ຕີ໋ ອຸດາໄລ ປ່ອຍເພງ ມ7 ສື່ເຖິງມິດຕະພາບ ຊີວິດນັກຮຽນ

 ພາຍຫຼັງທີ່ເພງ ມ5 ໄດ້ເປັນກະແສໂດ່ງດັງແລະໄດ້ຮັບຄວາມນິຍົມໃນຄື້ນວິທະຍຸ 7-8 ປີຜ່ານມາໂດຍສະເພາະກຸ່ມໄວໜຸ່ມເປັນຈໍານວນຫຼາຍທີ່ໃຫ້ຄວາມສົນໃຈເພາະມັນໄດ້ສື່ເຖິງຄວາມຫຼັງເມື່ອຍັງເປັນນັກຮຽນມີທັງມິດຕະພາບທີ່ດີຂອງໝູ່ເພື່ອນ ແລະຄວາມມ່ວນຊື່ນໃນໄວນັ້ນເພງດັ່ງກ່າວຮ້ອງໂດຍໜຸ່ມ ຕີ໋ ອຸດາໄລປະຈຸບັນແມ່ນໄດ້ສ້າງຜົນງານເພງໃໝ່ ມ7 ແລະໄດ້ປ່ອຍລົງຢູທູບໄປແລ້ວໃນໄລຍະການສອບ ເສັງຈົບຊັ້ນ ມ7 ທົ່ວປະເທດນີ້.

ໜຸ່ມ ຕີ໋ ອຸດາໄລ ໃຫ້ສໍາພາດວ່າ:ແຮງບັນດານໃຈການເຮັດເພງ “ມ7” ເນື່ອງຈາກວ່າຕົນເອງບໍ່ໄດ້ ມີຜົນງານເພງມາດົນປະມານ 5-6 ປີຍ້ອນມີວຽກງານໃນຄອບຄົວ ຫຼາຍແຕ່ດ້ວຍຈິດໃຈມັກຮັກໃນງານສິນລະປິນການຮ້ອງເພງຈຶ່ງໄດ້ຕັດສິນໃຈວ່າສ້າງເພງດັ່ງນີ້ຂຶ້ນມາໃນເບື້ອງຕົ້ນບໍ່ເຄີຍຄິດທີ່ຈະຂຽນເພງ “ມ7”ເພາະຈາກຜົນງານເພງ “ມ5”  ທີ່ທຸກຄົນຍັງຄົງຈົດຈຳ ແລະນຳໃຊ້ໃນວາລະຕ່າງໆຂອງກິດຈະກຳພົບປະໝູ່ຄູ່ເພງນັ້ນກໍ່ຍັງຖືກໃຊ້ເປັນຕົວແທນແຫ່ງມິດຕະພາບລະ ຫວ່າງໝູ່ເພື່ອນໃນຊີວິດ ມ ປາຍຈົນ ມັນມີຈຸດປ່ຽນຄືຫຼັງຈາກທີ່ຕັດສິນໃຈຄັກແນ່ແລ້ວວ່າຈະກັບມາເຮັດ ເພງອີກຄັ້ງຕົນເອງຈຶ່ງລອງໂພສ ເຟສບຸກຖາມແຟນເພງຫຼິ້ນວ່າ “ຢາກໃຫ້ຂ້ອຍຂຽນເພງແບບໃດ ຫຼາຍທີ່ສຸດ”ປາກົດວ່າສຽງສ່ວນໃຫຍ່ຢາກໃຫ້ຂຽນເພງ ມ7.

ເພງ “ມ7” ມີຄວາມໝາຍສື່ ເຖິງມິດຕະພາບລະຫວ່າງໝູ່ເພື່ອນໃນຊີວິດນັກຮຽນແຕ່ມັນຈະແຕກຕ່າງຈາກເພງ “ມ5”ເພາະກ່າວເຖິງໄລຍະຊີວິດຫຼັງຈາກຈົບ ມ ປາຍເປັນຫຼັກ ຊຶ່ງບົດເພງໄດ້ພັນລະນາເຖິງເຫດການເດັ່ນໆຫຼັງຈາກສອບ ເສັງຈົບຊັ້ນ ມ7 ແລະຍັງໄດ້ກ່າວເຖິງຄວາມຄິດຮອດຄິດເຖິງພາບ ບັນຍາກາດໃນສະໄໝຮຽນ ມ ປາຍສໍາລັບຜົນງານທີ່ຜ່ານມາເພງທີ່ໄດ້ຮັບຄວາມນິຍົມຫຼາຍສຸດແມ່ນເພງ “ມ5”ເປັນບົດເພງສື່ຄວາມໝາຍແລະເປັນຕົວແທນແຫ່ງມິດຕະພາບ ໃນໄວຮຽນທຸກຄົນຕອບໂຈດໄດ້ໃນຊີວິດຈິງທີ່ໄດ້ຮັບຄວາມນິຍົມມາຈົນ ເຖິງປະຈຸບັນ ແຕ່ກໍຍັງມີອີກຫຼາຍໆບົດເພງທີ່ແຟນເພງຍັງຄົງບໍ່ລືມ ເຊັ່ນ: ໜາມກຸຫຼາບ, ຄົນຫຼາຍໃຈ, ເຟສບຸກ,ລູກຜູ້ຊາຍຕາຍໆ ແລະ ເພງອື່ນໆ.

ໜຸ່ມ ຕີ໋ ອຸດາໄລ ໄດ້ຝາກເຖິງສັງຄົມວ່າ:ຢາກໃຫ້ຄົນລາວເປີດໃຈຮັບຊົມຜົນງານຂອງສິລະປິນ ເພງລາວໃຫ້ຫຼາຍຂຶ້ນກວ່າເກົ່າຢ່າຟ້າວຕັດສິນເທື່ອວ່າເພງລາວບໍ່ມ່ວນ ຫຼື ບໍ່ມີຄຸນນະພາບຖ້າບໍ່ໄດ້ມາດຕະຖານຈຶ່ງຄ່ອຍຕັດສິນ ແລະອີກຢ່າງຄືເປີດໃຈໃຫ້ກວ້າງຂຶ້ນຮັບເອົາຜົນງານຂອງສິລະປິນລາວໃຫ້ມີທີ່ຢືນໃນໃຈຂອງຄົນລາວໃຫ້ຫຼາຍຂຶ້ນຖ້າເຮົາບໍ່ຮັກຫອມບໍ່ເຊີດຊູເອົາກັນໃຜຈະມາຮັກຫອມ ແລະເຊີດຊູພວກເຮົາ,ສະເພາະຜົນງານເພງໃໝ່ “ມ7” ນີ້ສາມາດຕິດຕາມໄດ້ ທາງ You Tube:Tee oudalay,ທາງເຟສບຸກຕີ໋ ອຸດາໄລພໍ່ບັກຈອມພົນ ຫຼື ທາງແຟນເພຈ Tee oudalay.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์