ຮອງລັດຖະມົນຕີ ເນັ້ນສາທາອຸດົມໄຊເອົາໃຈໃສ່ຫຼາຍບັນຫາ

  ໃນໂອກາດທີ່ ທ່ານ ຄໍາພອນ ພຸດທະວົງ ຮອງລັດຖະມົນຕີກະຊວງສາທາລະນະສຸກລົງເຄື່ອນໄຫວເຮັດວຽກຢູ່ແຂວງອຸດົມໄຊທ່ານໄດ້ຖືໂອກາດດັ່ງກ່າວພົບປະໂອ້ລົມພະ ນັກງານຫຼັກແຫຼ່ງໃນຂະແໜງສາທາລະນະສຸກແຂວງອຸດົມໄຊຊຶ່ງພິທີໂອ້ລົມໄດ້ຈັດຂຶ້ນໃນວັນທີ 18 ກໍລະກົດ ທີ່ຫ້ອງປະຊຸມພະແນກສາທາລະນະສຸກແຂວງໂດຍມີບັນດາຄະນະພະແນກ, ຄະນະອໍານວຍການໂຮງຮຽນສາທາລະນະສຸກ, ໂຮງໝໍຕະຫຼອດຮອດພະນັກງານວິຊາການພາຍໃນຂະແໜງສາທາເຂົ້າຮ່ວມຮັບຟັງ.

 ເພື່ອເຮັດໃຫ້ການເຄື່ອນໄຫວຈັດຕັ້ງປະຕິບັດວຽກງານຂອງຂະແໜງສາທາລະນະສຸກ ແຂວງອຸດົມໄຊ ລວມທັງໂຮງຮຽນສາທາລະນະສຸກແຂວງ, ໂຮງໝໍແຂວງສືບຕໍ່ຈັດ ຕັ້ງປະຕິບັດວຽກງານຂອງຕົນໄປຕາມທິດທາງແຜນການອັນລວມ ແລະອັນສະເພາະຂອງຕົນເອງໂດຍອີງໃສ່ພາລະບົດບາດ, ສິດ, ໜ້າທີ່, ຫຼັກການ ແລະ ລະບຽບຫຼັກ ການແນໃສເຮັດໃຫ້ວຽກງານມີການຂະ ຫຍາຍຕົວ ແລະໄດ້ຮັບຜົນສຳເລັດຕາມ ລະດັບຄາດໝາຍ ທ່ານ ຄຳພອນ ພຸດທະວົງ ໄດ້ເນັ້ນໜັກໃຫ້ພະນັກງານຫຼັກແຫຼ່ງໃນຂະແໜງສາທາລະນະສຸກແຂວງອຸດົມ ໄຊເອົາໃຈໃສ່ແຕ່ລະບັນຫາ ໂດຍສະເພາະແມ່ນສືບຕໍ່ຊີ້ນຳໆພາທາງດ້ານການເມືອງແນວຄິດໃຫ້ແກ່ພະນັກງານລັດຖະກອນດ້ວຍການເຜີຍແຜ່, ເຊື່ອມຊຶມບັນດາແນວທາງນະໂຍບາຍ, ນິຕິກຳ, ລະບຽບກົດໝາຍຕ່າງໆ, ປັບປຸງແບບແຜນວິທີການເຮັດວຽກ, ແບ່ງຄວາມຮັບຜິດຊອບໃຫ້ແຕ່ລະພາກ ສ່ວນ ແລະບຸກຄົນຢ່າງລະອຽດ, ເພີ່ມທະວີການພົວພັນປະສານງານລະຫວ່າງພະແນກກັບໂຮງຮຽນ, ໂຮງໝໍ, ມີຄວາມສາມັກຄີປອງດອງພາຍໃນໝູ່ຄະນະ ແລະ ຂົງ ເຂດອ້ອມຂ້າງ, ປັບປຸງກົງຈັກການຈັດຕັ້ງພະນັກງານໃຫ້ມີຄວາມສອດຄ່ອງ ແລະເໝາະສົມກັບວຽກງານຕົວຈິງ, ເພີ່ມຄວາມຮັບຜິດຊອບ, ເອົາໃຈໃສ່ຈັດຕັ້ງປະຕິບັດພາ ລະບົດບາດຂອງຕົນຢ່າງເຂັ້ມງວດ, ປະຕິບັດວຽກງານແຜນການການເງິນໄປຕາມແຜນການພ້ອມທັງມີການກວດສອບຢ່າງລະອຽດ, ສືບຕໍ່ຄວາມຄຸມພະຍາດລະບາດ ໂດຍສະເພາະແມ່ນພະຍາດໄຂ້ເລືອດອອກທີ່ກໍາລັງລະບາດຫຼາຍໃນຊ່ວງນີ້, ອາຫານເປັນຜິດ ແລະອື່ນໆ, ປັບປຸງຂອດການບໍລິການໃຫ້ມີຄຸນນະພາບ, ສະດວກສະບາຍ, ສືບຕໍ່ສ້າງແຜນງົບປະມານປະຈຳປີ 2020 ແລະແຜນ 5 ປີ ໂດຍຕິດພັນກັບບົດລາຍງານການເມືອງຂອງພະແນກສາທາລະນະສຸກແຂວງອຸດົມໄຊ.

--------------------------

ຂຽນໂດຍ: ຄານມະນີ ຮຽນດໍຈັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 19/07/2019