ມີ 12,5 ພັນຕອນ,ໃນ 6 ຕົ້ນປີນີ້ ປະຕິບັດໄດ້ 7,3 ພັນຕອນ, ເທົ່າກັບ 58,52% ຂອງແຜນການປີ, ພ້ອມກັນນັ້ນກໍ່ໄດ້ຂຶ້ນສຳມະໂນທີ່ດິນໄດ້ 2,96 ແສນຕອນດິນ, ເນື້ອທີ່  2,03 ແສນເຮັກຕາ, ໃນນັ້ນໄດ້ເອົາເຂົ້າໃນຖານລະບົບຂໍ້ມູນທີ່ດິນ (ເອີ້ນວ່າຂຶ້ນສຳມະໂນທີ່ດິນທີ່ຖືກຕ້ອງຊັດເຈນ) ໄດ້ຈຳນວນ 98.5 12 ຕອນ, ກວມເອົາ 33%.

  ປະຈຸບັນພວມເຮັດທົດລອງການເກັບກໍາຂໍ້ມູນສໍາມະໂນທີ່ດິນດ້ວຍລະບົບທີ່ທັນສະໄໝ, ໄດ້ກວດກາຄືນເນື້ອທີ່ການເຊົ່າແລະສໍາປະທານທີ່ດິນສຳເລັດໃນທົ່ວແຂວງມີທັງ ໝົດ 280 ໂຄງການ, ມີ 421 ຕອນ, ເນື້ອທີ່ 1,85 ແສນເຮັກຕາ, ໃນນັ້ນ: ກິດຈະການເຊົ່າ ມີ 159 ໂຄງການ, ມີ 278 ຕອນ, ເນື້ອທີ່ 124,58 ເຮັກຕາ, ສໍາປະທານມີ 121 ໂຄງການ, ມີ 143 ຕອນ, ເນື້ອທີ່1,85 ແສນເຮັກຕາ.

  ສໍາລັບບັນຫາການອອກໃບຕາດິນຊໍ້າຊ້ອນກັນທີ່ເກີດຂຶ້ນຢູ່ແຂວງໄຊຍະບູລີມີ 10 ກໍລະນີ ແຕ່ຕົວຈິງທີ່ຊໍ້າຊ້ອນມີພຽງແຕ່ 5 ກໍລະນີ, ແຕ່ລະກໍລະນີແມ່ນເຈົ້າຂອງດິນນໍາເອົາໃບຕາດິນໄປຊວດຈໍາ ຫຼື ຄໍ້າປະກັນການກູ້ຢືມກັບບຸກຄົນອື່ນໂດຍບໍ່ໄດ້ຜ່ານການຈົດທະບຽນທີ່ຖືກຕ້ອງຕາມລະບຽບກົດໝາຍ.

-------------------------

ຂຽນໂດຍ: ອຸ່ນເຮືອນ ໂພທິລັກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์