ຜົ້ງສາລີ ປ່ອຍປາ 1,24 ແສນໂຕ ສູ່ແຫຼ່ງນໍ້າທໍາມະຊາດ

  ອົງການປົກຄອງແຂວງຜົ້ງສາລີ ຮ່ວມກັບພະແນກກະສິກໍາ ແລະປ່າໄມ້ ແລະເມືອງຜົ້ງສາລີ ໄດ້ຈັດພິທີປ່ອຍປາຈໍານວນ 1,24 ແສນໂຕ ເນື່ອງໃນໂອກາດວັນອະນຸລັກສັດນໍ້າ-ສັດປ່າ ແຫ່ງຊາດຂຶ້ນໃນວັນທີ 13 ກໍລະກົດ 2019 ທີ່ແຄມແມ່ນໍ້າອູເຂດບ້ານຫາດສາ ແລະໜ້າສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ, ມີທ່ານຫົວໜ້າພະແນກກະສິກໍາ ແລະປ່າໄມ້ແຂວງພ້ອມດ້ວຍອົງການປົກຄອງເມືອງແລະພໍ່ແມ່ປະຊາຊົນ ເມືອງຜົ້ງສາລີ ເຂົ້າຮ່ວມຢ່າງຫຼວງຫຼາຍ.

  ທ່ານ ນາງ ດວງຈັນ ຊາມຸນຕີ ຫົວໜ້າພະແນກກະສິກໍາ ແລະປ່າ ໄມ້ແຂວງໄດ້ກ່າວວ່າ ຂະບວນ ການປ່ອຍປາໄດ້ຈັດຕັ້ງປະຕິບັດມາແຕ່ລະປີຍ້ອນເຫັນໄດ້ຄວາມໝາຍ ແລະ ຄວາມສໍາຄັນຂອງການປ່ອຍປາຄືນສູ່ທໍາມະຊາດ ສປປ ລາວ ຈຶ່ງໄດ້ກໍານົດເອົາວັນທີ 13 ກໍລະກົດ ຂອງທຸກໆປີເປັນວັນປ່ອຍປາແຫ່ງຊາດມາຮອດປີ 2019 ໄດ້ປ່ອຍປາ ແລະສັດນໍ້າຈໍານວນຫຼາຍແສນໂຕເຮັດໃຫ້ສັດນໍ້າທີ່ຢູ່ຕາມທໍາມະຊາດມີການຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ

 ໃນປີ 2019 ນີ້ ພະແນກກະສິກໍາ ແລະປ່າໄມ້ແຂວງຜົ້ງສາລີຈະສູ້ຊົນປ່ອຍປາຢູ່ໃນ 7 ເມືອງ ຂອງແຂວງໃຫ້ໄດ້ທັງໝົດປະມານ 2 ແສນກວ່າໂຕ;ນອກນີ້ຍັງຈະລະດົມໃຫ້ປະຊາຊົນປ່ອຍປາຕື່ມອີກກວ່າໂຕເພື່ອເປັນການຂະຫຍາຍພັນປາຕາມທໍາມະຊາດສ້າງຄວາມສົມດູນທາງດ້ານລະບົບນິເວດວິທະຍາ ແລະ ເພີ່ມປະລິມານທາງດ້ານສະ ບຽງອາຫານ.

  ສໍາລັບປາທີ່ນຳໄປປ່ອຍໃນຄັ້ງນີ້ປະກອບມີປາເກັດແລບ, ປາຫົວໃຫຍ່, ປາກິນຫຍ້າ ແລະປາອິນເດຍ ຈຳນວນ 1,24 ແສນໂຕ ມີ ມູນຄ່າ 60 ລ້ານກວ່າກີບ ທຽບໃສ່ປີຜ່ານມາເພີ່ມຂຶ້ນ 37,7%.

ໂອກາດດັ່ງກ່າວພະແນກກະສິກຳ ແລະປ່າໄມ້ຍັງໄດ້ມອບໃບຍ້ອງຍໍໃຫ້ບໍລິສັດພັດທະນາໄຟຟ້ານໍ້າອູໄລຍະທີ 1 ທີປະກອບສ່ວນຊ່ວຍເຫຼືອທຶນໃນການປ່ອຍປາແຕ່ປີ 2018 ຜ່ານມານອກນີ້ແຂວງ ແລະ ເມືອງຜົ້ງສາລີກໍ່ມອບອຸປະກອນການຮຽນໃຫ້ແກ່ນ້ອງນັກຮຽນໂຮງຮຽນບ້ານຫາດສາຕື່ມອີກ.

----------------------------

ຂຽນໂດຍ: ສົມຄິດ ແກ້ວນວນລາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์