ສສງ ຫົວແຊຈະເລີນ ເນັ້ນສິນເຊື່ອກະຊິກຳ

  ໃນເວລາເຄິ່ງປີມານີ້ສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນ ໄດ້ສະໜອງສິນເຊື່ອໃຫ້ແກ່ສະມາຊິກຈໍານວນ 14 ຕື້ກວ່າກີບ ໂດຍເນັ້ນໜັກໃສ່ຂົງເຂດກະສີກໍາເປັນຫຼັກຂະນະທີ່ປະຈຸບັນສາມາດສ້າງຜົນກໍາໄລແລ້ວ 1 ຕື້ກວ່າກີບ.

  ທ່ານ ໄຊຍາ ທໍາມະວົງແສງ ຜູ້ອໍານວຍການສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນ (ສສງ) ໄດ້ໃຫ້ສໍາພາດຕໍ່ນັກຂ່າວຂອງພວກເຮົາເມື່ອບໍ່ດົນມານີ້ຮູ້ວ່າ: ສສງ ຫົວແຊຈະເລີນໄດ້ເອົາໃຈໃສ່ ແລະ ເປັນຈຸດເຊື່ອມຕໍ່ໃນການຜັນຂະຫຍາຍແຜນຍຸດທະສາດຂອງສະຫະກອນລົງສູ່ການປະຕິບັດຕົວຈິງຜ່ານຂະບວນການປະ ສານງານທີ່ມີປະສິດທິພາບ, ຊຶ່ງເຫັນໄດ້ຢ່າງຊັດເຈນຈາກໝາກຜົນທີ່ເຮັດໄດ້ໃນຊຸມປີຜ່ານມາ ແລະຮັບປະກັນບາດກ້າວການຂະຫຍາຍຕົວທີ່ໝັ້ນຄົງຈະສືບຕໍ່ເກີດຂຶ້ນກັບ ສສງ ຫົວແຊຈະເລີນ ໄປເລື້ອຍໆ ພວກເຮົາສະໜອງການບໍລິການທາງດ້ານການເງິນແກ່ສະມາຊິກຂອງຕົນດ້ວຍຫຼາຍຮູບແບບຜະລິດຕະພັນເຊັ່ນ: ຮຸ້ນ,ເງິນຝາກ ແລະເງິນກູ້, ຊຶ່ງມີເປົ້າໝາຍເລັ່ງໃສ່ຜູ້ທີ່ມີຄວາມຫຍຸ້ງຍາກໃນການເຂົ້າເຖິງການບໍລິການທາງດ້ານການເງິນໃນເຂດຊານເມືອງ ແລະຊົນນະບົດ.

  ຜ່ານການດໍາເນີນງານ 7 ປີຜ່ານມາ ພວກເຮົາໄດ້ເກັບກ່ຽວປະສົບການ ແລະ ຮັກສາຈັງຫວະການເຕີບໂຕຈໍານວນສະມາຊິກ ແລະຜົນກໍາໄລຢ່າງຕໍ່ເນື່ອງ, ຜູ້ບໍລິຫານ ແລະ ພະນັກງານໄດ້ຮັບການຝຶກອົບຮົມຍົກລະດັບຄວາມຮູ້ຄວາມສາມາດກ້າວເຂົ້າສູ່ການບໍລິການແບບມືອາຊິບ ແລະທັນສະໄໝ, ຮັກສາໄດ້ຄວາມຍືນຍົງ ແລະ ຜົນປະ ໂຫຍດຂອງສະມາຊິກ. 

 ສໍາລັບໃນ 6 ເດືອນຕົ້ນປີຜ່ານມາ ສສງ ຫົວແຊຈະເລີນ ແມ່ນໄດ້ສືບຕໍ່ໃຫ້ການບໍລິການທາງດ້ານເງິນແກ່ສະມາຊິກຢ່າງມີປະສິດທິພາບສູງ, ໂດຍສະເພາະແມ່ນໄດ້ເນັ້ນໃສ່ໃຫ້ເງິນກູ້ຂົງເຂດກະສີກໍາເປັນຫຼັກ ເພື່ອໃຫ້ສະມາຊິກນໍາທຶນໄປທໍາການຜະ ລິດ, ໂດຍສະເພາະແມ່ນການປູກສວນ ມັນຕົ້ນ, ຊຶ່ງເປັນພືດກະສິກໍາທີ່ມີທ່າແຮງໃນເວລານີ້ຂອງຫຼາຍເມືອງໃນແຂວງຈໍາປາສັກ, ເຮັດໃຫ້ເຄິ່ງປີໄດ້ປ່ອຍສິນເຊື່ອແກ່ຊະມາຊິກແລ້ວ 14 ຕື້ກວ່າກີບ ແລະຄາດ ວ່າຈະສືບຕໍ່ໃຫ້ປະຊາຊົນກູ້ຢຶມອີກເປັນຈໍານວນຫຼາຍ.

  ທ່ານຜູ້ອໍານວຍການໃຫ້ຮູ້ຕື່ມວ່າ: ສສງ ຫົວແຊຈະເລີນ ໄດ້ສູ້ຊົນພະຍາຍາມສ້າງໃຫ້ສະຫະກອນມີຄວາມເຂັ້ມແຂງແລະມີການຂະຫຍາຍຕົວທັງປະລິມານ ແລະ ຄຸນ ນະພາບ, ການບໍລິຫານຈັດການມີລະບົບຄົບຊຸດເປັນການບໍລິການຈັດການທາງດ້ານການເງິນຢ່າງມືອາຊີບເຮັດໃຫ້ຜົນການຈັດຕັ້ງປະຕິບັດວຽກງານການສ້າງຜົນກໍາໄລໃນເຄິ່ງປີຜ່ານມາໄດ້ແລ້ວ 1 ຕື້ກວ່າກີບືຄາດວ່າໝົດປີນີ້ຈະມີຜົນກໍາໄລເພີ່ມຂຶ້ນ 30% ຖ້າທຽບໃສປີຜ່ານມາ.

--------------------------------

ຂ່ຽນໂດຍ: ໂພທິຣາຊ   

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์